Yobe 26 - Setswana 1970

Jobe o a fetola

¹ Ke fa Jobe a fetola a re:

² “Yo o tlhokang thata, o mo thusitse jang ne! Letsogo le le sa tiang, o le namoletse pila jang!

³ Yo o se nang botlhale, ruri o mo gakolotse! Kana o ntshitse tse di tlhalefisang di le dintsi!

⁴ Mafoko a gago o a boleletse mang? Ke mowa wa ga mang o ò neng ò bua ka ona?

⁵ Baswi ba roroma kwa tlase ga metsi le tse di agileng mo go ona.

⁶ Felo ga baswi ga go a bipega fa pele ga ona; molete wa tatlhego ga o na sekhurumelo.

⁷ Ona o tsharolola bokone godimo ga lolea; o lepeletsa lefatshe mo go se nang sepe.

⁸ O phuthela metsi mo marung a ona, mme ga go leru lepe le le phanngwang ke metsi.

⁹ Ponalo ya sedulo sa ona sa bogosi o a e sira, o ala leru la ona mo go yona.

¹⁰ O rala molelwane mo godimo ga metsi go fitlha kwa mafelelong a lesedi fa le amanang le lefifi teng.

¹¹ Maotwana a legodimo a a reketla, a ba rerege ka kgalemelo ya ona.

¹² O hudua lewatle ka thata ya ona; o remaganya kgogela ka tlhaloganyo ya ona.

¹³ Go sedifetse kwa legodimong ka phefo ya ona; seatla sa ona se phololetsa noga e e lobelo.

¹⁴ Bonang, tseo ke makhutlo a ditsela tsa ona fela. Tse re di utlwang ka ga ona ke tsa go sebasebelwa fela, mme modumo wa thata ya ona ke mang yo o ka o tlhaloganyang?”