Yobe 13 - Setswana 1970

¹ “Ruri, tsotlhe tseo matlho a me a di bonye, ditsebe tsa me tsa di utlwa, tsa di tlhaloganya.

² Le nna ke di itse jaaka lona, mme ga lo mphale.

³ Mme nna ke rata go bua le Mong-wa-thata-yotlhe; ke eletsa go sekisanya le Modimo.

⁴ Lona lo babipi ba maaka, lotlhe lo dingaka tse e seng tsona.

⁵ Ao! Fa lo ka bo lo didimala, lo ka bo lo kaiwa batlhalefi.

⁶ Utlwang tlhe boikarabelo jwa me, lo tlhokomele go itwela ga molomo wa me.

⁷ A lo a re, lo direla Modimo ka go bua tse di sokameng? A lo o emela ka go bua tsa tsietso?

⁸ Gongwe a lo goga le ona? Kampo a lo a re, lo lwela Modimo?

⁹ A lo tla tswa sentle, fa o lo sekisa? A lo a re, lo ka o tsietsa jaaka go tsiediwa motho?

¹⁰ Nnyaya! O tla lo otla ruri, fa lo gobelelela mongwe mo sephiring.

¹¹ Bogolo jwa ona a ga bo kitla bo lo wela? Poitshego ya ona a ga e kitla e lo tshosa?

¹² Tse lo di nkgakololang ke diane tsa molora; mabaka a lona ke mabaka a letsopa fela.

¹³ Didimalang, lo nte ke bue, le fa ke dirafalelwa ke eng!

¹⁴ Ke leka go ipoloka ka go itsenya mo kotsing.

¹⁵ Bonang, o ka mpolaya, ga ke na tsholofelo; fela ditsela tsa me ke tla di ikarabela fa pele ga ona.

¹⁶ Le gona moo e tla nna pholoso ya me; gonne molotsana ga a tle fa pele ga ona.

¹⁷ Utlwang mafoko a me sentle, a tlhaloso ya me e lo tsene ditsebeng!

¹⁸ Bonang tlhe, ke rulagantse mafoko a tsheko; ke a itse, fa ke tla tswa ke se na molato.

¹⁹ Ke mang yo o ka mponang molato? Gonne fa a ka nna teng, ke tla didimala, ke swa.

²⁰ Fela dilo di le pedi se di ntirele; foo ga nkitla ke iphitlha fa pele ga gago:

²¹ Ka re: A seatla sa gago se se ka sa nkimela! A theregiso ya gago e se ka ya ntshosa!

²² Ke gona o ka ntshekisang, ke tla araba; gongwe ke tla bua, mme o mphetole!

²³ Ke na le ditshiamololo le dibe di le kae? Nkitsise tlolo ya me le boleo jwa me!

²⁴ O fitlhelang sefatlhego sa gago? O nkaya mmaba wa gago ka lebaka la eng?

²⁵ A o a re, o tshosa letlhare le le fokwang ke phefo? A o latelela dirite tse di omeletseng?

²⁶ Mo o mpolaisang tse di galakang, o nthwesa dibe tsa bokau jwa me;

²⁷ mo dinao tsa me o di bofelelang mo koteng, o tlhola tsela tsotlhe tsa me; mo o nthalelang mothalo mo tikologong ya pato tsa dinao tsa me

²⁸ ke le yo o nyelelang jaaka tse di bodileng le jaaka seaparo se se jewang ke motoutwana.