Yobe 15 - Setswana 1970

Puisanyo ya bobedi Go bua Elifase

¹ Ke fa Elifase wa Themane a fetola a re:

² “A motlhalefi o ka araba ka kitso e e leng phefo fela, a tlatsa mpa ya gagwe phefo ya botlhabatsatsi,

³ e le go ikarabela ka mafoko a a se nang mosola le ka dipuo tse di sa thuseng sepe?

⁴ Ee, wena o senya poifo-Modimo, o ngotla tshisimogo fa pele ga Modimo.

⁵ Gonne molomo wa gago o buisiwa ke molato wa gago; o itlhophela puo ya maferefere.

⁶ Ga se nna ke go sekisang, o sekisiwa ke molomo wa gago; mafoko a gago a supa ka ga gago.

⁷ A ke wena motho wa ntlha yo o tsetsweng? A o tlholegile pele ga dithabana?

⁸ A o ne o reeditse mo lekgotleng la Modimo? A o iphamoletse botlhale?

⁹ O itse eng se rona re sa se itseng? A o lemogile sengwe se rona re iseng re se lemoge?

¹⁰ Ba ba tlhogo-di-pududu le batsofe le rona re na nabo; ke ba malatsi a mantsi bogolo go rraago.

¹¹ Dikgomotso tsa Modimo a o a di galala, e bong lefoko le le builweng le wena ka bonolo?

¹² O betelwang ke pelo? Ke eng, fa o gwetola matlho?

¹³ Kana o losa mowa wa gago le Modimo, fa o ntsha mafoko a a ntseng jalo mo molomong wa gago!

¹⁴ Motho ke eng? A e ka nna yo o itshekileng? A ngwana wa mosadi e ka nna yo o siameng?

¹⁵ Bonang, baitshepi ba ona ga o ba ikanye; le legodimo ga le a itsheka mo matlhong a ona,

¹⁶ bogolo jang motho yo o maila yo o senyegileng, yo o nwang bokgopo jaaka metsi!

¹⁷ Ke tla go ruta, ntheetse; ke tla bolela tse ke di bonyeng,

¹⁸ tse batlhalefi ba di bolelang, tse borraabo ba sa di ba lobelang.

¹⁹ Ke ba ba neng ba neilwe lefatshe ba le nosi, moeng a sa ba ralale:

²⁰ Ba re: Moikepi o mo poifong ka malatsi otlhe fela, jaaka morena yo o pelompe ka dinyaga tsotlhe tse o di beetsweng.

²¹ Medumo ya matshogo e duma mo tsebeng tsa gagwe; e a re a le kagisong, a welwe ke mogateledi.

²² Ga a solofele go ka boa mo lefifing; o atlholetswe go bolawa ka tšhaka.

²³ O kgarakgatshega go batla dijo. Di kwa kae? O a itse, fa letsatsi la tatlhego le etleeditswe le le gaufi nae.

²⁴ Tlalelo le pitlaganyo di mo tshosa di mo wela jaaka go tshosa kgosi e e bolotseng go tlhasela.

²⁵ Ke ka gonne o otlololetse Modimo letsogo go lwa nao, a ikgantshetsa Mong-wa-thata-yotlhe.

²⁶ A o tlhasela ka thamo e e gagametseng le ka bontsi jwa dithebe tsa gagwe.

²⁷ Gonne o sirilwe matlho ke go nona, a akola mafura diropeng,

²⁸ a nna mo metseng e e sentsweng le mo matlong, a ba a ileditsweng a a atlholetsweng go nna matlotla.

²⁹ Ga a kitla a huma; tse o nang natso ga se tse di tlhomameng; di tshwana le diako tse di sa obegeleng fa fatshe.

³⁰ Ga a kitla a falola mo fifing; bolelo bo tla swabisa matlhogela a gagwe; o tla nyelela ka pudulo ya molomo wa ona.

³¹ A a se ka a ikanya boithamako, o a itsietsa; gonne tuelo ya gagwe e tla nna boithamako.

³² Go tla dirafala jalo letsatsi la gagwe le ise le tle; kala ya mokolane wa gagwe ga e tlhoge.

³³ O tla diga maungo a a iseng a butswe jaaka moweine; a tlhotlhora dithunya tsa gagwe jaaka setlhare sa olefa.

³⁴ Gonne lekoko la balotsana ke la baopa; molelo o tla fisa malapa a ba ba amogelang neo e e faposang tshiamo.

³⁵ Ba ithwala tapisego, ba tsala tatlhego; teng ya bone e etleetsa tsietso.”