Yobe 20 - Setswana 1970

Go bua Sofare

¹ Ga fetola Sofare wa Naama a re:

² “Ke ka moo ke arabisiwang ke dikakanyo tsa me; ka lebaka leo maikutlo a me a a mpotlakisa.

³ Ke utlwile kgalemelo e e nkgopisang; ke na le temogo mo moweng wa me e e nkarabisang.

⁴ A ga ke re, o itse tsa bogologolo, tsa go tloga kgale, fa go tlholwa batho mo fatsheng?

⁵ Tse di reng: Moduduetso wa baikepi o mokhutshwanyane fela; boitumelo jwa ba ba pelompe ke jwa sebakanyana fela.

⁶ Le fa boikgantsho jwa moikepi bo ka tlhatlogela kwa legodimong, le fa tlhogo ya gagwe e ka ama maru,

⁷ o tla nyelelela ruri jaaka mantle a gagwe; ba ba kileng ba mmona ba tla re: ‘O fa kae?’

⁸ O tla timela jaaka toro a sa tlhole a ka bonwa; o tla kobiwa jaaka pono ya bosigo.

⁹ Leitlho le le kileng la mmona ga le tlhole le mmona; le felo ga gagwe ga go tlhole go mmona.

¹⁰ Bana ba gagwe ba tshwanetse go thabisa ba ba humanegileng; diatla tsa bone di na le go busa tse o di thukhuthileng.

¹¹ Le fa marapo a gagwe a tletse thata ya bokau jwa gagwe, e tla lala nae loroleng.

¹² Le fa bosula bo mo natefetse leganong, a bo fitlha ka fa tlase ga loleme lwa gagwe;

¹³ le fa a bo boloka, a sa rate go bo lesa a bo tshotse mo magalapeng a gagwe.

¹⁴ Dijo tsa gagwe di tla fetoga di le mo maleng a gagwe; e nna botlhole jwa mabolobolo ka mo teng ga gagwe.

¹⁵ Dikhumo tseo o di meditseng o tla di tlhatsa gape; Modimo o tla di gelola mo mpeng ya gagwe.

¹⁶ Botlhole jwa mabolobolo o a bo anya; loleme lwa noga lo a mmolaya.

¹⁷ Ga a nke a thaba ka go bona dinokana le dinoka tsa mafura a dinotshe le tsa mašwi a a themileng.

¹⁸ Tse o di itiretseng o a di ntsha gape, a ise a di metse; tse o di anantseng ga di na go mo itumedisa.

¹⁹ Gonne o ne a gatelela ba ba humanegileng, a ba latlha fela; a gapa ntlo, mme ga a kitla a e ntšhwafatsa.

²⁰ E re ka a ne a sa khutle go eletsa mo teng ga gagwe, ga a kitla a phologa ka dilo tse a di ratang.

²¹ E rile a thopa, a bo a sa sadise sepe; ke ka moo a sa boneng lesego le le tlhomameng.

²² Le fa a na le letlotlo le le tletseng, o tla pitlaganngwa; mabogo otlhe a babogisegi a tla mo wela.

²³ Morena o tla mo romela bogale jo bo tukang jwa gagwe, a bo mo nesetsa go nna dijo tsa gagwe le go tlatsa mpa ya gagwe.

²⁴ Fa a tshaba dibolai tsa tshipi, o tla phololediwa ka bora jwa kgotlho.

²⁵ Fa a re ke a itlhomola, motsu o tswa mo motlhaneng wa gagwe le tshipi e e phatsimang mo santlhokweng wa gagwe. O ya kwa losong, a wetswe ke matshogo.

²⁶ Lefifi tota le baakanyeditswe mahumo a gagwe; molelo o o sa godiweng ke motho o tla mo nyeletsa, o feleletsa masalela a a mo lapeng la gagwe.

²⁷ Legodimo le tla senola molato wa gagwe le lefatshe le mo tsogela.

²⁸ Mahumo a a mo ntlong ya gagwe a tla thopiwa; a gogolwa ka letsatsi la bogale jwa ona.

²⁹ Ke yona kabelo ya motho wa moikepi e e tswang mo Modimong; ke jona boswa jo o bo neetsweng ke Modimo.”