Yobe 19 - Setswana 1970

Jobe o a araba

¹ Jobe a fetola a re:

² “Lo tla ntlhokofatsa pelo le go nthubaganya ka dipuo sebaka se se kana kang?

³ Lo nkgobile e setse e le la bosome, lwa ntirela ka setlhogo lo sa tlhajwe ke ditlhong.

⁴ Le fa ka gongwe ke fositse tota, gona phoso ya me e tla sala le nna.

⁵ Fa lo rata tota go ikgodisa le go nnyatsa le go supa molato wa nyatsego ya me,

⁶ foo itseng gore ke siamololelwa ke Modimo, mme o ntharile ka letloa la ona.

⁷ Bonang, ke goa ke re: ‘Ke a gatelelwa!’ Mme ga ke utlwiwe; ke lelela thuso, mme tshiamo ga e teng.

⁸ Morena o thibile tsela ya me, mme ke palelwa ke go feta; le ditselana tsa me o adile lefifi mo go tsona.

⁹ O nkapotse tlotlo ya me; serwalo sa me sa bogosi o se nkamogile.

¹⁰ O nthutlile gotlhegotlhe, ke a tloga; o kumotse tsholofelo ya me jaaka setlhare.

¹¹ Bogale jwa gagwe o bo ntukisetsa, o nkaya mmaba wa gagwe.

¹² Mephato ya gagwe ya tla mmogo, e ikatela tsela ya go nkwela, e ntikanyetsa ka go thibelela.

¹³ O nkatogantse thata le bana ba ga rre; ba ke ne ke tlwaelanye nabo, ba ipaya ba ba sa nkitseng.

¹⁴ Ba losika lwa ga etsho ba a ntshaba; ba ba neng ba nkitse ba ntebetse.

¹⁵ Ba lelapa la me le malata a me ba ntebile jaaka moeng; ke o sele mo matlhong a bone.

¹⁶ Motlhanka wa me, fa ke mmitsa, ga a arabe; ke na le go mo kokotlela ka molomo wa me.

¹⁷ Mowa wa me o nkgela mosadi wa me; bomorwa-rre ba re, ke a nkga.

¹⁸ Le basimanyana ba a nnyatsa; fa ke re ke a nanoga, ba a ntshotla.

¹⁹ Ke maila mo go botlhe ba ke neng ke ba ikanya; bao ke ba ratileng ba mphetogetse baba.

²⁰ Marapo a me a ngaparetse letlalo la me; ke phologile fela ka mahinini a meno a me.

²¹ Ntlhomogeleng pelo! Ntlhomogeleng pelo! Lona ditsala tsa me; gonne seatla sa Modimo se nkotlile.

²² Ke go reng, fa lo ntlhorisa jaaka Modimo, lo sa kgore tshenyego ya nama ya me?

²³ Ao! A go kwalwe tseo tse ke di buileng! A di kwalwe lokwalong!

²⁴ A di gwaiwe mo lefikeng ka sethadi sa tshipi le ka llota gore di nnele ruri.

²⁵ Mme nna ke a itse gore Mogolodi wa me o a phela; ke ene yo o nnelang ruri, o tla ema mo godimo ga lorole.

²⁶ Mme ke tla bona Modimo, ke se na letlalo le le sentsweng ke dilo tseo, ke se na nama ya me.

²⁷ Ona ke tla o bona e le mothusi wa me, matlho a me a tla o bona, e seng o sele; ke seo pelo ya me e se tlhologeletsweng mo go nna.

²⁸ Fa lo re, re tla mo latelela thata, re bona molato wa dipogo mo go ene,

²⁹ gona lo boife tšhaka ka losi; gonne letlhoo ke mongwe wa melato e e atlholelwang tšhaka gore lo tle lo itse, fa moatlhodi a le teng.”