Yobe 27 - Setswana 1970

Go bua Jobe

¹ Jobe a tswelela pele, a ntsha diane tsa gagwe a re:

² “Ka bophelo jwa Modimo o o nkamogileng tshwanelo ya me! Le ka Mong-wa-thata-yotlhe yo o njesitseng tse di galakang!

³ Ruri, fa bophelo jwa me bo sa ntse bo itekanetse mo go nna, fa mowa wa Modimo o le mo dinkong tsa me

⁴ molomo wa me ga o kitla o bua tsa tshiamololo; loleme lwa me ga lo kitla lo bolela tsa tsietso.

⁵ A go nne kgakala le nna go ka dumela gore lona lo mo nneteng; ke tla swa ke ise ke ipone molato.

⁶ Ke itshwarelela mo tshiamong ya me, ga nkitla ke e lesa; pelo ya me ga e nkgalemele ka letsatsi lepe la me.

⁷ Mmaba wa me o tshwanetse go nna jaaka moikepi; yo o ntsogelang o tshwanetse go nna jaaka mosiamolodi.

⁸ Gonne moikepi o solofela eng, fa Modimo o kgaola le go tlosa mowa wa gagwe?

⁹ A Modimo o tla utlwa go goa ga gagwe, fa tlalelo e mo wela?

¹⁰ A ene o ka itumelela Mong-wa-thata-yotlhe? A o ka tlhaeletsa Modimo ka metlha yotlhe?

¹¹ Ke tla lo ruta ka ga letsogo la Modimo; tse di mo go Mong-wa-thata-yotlhe ga nkitla ke di loba.

¹² Bonang, lona lotlhe lo di bonye ka nosi. Jaanong ke eng fa lo bua dipuo tsa boithamako fela?

¹³ Kabelo ya motho wa moikepi mo Modimong ke e; boswa jwa morena yo o pelompe jo o tla bo amogelang mo go Mong-wa-thata-yotlhe ke bo:

¹⁴ Fa bana ba gagwe ba ata, ba atela tšhaka fela bana ba bana ba gagwe ga ba kitla ba kgora bogobe.

¹⁵ Masalela a gagwe a tla fitlhwa ke leroborobo; batlholagadi ba motse wa gagwe ga ba kitla ba a lelela.

¹⁶ Le fa a kgobokanya selefera jaaka lerole, a itshegela diaparo tse dintsi jaaka motlhaba,

¹⁷ o tla di itshegela, mme di tla aparwa ke mosiami; yo o se nang molato o tla abelwa selefera.

¹⁸ O agile ntlo ya gagwe jaaka segokgo le jaaka mokgoro o o dirwang ke modisa.

¹⁹ O ya go robala a humile, mme a se ke a boelele gape: E re a budulola matlho, a fitlhele a se na sepe.

²⁰ Ditherego di mo wela jaaka morwalela; ledimo le mo tsaya bosigo.

²¹ Phefo ya botlhabatsatsi e mo kuke, a tloge; e mo gogole mo felong ga gagwe.

²² Modimo o mo konopa o sa rekegele; o ntse a tshaba seatla sa ona.

²³ Batho ba tla mo opela diatla; ba mo leletsa molodi, fa a tswa mo felong ga gagwe.