Yobe 31 - Setswana 1970

¹ “Matlho a me ke ne ke utlwanye nao gore a se ka a leba lekgarebe.

² Fa nka bo ke dirile jalo, kabelo ya Modimo e e tswang kwa godimo e ka bo e le efe? Boswa jwa Mong-wa-thata-yotlhe jo bo tswang legodimong e ka nna bofe?

³ A ga se tatlhego ya mosiamolodi le go tlhoka tlhogonolo ga baleofi?

⁴ A ga se ene yo o bonang ditsela tsa me, yo o balang dikgato tsa me tsotlhe?

⁵ Fa ke dirile ka bolotsana, fa dinao tsa me di akofetse go tsietsa

⁶ foo a Modimo o ntekanye mo selekanyetsong se se siameng gore o itse bosenamolato jwa me!

⁷ Fa dikgato tsa me di fapogile mo tseleng, fa pelo ya me e setse keletso ya matlho a me morago, fa sebala se kgomaretse diatla tsa me,

⁸ foo a ke jwale, mme go je yo mongwe; tse di ntlhogelang mo tshimong a di kumowe!

⁹ Fa pelo ya me e raelesegile ka mosadi, fa ke laletse mojako wa mongwe-ka-nna,

¹⁰ foo a mosadi wa me a silele monna yo mongwe! A ba bangwe ba nne nae!

¹¹ Gonne go dira jalo ke tshenyo e e nyatsegang; ke molato o o tshwanetseng petso ya baatlhodi.

¹² Ee, ke molelo o o nyeletsang go fitlha kwa felong ga tatlhego o o fisang mahumo a me otlhe.

¹³ Fa ke nyaditse tshiamelo ya motlhanka wa me le ya lelata la me mogang ba sekang le nna,

¹⁴ foo ke tla dira eng, fa Modimo o ka tsoga? Nka fetola ka reng, fa o nkotla?

¹⁵ A ga ke re, yo o ntirileng mo popelong, le ene o mo dirile? A ga se Modimo o le mongwe fela o o re bopileng ka bobedi jwa rona?

¹⁶ Fa ke ganne ka se se kopiwang ke ba babotlana, fa ke swabisitse matlho a motlholagadi,

¹⁷ gongwe fa ke jele thathana ya me ke le nosi, mme ke se ka ka nathela lesiela –

¹⁸ kana go tloga bonyaneng jwa me le goletse mo go nna ke le rraalo; go tloga botsalong ke ne ke le mogogi wa motlholagadi!

¹⁹ Fa ke bonye motho a latlhega ka go tlhoka diaparo le mohumanegi yo o se nang kobo;

²⁰ fa dirope tsa gagwe di sa nteboga, fa a sa ikomosa ka boboa jwa dinku tsa me

²¹ fa ke tsholeleditse lesiela letsogo go le otla, ka ke bona ba ba nkemelang kwa lekgotleng;

²² foo a legetla la me le kgaoge mo thamong! A letsogo la me le robege le tlosiwe mo mmeleng!

²³ Gonne go boifa Modimo go ne go nthibela; ke ne ke sa kgone go dira jalo ka ntlha ya bogolo jwa ona.

²⁴ Fa ke ikantse gouta, fa ke reile gouta e e itshekileng ka re: ‘Ke wena ke ikaegang ka wena;’

²⁵ fa ke itumeletse khumo ya me e kgolo le papalo e kgolo ya seatla sa me,

²⁶ fa ke bonye lesedi la letsatsi le phatsima gongwe ngwedi o o tsamayang o le montle

²⁷ fa pelo ya me e itsieditse mo sephiring, fa molomo wa me o atlile seatla sa me e le go di tlotla jaaka medimo:

²⁸ le go dira jalo ke molato o o atlholelwang petso gonne nka bo ke itatotse Modimo o o kwa legodimong.

²⁹ Fa ke itumeletse tatlhego ya yo o ntlhoileng fa ke ne ke duduetsa, fa bosula bo mo wela –

³⁰ mme ga ke a leofisa magalapa a me; ga ke a mo kopela loso ka go mo hutsa!

³¹ Ruri, ba lapa la me ba buile ba re: ‘Ke ofe yo o se kang a kgora nama tsa gagwe?’

³² Moeng ga a ise a ke a lale kwa ntle; ka bulela moeti ditswalo tsa me.

³³ Fa ke lobile dibe tsa me jaaka batho, fa ke fitlhile molato wa me mo teng ga me,

³⁴ ka ke ne ke boifa bontsi jo bogolo, ka nyatso ya ditshika tsa ga etsho e ntshosa, fa ke ne ke didimala, ke sa tswele kwa ntle ga ntlo – foo a Modimo o nkotle!

³⁵ Ao! Nka bo ke na le yo o nkutlwang! Go ikwala ga me ke moo. A Mong-wa-thata-yotlhe a nkarabe! Nka bo ke tshotse lokwalo lo moganetsi wa me o lo kwadileng!

³⁶ Ruri, ke ne ke tla lo sikara ka legetla la me, ke lo ithathelela mo tlhogong jaaka serwalo.

³⁷ Nka bo ke mo ikarabela dikgato tsa me, ke mo atamela jaaka kgosana.

³⁸ Fa tshimo ya me e goa ka ga me, fa mesele ya yona e lela mmogo;

³⁹ fa ke jele dijo tsa yona ke sa e reka, fa ke bolaile beng ba yona,

⁴⁰ foo a go tlhoge mitlwa boemong jwa mabele le mefero boemong jwa mmopo!” Mafoko a ga Jobe a felela fa.