Yobe 21 - Setswana 1970

Jobe o a araba

¹ Jobe a fetola a re:

² “Utlwang lo reetse se ke se bolelang! A go re jalo e nne dikgomotso tsa lona!

³ Ntumeleleng, le nna ke bue. Fa ke sena go bua, o ka sotla.

⁴ A nna ke lebisa selelo sa me mo bathong? Gongwe ke ka ntlha ya eng, fa ke sa tshwanela go fela pelo?

⁵ Ntebeng lo rerege! Bayang diatla melomong.

⁶ Fa ke gopola tseo, ke a tshoga; mmele wa me o a sisimoga.

⁷ Ke ka ntlha ya eng, fa baikepi ba ka phela, ba be ba tsofala le go tia nonofong?

⁸ Ba bona bana ba bone, ba tiile ba na nabo mmogo le bana ba bana.

⁹ Matlo a bone a mo kagisong, ga go na se se ba tshosang; thupa ya Modimo ga e ba otle.

¹⁰ Poo ya gagwe e a gwela, ga e fose; kgomo ya gagwe e a tsala, ga e folotse.

¹¹ Ba ntshetsa basimane ba bone kwa ntle jaaka dinku; bana ba bone ba a tlolaka.

¹² Ba opelela moropana le mangope; ba itumelela go lela ga ditlhaka.

¹³ Ba phela monate ka malatsi aotlhe; ba fologela mo felong ga baswi ba le kagisong.

¹⁴ Mme kana ba reile Modimo ba re: ‘Tloga mo go rona! Ga re kgatlhwe ke go itse ditsela tsa gago.’

¹⁵ Ba re: ‘Mong-wa-thata-yotlhe ke eng, fa go twe, re mo direle? Go ka re thusa eng, fa re mo rapela?’

¹⁶ Bonang, tlhogonolo ya bone a ga e mo diatleng tsa bone? Kakanyo ya baikepi e kgakala le ona Modimo.

¹⁷ A ga ke re, lobone lwa baikepi ga lo atise go tima le tatlhego ga e ba wele gantsi? Ga ke re, Modimo ga o tsotelele go ba abela dikotlo ka bogale jwa ona?

¹⁸ Ke ga kae ba tleng ba tshwane le dirite mo phefong, ba be ba tshwane le moko o o tsewang ke ledimo?

¹⁹ Lona lo a re: ‘Modimo o bolokela bana ba moikepi tatlhego ya gagwe!’ Nnyaya! A o otle ene ka fa go mo lebanyeng gore a utlwe botlhoko!

²⁰ A moikepi a bone tatlhego ya gagwe ka matlho! A a nwe bogale jwa Mong-wa-thata-yotlhe!

²¹ Gonne ke eng sa lapa la gagwe se se ka mo tshwenyang, fa a sena go swa, fa palo ya dikgwedi tsa gagwe e sena go fela?

²² A motho o ka ruta Modimo kitso, ona o o sekisang ba ba kwa godimo?

²³ Mongwe o swa a ntse a le tlhogonolo tota, a na le kagiso fa gotlhe a sa tshwenyegele sepe.

²⁴ Dikgamelo tsa gagwe di tletse lebese; marapo a gagwe a tiile moko.

²⁵ Mme yo mongwe a swe a le pelo-e-botlhoko, a ise a je tsa letlhogonolo.

²⁶ Ba robale mmogo leroleng, mme diboko di ba khurumetse.

²⁷ Bonang, ke itse dikakanyo tsa lona le maano a lo a ntogelang, a lo nteofelang ka ona.

²⁸ Fa lo re: ‘Lelapa la morena yo o ikgantshang le kae? Ntlo e kae e baikepi ba neng ba nna mo go yona?’

²⁹ A ga lo a botsa bafeti ba tsela? Kana dikao tsa bone ga lo di ganetse!

³⁰ Ba re: ‘Yo o bosula o rekegelwa ka letsatsi la tatlhego; o phologa ka letsatsi la bogale.’

³¹ Ke mang yo o kgalemelang tsamao ya gagwe a lebaganye nae? Ke mang yo o mo otlhaelang tse a di dirileng?

³² Le gona o isiwa mabitleng, mme phupu ya gagwe ba a e disa.

³³ Makwete a lebitla a monate mo go ene; batho botlhe ba mo sala morago, le ba ba mo eteletseng pele ga ba na palo.

³⁴ Jaanong lo ka nkgomotsa jang ka dilo tsa lefela? Mo dikarabong tsa lona go setse bolotsana fela.”