Yobe 17 - Setswana 1970

¹ “Mowa wa me o a fela, malatsi a me a a tima; ke lebitla fela le le ntshaletseng.

² Ruri, ditshotlo ke kabelo ya me; matlho a me a lala a ledisiwa ke dikomano tsa bone.

³ A ko o mpeele, o nkemele mo go wena! Yo mongwe kana ga a teng yo o ka nkemelang!

⁴ O subetse pelo tsa bone tlhaloganyo; ka moo ga o kitla o ba naya phenyo.

⁵ Yo o batlang kabelo ka go eka ba ga gabo, bana ba gagwe ba tla rotola matlho.

⁶ Nna o ntirile seane sa batho; ke fetogile yo o kgwelwang mathe mo sefatlhegong.

⁷ Matlho a me a fifetse ka botlhoko; ditokololo tsa me tsotlhe di tshwana le moriti fela.

⁸ Ka ntlha ya tseo go rerega ba e leng ba nnete; ba ba se nang molato ba tsogela baikepi.

⁹ Mme mosiami o tla sala mo tseleng ya gagwe; yo o diatla di phepa o tla nna a tiela pele.

¹⁰ Mme lona lotlhe, a ko lo tle gape; fela ga nka ke ka bona yo o botlhale mo go lona.

¹¹ Malatsi a me a fetile. Maano a me a senyegile a pelo ya me e a tlhoafaletseng.

¹² Bosigo ba bo dira motshegare ba re: ‘Lesedi le gaufi, le fa go ntse go le lefifi fela.’

¹³ Ke letile felo ga baswi ka re, ke ntlo ya me; bolao jwa me ke bo ala mo lefifing.

¹⁴ Ke raya phupu ke re: ‘O rre’; le diboko, ke re: ‘Lo mme’ le ‘kgaitsadiake.’

¹⁵ Tse ke di lebeletseng di kae? Tse ke di solofelang di bonwa ke mang?

¹⁶ Di fologela dikgorong tsa felo ga baswi, fa go robetswe mmogo leroleng.”