Yobe 12 - Setswana 1970

Jobe o a araba

¹ Jobe a fetola a re:

² “Ee ruri, batho ke lona; botlhale bo tla swa le lona.

³ Le nna ke na le tlhaloganyo jaaka lona; ga lo mphale. Ke mang yo o sa itseng tse di ntseng jalo?

⁴ Ke fetogile yo o sotlwang ke mongwe-ka-ene, ke le yo o rapetseng Modimo, wa ba wa nkutlwa; go sotlega mosiami yo o se nang molato.

⁵ Yo o phelang monate a re: Nyatso e tshwanela ba ba mo tatlhegong; ba dinao tse di relelang a ba kgopisiwe!

⁶ Kagiso e mo malapeng a ba ba gatelelang. Ba ba gakatsang Modimo ba thagame ba re: Modimo re a o laola.

⁷ Mme a ko o botse diphologolo gore di go rute, le dinonyane tsa loapi gore di go itsise.

⁸ Gongwe bua le lefatshe gore le go rute, a ditlhapi tsa lewatle di go bolelele!

⁹ Ke mang yo o sa lemogeng ka tsotlhe tse, fa seatla sa Morena se di dirile?

¹⁰ Kana bophelo jwa tse di phelang tsotlhe le mewa ya mebele ya batho botlhe di mo seatleng sa gagwe.

¹¹ A ga se tshwanelo ya tsebe go tlhatlhoba mafoko jaaka magalapa a utlwa dijo?

¹² Ga twe: Botlhale bo mo go ba ba tlhogo-di-pududu. Bontsi jwa malatsi bo tlisa tlhaloganyo.

¹³ Nnyaya! Botlhale le bonatla di mo go ona; ke ona o o nang le maano le temogo.

¹⁴ Ruri, ona o a rutla, mme ga go yo o ka tsosang; o tswalela motho, go se yo o ka mmulelang.

¹⁵ Bonang, fa o thibela pula, metsi a a tšha; mme fa o ka e nesa, a gogola naga.

¹⁶ O na le thata le temogo. Motimedi ke wa ona fela jaaka motimetsi.

¹⁷ Banna ba lekgotla o ba isa botshwarong ka dinao di sa rwala; o silofatsa baatlhodi.

¹⁸ O bofolola dikgole tse dikgosi di bofang ka tsona; o di golega matheka ka kgole.

¹⁹ Baperesiti o ba isa botshwarong ka dinao di sa rwala; o diga ditshika tsa kgale.

²⁰ Ba ba ikanyegang o ba tima puo; o amoga banna bagolo temogo.

²¹ O goromeletsa nyatsego mo batlotleging; o repisa meitlamo ya ba ba thata.

²² Madiba a lefifi o a a senola; lefifi le lentsho o le ntshetsa leseding.

²³ O godisa ditšhaba, le gona o a di nyeletsa; o anamisa ditšhaba, o bo o di tlose.

²⁴ O amoga ditlhogo tsa batho ba lefatshe tlhaloganyo; o ba kgarakgatsha sekakeng mo go se nang tsela.

²⁵ Ba apaapa mo fifing fa go seng lesedi; o ba theekedisa jaaka matagwa.