Yesaye 52 - Setswana 1970

Modimo o tla golola Jerusalema

¹ Thanya, thanya, o apare thata ya gago, wena Sione! Apara diaparo tsa gago tsa mokgabo, wena Jerusalema, motse o o boitshepo! Gonne ga go kitla go tlhola go tsena ba ba sa rupang le ba ba itshekologileng mo go wena.

² Tsoga o itlhotlhore lerole, wena Jerusalema yo o leng motshwarwi; dikgole tse di mo molaleng wa gago di bofologile, wena morwadia Sione yo o golegilweng.

³ Gonne Morena o bua jaana a re: “Lo rekisitswe e seng ka sepe; le gona lo tla rekololwa kwa ntle ga selefera.”

⁴ Gonne Morena Modimo o bua jaana a re: “Mo metlheng ya pele morafe wa me o ne wa falalela kwa Egepeto, ba nna baeng gona. Asiria le ene o o gateletse ka bomo.”

⁵ Mme jaanong Morena a re: “Ke fitlhela eng fano? Morafe wa me o thopilwe fela. Barena ba ba pelompe ba ona ba omana ka tlhodio. Mme leina la me le tlhola le kgalwa ka gale ka letsatsi lotlhe.” Morena o buile jalo.

⁶ “Ka moo morafe wa me o tla itse leina la me ka letsatsi leo; o lemoga fa e le nna yo ke buang ke re: Ke fano.”

⁷ Di dintle jang mo dithabeng dinao tsa morongwi yo o itumedisang, yo o utlwatsang kagiso, yo o begang mafoko a a molemo, yo o bolelang pholoso, a raya Sione a re: “Modimo wa gago ke kgosi.”

⁸ Reetsang! Batlhodi ba gago ba tsholetsa mantswe mmogo, ba duduetsa; gonne ba tla bona ka matlho, ba lebaganye nae, fa Morena a boela kwa Sione.

⁹ Ponyegang lo duduetse mmogo, lona marope a Jerusalema; gonne Morena o gomoditse morafe wa gagwe, a golola Jerusalema.

¹⁰ Morena o semile letsogo le le boitshepo la gagwe fa pele ga matlho a ditšhaba tsotlhe. Mme dikhutlo tsotlhe tsa lefatshe di tla bona pholoso ya Modimo wa rona.

¹¹ Hudugang, hudugang, tlogang gona! Se ameng tse di itshekologileng. Tswayang mo gare ga bone. Iphepafatseng, lona ba lo rweleng dijana tsa Morena.

¹² Gonne ga lo na go huduga ka potlako, ga lo na go tsamaya jaaka batshabi. Gonne Morena o tla lo etelela pele, mme yo o lo salang morago ke Modimo wa Iseraele.

Motlhanka wa Morena o a kokobediwa pogisong, a ba a godisiwa gape

¹³ “Bonang, motlhanka wa me, o tla tlhogonolofala; o tla tsholediwa, a godisiwa, a nna mogolo thata.

¹⁴ Ba bantsi ba ne ba mo gakgamalela ka poifo – ka sefatlhego sa gagwe se ne se senyegile, se tshwanologa mo go sa motho; ka popego ya gagwe e sa tshwane le ya batho.

¹⁵ O tla gakgamatsa ditšhaba tse dintsi jalo. Dikgosi di tla mo momela melomo. Gonne tse ba sa di bolelelwang ba a di bona; le tse ba iseng ba di utlwe ba a di tlhaloganya.”