Yobe 14 - Setswana 1970

¹ “Motho, ngwana wa mosadi, ke wa malatsi a se kae o kgora matshwenyego.

² O tlhoga jaaka sethunya, a ba a swaba; o tshaba jaaka moriti, ga a na tlhomamo.

³ Mme le fa e le yo o ntseng jalo o mmudulogetse matlho; o nkisa tshekong fa pele ga gago.

⁴ Ao! Go ka bo go tswa yo o phepa mo go ba ba sa itshekang! Mme ga a yo, le e seng a le mongwe.

⁵ E re ka malatsi a gagwe a beilwe, ka o badile dikgwedi tsa gagwe, ka o dirile melelwane e a sa ka keng a e tlola,

⁶ faposa matlho mo go ene gore a ikhutse go fitlhelela a thabele letsatsi la gagwe jaaka yo o direlang tuelo ya letsatsi.

⁷ Gonne setlhare se na le tsholofelo; le fa se ka rengwa, se tla tlhoga gape; matlhogela a sona ga a tlhokafale.

⁸ Le fa modi wa sona o onala mo lefatsheng, le fa kutu ya sona e swela mo leroleng,

⁹ fa se utlwa monko wa metsi se tla tlhoga gape, se ntsha dikala jaaka se se tlhomilweng.

¹⁰ Mme fa monna a swa, o feleletse; fa motho a tlhokafetse, o ka tlhola a nna kae?

¹¹ Metsi a fela mo letsheng; noka e a tšha e kgale:

¹² Motho o robala jalo, a se ke a tlhole a tsoga; ga ba thanye, ga ba tsosiwe mo borokong jwa bone go fitlhelela legodimo le khutle go nna teng.

¹³ Ao! Ga o mpolokeleng mo felong ga baswi wa mphitlha teng go fitlhelela bogale jwa gago bo time; e kete o ka mpeela sebaka se o tla nkgopolang ka sona.

¹⁴ Fa monna yo o swang a ne a ka phela gape, foo nka bo ke itshoka ka malatsi otlhe a kampano ya me go tsamaya kgololo ya me e be e tle!

¹⁵ O ne o tla mpitsa, mme ke go arabe; o ka bo o tlhologelelwa sebopiwa sa seatla sa gago.

¹⁶ Foo o ne o tla bala dikgato tsa me, mme o se ke o tlhokomele sebe sa me.

¹⁷ Boleo jwa me bo ka bo bo tswaletswe kgetsaneng; molato wa me o ka bo o o bipile.

¹⁸ Mme thaba le yona, fa e wa, e a phatlakanngwa; le lentswe le ka suta mo felong ga lone.

¹⁹ Metsi a gotlha mafika, merwalela ya ona a gogola mmu wa lefatshe: Le tsholofelo ya motho o a e nyeletsa jalo.

²⁰ O mo gatelela ka bosakhutleng, mme o a nyelela; o fetola sefatlhego sa gagwe, o mo naya tsela.

²¹ Fa bana ba gagwe ba tlotlega, ene ga a itse; fa e le ba ba nyatsegang, ga a ba tlhokomele.

²² Mmele wa gagwe o utlwa botlhoko fela, fa o sa ntse o phela; mowa wa gagwe o hutsafala fela o sa ntse o le mo nameng.”