Yobe 30 - Setswana 1970

¹ “Mme kajeno ke tshegwa ke ba e leng ba bašwa mo go nna; bao borraabo ke neng ke nyatsa go ba kopanya le dintšwa tsa letsomane la me.

² Le gona thata ya diatla tsa bone e ne e ka nthusa eng, ka ba ne ba senyegetswe ke thata ya bonna jwa bona?

³ Ba fedisitswe ka go tlhoka le ka tlala; maabane ba ne ba phura mo nageng e e omeletseng ya sekaka.

⁴ Ba tle ba kgetle morogo o o letswai mo ditlhatshaneng; modi wa motlopi ke dijo tsa bone.

⁵ Ba lelekwe mo gare ga batho, ba tlhabelwe mokgosi jaaka legodu.

⁶ Ba na le go nna mo megorogorong e e boitshegang le mo meoleng ya lefatshe le mo dikgageng.

⁷ Ba kue ba le mo gare ga ditlhatshana, ba kgobokane fa tlase ga bogopa.

⁸ Ke losika lwa masilo a a nyatsegang a a kobilweng mo lefatsheng ka seme.

⁹ Mme kajeno ke sotlwa ke bone bao, ba opela ka nna, ba buabua ka nna.

¹⁰ Ba katogana le nna, ke maila mo go bone; ga ba tshabe go nkgwela mathe mo sefatlhegong.

¹¹ Gonne Modimo o repisitse mosifa wa me wa nkokobetsa; ka moo ba itshola bobe fa pele ga me.

¹² Banyatsegi ba ntsogela mo ntlheng ya le le jang, ba nkgopisa maoto, ba kata ditsela tsa bone tsa go tla kwa go nna le go ntshenya.

¹³ Ba sentse tsela ya me, ba thusa go ntiga. Ga ba thibelwe ke ope.

¹⁴ Ba tsena jaaka baba ka phatlha e e atlhameng ya lorako, ba bidikamela pele mo gare ga marope.

¹⁵ Ditherego di nkwetse, di lelekile tlotlo ya me jaaka phefo; letlhogonolo la me le nyeletse jaaka leru.

¹⁶ Jaanong ke nnetse go lela; malatsi a pogisego a ntshwere.

¹⁷ Ke fetlhwa marapo otlhe bosigo; matlhoko a a jang mo go nna ga a didimale.

¹⁸ Seaparo sa me se fetogile ka thata e kgolo ya matlhoko; se a mpeta jaaka thamo ya hempe ya me.

¹⁹ Modimo o ntatlhetse mo seretseng; ke tshwana le lerole le molora.

²⁰ Ke goela thuso kwa go wena, mme ga o nkutlwe; ke eme fa pele ga gago, mme ga o nkele tlhoko.

²¹ O mphetogetse yo o setlhogo, o lwa le nna ka thata ya diatla tsa gago.

²² O ntsholeletsa mo phefong, o e mpalamisa, o ntheekedisa mo modumong wa yona.

²³ Ee, ke a itse gore o nkisa losong kwa ntlong ele kwa go tla kgobokanang botlhe ba ba phelang.

²⁴ Fela fa ntlo e wela motho, a ga a kitla a ntsha letsogo? Gongwe fa a latlhega, a ga a kitla a goela thuso?

²⁵ Kampo a ga ke a lelela yo o bonyeng malatsi a a makete? A ga ke a utlwela bahumanegi botlhoko?

²⁶ Gonne ke ne ke solofetse tse di molemo, ga tla tse di bosula; ke ne ke lebeletse lesedi, ga tla lefifi.

²⁷ Ka mo teng ga me go a bela, ga go khutle; malatsi a tlalelo a tlile mo go nna.

²⁸ Ke sepela ke hutsafetse, ke se na lesedi; ke nanoga mo phuthegong ke goela thuso.

²⁹ Ke fetogile morwa-rraatso-diphokojwe le selekane sa bontšhwe.

³⁰ Letlalo la me le tloga mo go nna le ntshofetse; marapo a me a fisiwa ke mogote.

³¹ Sefela sa me se fetogile khutsafalo; melodi ya lotlhaka lwa me e fetogile selelo sa ba ba lelang.