Yobe 29 - Setswana 1970

Polelo ya bofelo ya ga Jobe

¹ Jobe a tswelela pele, a ntsha diane tsa gagwe a re:

² “Ao! E kete nka bo ke ntse jaaka mo kgweding tsa pele! Jaaka ka malatsi ale fa Modimo o ne o ntse o ntisitse!

³ Fa lobone lwa ona lo okame tlhogo ya me; ka ralala lefifi ke le mo leseding la ona.

⁴ Nka bo ke ntse jaaka ke ne ke le mo malatsing a nonofo ya me; fa tsalano ya Modimo e okame lapa la me

⁵ fa Mong-wa-thata-yotlhe a sa ntse a na le nna fa bana ba me ba ne ba ntikanyeditse

⁶ fa dinao tsa me ke di tshasa ka lobebe, fa lekgwarana le ntswelela dinokana tsa lookwane.

⁷ E ne ya re fa ke tswela kwa kgorong ya motse, ke baakanya senno sa me mo dipatlelong,

⁸ basimane ba iphitlhe, fa ba mpona; banna ba bagolo ba nanoge ba eme ka dinao,

⁹ dikgosana di khutle go bua, di itshware melomo;

¹⁰ mantswe a ba ba tlotlegang a didimale, diteme tsa bone di kgomarele magalapa.

¹¹ Ya re fa tsebe e nkutlwa, e ntshegofatse; e re fa leitlho le mpona, le supe ka ga me,

¹² fa ke ne ke pholosa mmogisegi yo o goelang dithuso le lesiela le yo o se nang mothusi.

¹³ Ka bona tshegofatso ka yo o latlhegileng ka thabisa pelo ya motlholagadi.

¹⁴ Ka apara tshiamo; tiro tse di siameng tsa me tsa nkapesa jaaka kobo le serwalo.

¹⁵ Ke ne ke le matlho a sefofu le maoto a segole.

¹⁶ Ke ne ke le rra-bahumanegi; ka lotolotsa kgang ya tsheko ya yo ke sa mo itseng.

¹⁷ Mosiamolodi ka mo roba metlhagare; ka phamola thopo mo menong a gagwe.

¹⁸ Ka re: ‘Ke tla swa le sentlhaga sa me, ke ntsifatsa malatsi jaaka motlhaba.’

¹⁹ Ka re: ‘Modi wa me o nametse kwa metsing; go lala monyo mo dikaleng tsa me.’

²⁰ Ka re: ‘Tlotlo ya me e ntse e le e ntšhwa mo go nna; bora jwa me bo ntšhwafala mo seatleng sa me.’

²¹ Ba ne ba tle ba ntheetse ba ntebelele; kgakololo ba e utlwe ka go didimala.

²² Ya re fa ke sena go bua, ba se ke ba bue; mafoko a me a ne a rothegela mo go bone.

²³ Ba ne ba tle ba ntebelele jaaka go lebelelwa pula; ba bule melomo jaaka e kete ba kgalegetse tlhakola-modula.

²⁴ Ke ne ke tle ke tshege nabo ka tsalano, fa ba solofologile; ba ne ba sa itse go fifatsa lesedi la sefatlhego sa me.

²⁵ Ka itumela go ya kwa go bone, ka nna nabo ke le tlhogo, ka dula jaaka kgosi mo gare ga batlhabani, ke le yo o gomotsang ba ba pelo-di-botlhoko.