Yobe 3 - Setswana 1970

Ngongorego ya ga Jobe

¹ Morago ga moo Jobe a tswa molomo, a rogaka letsatsi la botsalo jwa gagwe.

² Jobe a simolola go bua a re:

³ “A letsatsi le nyelele le ke tsetsweng ka lone le bosigo jo go tilweng go ithwelwe ngwana wa mosimane!

⁴ A letsatsi leo le nne lefifi! Modimo o o kwa godimo a o se le tlhokomele! A le se ka la phatsimelwa ke lesedi!

⁵ A lefifi le moriti-wa-loso di le gape! A maru a mantsho a nne godimo ga lone! A phifalo ya motshegare e le tshose!

⁶ Bosigo joo a lefifi le bo tlose! A bo se tlhomagane le malatsi mo ngwageng! A bo se ka jwa tsena mo malatsing a kgwedi!

⁷ Ee, bosigo joo a e nne jwa boopa! A go se nne tuduetso mo go jona!

⁸ Ba ba rogakang letsatsi, a ba bo rogake, bone ba ba itseng go tlhotlheletsa kgwanyape!

⁹ A go fifale dinaledi tsa lotlatlana lwa jona! A bo letele lesedi, mme le se nne teng! A bo se ka jwa itumelela dintshi tsa mahube!

¹⁰ Ka gonne ga bo a ka jwa ntswalela kgoro ya sebopelo sa ga mme; ga bo a ka jwa subela matlho a me tapisego.

¹¹ Ke ne ke sa sweleng mo botsalong? Ke ne ke sa tlhokafaleleng, fa ke sena go tsalwa?

¹² Ke ka ntlha ya eng fa ba mphara mangoleng, fa ba nkisa mabeleng, ba re ke anye?

¹³ Gonne foo nka bo ke rapama jaanong, ke iketlile; foo nka bo ke robala, ke na le boikhutso.

¹⁴ Foo nka bo ke na le dikgosi tsa lefatshe le banna ba lekgotla, ba ba tsositseng marope.

¹⁵ Gongwe nka bo ke na le dikgosana tse di neng di tshotse gouta, tse di neng di tladitse matlo a tsona selefera.

¹⁶ Gongwe nka bo ke se gona jaaka phetela e e fitlhilweng le jaaka bana ba ba sa boneng lesedi.

¹⁷ Gona kwa baikepi ba khutla go tsosa modumo, teng kwa go ikhutsa ba ba feletsweng ke thata.

¹⁸ Bagolegwi ba ikhutsa mmogo gona; lentswe la mogateledi ga ba le utlwe.

¹⁹ Ba bannye le ba bagolo ba gona, ba a tshwana; motlhanka o gololesegile mo moreneng wa gagwe.

²⁰ Ke eng fa Modimo o naya mmogisegi lesedi, fa o naya ba ba nyemileng moko bophelo?

²¹ Ke ba ba letang loso, mme ga ba lo bone; ba lo epa bogolo go dikhumo.

²² Ke ba ba ka bong ba itumela, ba duduetsa, ba thaba, fa ba ka bona lebitla.

²³ Ke eng fa Modimo o naya monna bophelo, yo tsela ya gagwe e fitlhegileng, yo Modimo o mo thibeletseng phalolo mo ntlheng tsotlhe?

²⁴ Gonne ke tlelwa ke diphegelo boemong jwa dijo tsa me; go goa ga me go tswa jaaka metsi a elela.

²⁵ Fa ke boifa selo se a ntlela; se ke se tshogileng se a nkwela.

²⁶ Ga ke na kagiso, ga ke na boiketlo, ga ke na boikhutso; go tla matshwenyego fela.”