Yobe 16 - Setswana 1970

Jobe o a araba

¹ Jobe a fetola a re:

² “Mafoko a mofuta oo ke a utlwile gantsi; lo bagomotsi ba lo tenang motho, lona lotlhe.

³ Mafoko a e leng diphefo fela a a feleletse? Gongwe o tlhotlhelediwa ke eng, fa ò fetola?

⁴ Le nna nka bo ke itse go bua jaaka lona, fa lona lo ka bo lo le mo boemong jwa me; ke ne ke tla lo rulaganyetsa mafoko sentle le go lo thukhuthela tlhogo.

⁵ Nka bo ke lo nonotsha ka molomo wa me; kutlwelo-botlhoko ya mafoko a me e ka bo e kokobetsa tlalelo ya lona.

⁶ Le fa nka bua, botlhoko jwa me ga bo kokobele; fa ke didimala, ke tlogelwa ke eng?

⁷ Ruri, jaanong ona o ntapisitse. Wena Modimo, o ntshenyetsa ba ga etsho botlhe,

⁸ o a ntshwara; botlhoko jwa me ke mosupi; bo ntsogetse, jwa mpaya molato bo lebaganye le nna.

⁹ Bogale jwa ona bo nkgagotse le go ntwantsha; ona wa nkhuranyetsa meno; montsogedi a nkgwetolela matlho.

¹⁰ Ba nkatlhamolosetsa melomo, ba ntitaya marameng ka kgobo, ba nkgobokanela go lwa le nna.

¹¹ Modimo o nneetse ba ba sokameng, wa ntatlhela diatleng tsa baikepi.

¹² Ke ne ke le boiketlong, mme wa nthobaganya; wa ntshwara mo thamong, wa mpšhwetlakanya; wa ntira sekonopiwa sa ona.

¹³ Metsu ya ona e mpharafere mo ntlheng tsotlhe; o mphatlola pelo o sa rekegele; santlhokwe wa me o o tshololela fa fatshe.

¹⁴ O phunyaphunya mmele wa me jaaka fa go phunngwa lobota; o ntlhasela jaaka seganka.

¹⁵ Lesela la bohutsana ke le rokeletse mo letlalong la me; lonaka lwa me ka lo latlhela loroleng.

¹⁶ Matlho a me a hubitse ka go lela; lefifi le lentsho le mo dintshing tsa matlho a me;

¹⁷ e tswe go se na bokgopo mo diatleng tsa me le thapelo ya me e le phepa.

¹⁸ Wena lefatshe, se khurumetse madi a me! A go goa ga me go se bone boikhutso!

¹⁹ Le jaanong, bonang, mosupi wa me o kwa legodimong; ee, moemedi wa me o kwa godimodimo!

²⁰ Ditsala tsa me di a ntshotla, mme matlho a me a rothela dikeledi Modimong

²¹ gore o fedise kgang ya monna le Modimo le ya morwa motho le tsala ya gagwe.

²² Gonne go setse dinyaga di se kae, mme ke tla wela mo tseleng, ke sa boe.