Yobe 18 - Setswana 1970

Go bua Biletate

¹ Ga fetola Biletate wa Sua a re:

² “O tla fetsa leng go buabua? Ikakanye pele, nte go bue rona!

³ Ke ka ntlha ya eng, fa re kaiwa jaaka kgomo fela, fa re le dieleele mo matlhong a lona?

⁴ Fa o ikgarolaka mo bogaleng jwa gago: A lefatshe le tla tlogelwa ka lebaka la gago? A lefika le ka suta mo mannong a lone?

⁵ Nnyaya! Lesedi la moikepi le tla tima; kgabo ya molelo wa gagwe ga e bonese.

⁶ Lesedi la lelapa la gagwe le a fifala; lobone lwa gagwe lo tima godimo ga gagwe.

⁷ Dikgato tsa go gwanta ga gagwe di tla koafala, mme maano a gagwe a tla mo diga.

⁸ Gonne o isiwa letloeng ke maoto a gagwe; o itsamaela mo godimo ga digopo.

⁹ Mutlwane o mo tshwara seretheng; seru se a mmofa.

¹⁰ Segole o se thaetswe ka mo mmung; le gona o thaiwa mo tseleng.

¹¹ Ditherego di mo tshosa mo ntlheng tsotlhe; di mo tebela di ntse di mo setse morago.

¹² Tatlhego e mo meletsa mathe; kotsi e baakantswe go mo diga.

¹³ Motsalwapele wa loso o tla ja dibatanyana tsa letlalo la gagwe; o tla ja ditokololo tsa gagwe.

¹⁴ O tla kumolwa mo lapeng la gagwe le a neng a le ikanya; o tla isiwa kwa kgosing ya ditherego.

¹⁵ Dilo tse e seng tsa gagwe di tla nna mo lapeng la gagwe; go tla gasiwa sebabole mo nageng ya gagwe.

¹⁶ Go tla omelela medi ya gagwe ka kwa tlase; dikala tsa gagwe di tla swaba kwa godimo.

¹⁷ Ga a tlhole a gopolwa mo fatsheng; ga a na leina le le umakwang mo mebileng.

¹⁸ Ba mo ntsha mo leseding, ba mo kobela kwa lefifing; ba mo leleka mo lefatsheng.

¹⁹ Ga a na ngwana, le fa e le setlogolo mo morafeng wa ga gabo; ga a na lesalela fa a neng a phela teng.

²⁰ Ka ntlha ya letsatsi la tatlhego ya gagwe go tla rerega ba bophirimatsatsi, le ba botlhabatsatsi ba tshwarwa ke letshogo.

²¹ Ee, ke tsona tseo fela tse di dirafalelang malapa a basenyi; ke tsa ga gabo yo o sa itseng Modimo.”