Yobe 28 - Setswana 1970

Ka ga botlhale jo bo sa bonweng ke motho

¹ “Kana go na le felo kwa selefera e bonwang teng; gouta e na le felo fa e tlhatswiwang gona.

² Tshipi e ntshiwa mo mmung; kgotlho e gakolosiwa e tswa mo mafikeng.

³ Batho ba fedisa lefifi, mo ntlheng tsotlhe ba fukutsa mafika a a mo bontshong le mo lefifing le legolo.

⁴ Ba epa moepo, ba tloga mo go ba ba agileng mo lefatsheng; ba lebalwa ba le kgakala le kwa dinao di gatang teng, ba lepeletse ba le kgakala le batho, ba akgaakgegela kwa le kwa.

⁵ Lefatshe le dijo di tswang mo go lone ka kwa tlase ga lone go epololwa ka molelo.

⁶ Matlapa a lone ke lone legae la safire; le dithole tsa gouta di teng gona moo.

⁷ Lenong ga le itse tselana ya teng; leitlho la segodi ga le a e bona.

⁸ Dibata tse di kokorogang ga di ise di e gate; le tau ga e ise e tsamae mo go yona.

⁹ Mme motho o isa seatla kwa mafikeng a legakwa; a epolola dithaba ka kwa meding.

¹⁰ O phunya ditsela mo teng ga mafika; leitlho la gagwe le bona tse di tlhwatlhwa e kgolo tsa mefutafuta.

¹¹ O thiba dikelelo tsa metsi kwa tlase gore di se ka tsa rotha; tse di fitlhegileng o di ntshetsa kwa leseding.

¹² Mme botlhale jona bo bonwa kae? Felo ga tlhaloganyo ke kwa kae?

¹³ Motho ga a itse tlhwatlhwa ya jona; ga bo bonwe mo lefatsheng la ba ba phelang.

¹⁴ Bodiba bo a re: ‘Ga bo yo mo go nna!’ Lewatle le a re: ‘Ga ke na najo!’

¹⁵ Ga bo rekwe ka gouta e e itshekileng; ga bo lekanyediwe selefera go nna tlhwatlhwa ya jona.

¹⁶ Gouta ya Ofire le yona ga e bo lekane, le fa e le šohama e e tlhwatlhwa e kgolo gongwe safire.

¹⁷ Gouta le galase ga di tshwane najo; ga bo ananngwe ka dijana tsa gouta.

¹⁸ Dikorala le legakwa ga di umakiwe; go nna botlhale go gaisa ditalama.

¹⁹ Le topase ya Ethiopia ga e tshwane najo; gouta e ntlentle ga e bo lekane.

²⁰ Jaanong ge, bo tswa kae botlhale? Tlhaloganyo e agile kae?

²¹ Bo fitlhegetse matlho a tsotlhe tse di phelang; le dinonyane tsa loapi bo di subegetse.

²² Felo ga tatlhego le loso tsa re: ‘Re utlwile magatwe a jona fela ka ditsebe tsa rona.’

²³ Tsela e e yang kwa go jona Modimo o e lemogile; ona o itse felo ga jona.

²⁴ Gonne o bona go fitlha kwa dikhutlong tsa lefatshe; o leba tsotlhe tse di fa tlase ga legodimo.

²⁵ E rile o direla phefo thata, o lekanya metsi ka seelo;

²⁶ ya re o baya molao wa pula, o direla logadima tsela:

²⁷ wa bo bona, wa bo rulaganya, wa bo emisa, wa bo tlhotlhomisa.

²⁸ Mme wa raya motho wa re: ‘Bona, go boifa Morena ke botlhale le go tlogela bosula ke tlhaloganyo.’ ”