Yobe 22 - Setswana 1970

Puisanyo ya boraro Go bua Elifase

¹ Ga fetola Elifase wa Themane a re:

² “A monna o ka thusa Modimo? Nnyaya, letlhale sa lone ke go itirela fela.

³ A o a re o kgatlha Mong-wa-thata-yotlhe, fa o le yo o siameng? A o a re o a mo thusa, fa o siamisa tsamao ya gago?

⁴ A o a re ke ka ntlha ya poifo-Modimo ya gago, fa a go otla, a go sekisa?

⁵ A ga ke re, bosula jwa gago ke jwa mefutafuta? Le gona melato ya gago ga e na fa e felelang teng!

⁶ O tsere dipeeletso mo go morwa-rraago, a se na molato; wa apola diaparo tsa ba ba tlhokang.

⁷ Yo o nyorilweng ga o a mo nosa metsi; yo o tshwerweng ke tlala o mo timile dijo.

⁸ O a re: Naga ke ya monna yo o bogale! Motlotlegi o nna mo go yona!

⁹ Batlholagadi o ba buseditse kwa morago ba iphotlhere fela; wa pšhwetla masiela mabogo.

¹⁰ Ke ka moo o dikanyeditsweng ke diru le therego e go tshosa ka tshoganyetso.

¹¹ A kampo ga o bone lefifi le morwalela wa metsi a a go khurumetsang?

¹² Modimo a ga o kwa godimo? Bona dinaledi tse di kwa godimodimo, di kwa godimo jang!

¹³ Mme wena o a re: ‘Modimo o itse eng? A o ka atlhola o le kwa morago ga bontsho jwa maru?’

¹⁴ O a re: ‘Maru a o thibile matlho, ga o bone! O itsamaela mo tikologong ya legodimo!’

¹⁵ A o rata go tsaya tsela ya bogologolo e baikepi ba tsamaileng ka yona

¹⁶ ba ba neng ba tlosiwa pele ga sebaka, ba tsewa ke morwalela wa metsi?

¹⁷ Ke ba ba reileng Modimo ba re: ‘Tloga mo go rona!’ Gape ba re: ‘Mong-wa-thata-yotlhe o ka re direlang?’

¹⁸ Mme e ne e le ene yo o tladitseng matlo a bone tse di molemo! – Kakanyo ya baikepi e kgakala le nna! –

¹⁹ Basiami ba a bona, ba a itumela; ba ba se nang molato ba a ba sotla ba re:

²⁰ ‘Ruri, ba ba neng ba re tlhoile ba nyeleditswe; le tse ba di tlogetseng di fisitswe ka molelo.’

²¹ A ko o ithuse ka go tsalana nao, o nne kagisong; tlhogonolo e tla go tlela ka go dira jalo.

²² A ko o amogele thuto e e tswang mo molomong wa ona; o bee mafoko a ona mo pelong ya gago!

²³ Fa o boela kwa go Mong-wa-thata-yotlhe, fa o ikokobetsa o tlosa tshiamololo mo lapeng la gago;

²⁴ fa o latlhela gouta ya gago leroleng le gouta ya Ofire kwa mafikeng a melapo

²⁵ foo Mong-wa-thata-yotlhe o tla nna gouta ya gago le selefera e e phatsimang mo go wena;

²⁶ ee, foo o tla itumelela Mong-wa-thata-yotlhe, o tsholeletsa Modimo sefatlhego.

²⁷ O tla rapela Modimo, o tla go utlwa; o tla dirafatsa maikano a gago.

²⁸ Fa o ikaelela sengwe, o tla se kgona; lesedi le tla phatsimela ditsela tsa gago.

²⁹ Fa di ya kwa tlase, o tla re: ‘A ke tlhatloge!’ Modimo o tla thusa yo o ikokobetsang.

³⁰ Ee, le yo o molato, o tla mo pholosa; a pholosiwa ka bophepa jwa diatla tsa gago.”