Yobe 10 - Setswana 1970

¹ “Bophelo jwa me bo a ntena. Ke tla ntsha selelo sa me. Ke tla bua ke le botlhokong jo bo galakang,

² ke raya Modimo ke re: Se nkatlhole wa re, ke moikepi; nkitsise se se go losang le nna.

³ A go molemo mo go wena, fa o dira tsa kgatelelo, fa o latlha yo diatla tsa gago di mo dirileng, fa o kgatlhwa ke maano a baikepi?

⁴ A matlho a gago ke a nama? Gongwe a o bona jaaka motho a bona?

⁵ A malatsi a gago a tshwana le malatsi a motho? Gongwe a dinyaga tsa gago di tshwana le malatsi a monna?

⁶ Ke go reng, fa o batla molato mo go nna, fa o latelela sebe sa me?

⁷ Etswe o ntse o itse, fa ke se na molato, e bile go se na ope yo o ka pholosang mo diatleng tsa gago.

⁸ Diatla tsa gago di mpopile, di ntirile ka botswerere gotlhe! A o batla go nnyeletsa?

⁹ A ko o gopole gore o mpopile jaaka letsopa! Jaanong a o mpusetsa loroleng?

¹⁰ A ga o a ntshela jaaka mašwi, wa nthemisa jaaka madila a a loileng?

¹¹ Wa nkapesa letlalo le nama, wa ntshwaraganya ka marapo le mesifa.

¹² O mphile bophelo, wa nthata, wa mpolokela mowa ka go mpabalela.

¹³ Mme tse o neng o di fitlhile mo pelong ya gago – jaanong ke itse boikaelelo jwa gago – ke tse:

¹⁴ Fa nka leofa, o tla nkela tlhoko; ga o kitla o nkgolola molatong.

¹⁵ Fa nka ikepa, a tatlhego ya me wee! Le fa ke le yo o siameng, ga ke na go tsholetsa tlhogo ka ntlha ya go kgora tsa ditlhong le go bona pogisego ya me.

¹⁶ Fa tlhogo e ka bo e itsosa, o ka bo o ntsoma jaaka tau, o ntse o ntemosa thata ya gago e e gakgamatsang.

¹⁷ O ka bo o ntebaganya le basupi ba bašwa, o godisa go nkgalefela ga gago, o ntse o ntlhasela ka mephato e mešwa.

¹⁸ O nntsheditseng mo mmeleng wa ga mme? E kete nka bo ke sule ke ise ke bonwe ke leitlho la motho.

¹⁹ Foo nka bo ke tshwana le yo o iseng a nne teng; nka bo ke isitswe kwa lebitleng fela ka nako e ke duleng mo popelong ka yona.

²⁰ Malatsi a me a ga a mannye? A Modimo o khutle, a o ntese, ke tle ke phuthologe go le gonnye!

²¹ Ke ise ke ye kwa fatsheng la lefifi la moriti wa loso, kwa ke sa tlholeng ke ka boa teng

²² kwa lefatsheng le lentsho la lefifi la moriti wa loso le le se nang thulaganyo; kwa bosigogare bo bidiwang lesedi.”