Yesaye 49 - Setswana 1970

Motlhanka wa Morena ke lesedi la merafe

¹ Nkutlweng, lona ditlhakatlhake, reetsang, lona merafe kwa kgakala! Morena o mpiditse go tloga botsalong, a bolela leina la me, mmê a ise a mpelege.

² A dira molomo wa me jaaka tšhaka e e bogale, a mphitlha mo moriting wa seatla sa gagwe; a ntira motsu o o tlhokotsegileng, a mphitlha mo mokotlopong wa gagwe.

³ A nthaya a re: “O motlhanka wa me, Iseraele, yo ke ikgalaletsang ka wena.”

⁴ Mme nna ka re: “Ke itapiseditse lefela, ka fedisetsa thata ya me boithamako fela. Mme ruri tshiamelo ya me e mo Moreneng, tuelo ya me e mo Modimong wa me.”

⁵ Mme jaanong go bua Morena yo o ntirileng motlhanka wa gagwe go tloga botsalong gore ke busetse Jakobe kwa go ene, mme Iseraele a phuthegele kwa go ene – Ee, ke a tlotlega mo matlhong a Morena, mme Modimo wa me e ne ya nna thata ya me –

⁶ a re: “Ga go lekane, fa o le motlhanka wa me go tsosa ditso tsa ga Jakobe le go busa ba ba bolokilweng ba Iseraele; le gona ke go dirile lesedi la baheitane gore o nne pholoso ya me go fitlha kwa bokhutlong jwa lefatshe.”

⁷ Morena, Mogolodi wa Iseraele, Moitshepi wa gagwe, o bua jaana le yo o nyatsegang thata, yo e leng maila mo setšhabeng, yo e leng motlhanka wa barena ba ba setlhogo, a re: “Dikgosi le dikgosana di tla bona, di nanoga, di obamela ka ntlha ya Morena yo o ikanyegang le ka ntlha ya Moitshepi wa Iseraele yo o go itlhaoletseng.”

Jerusalema o tla tsosiwa

⁸ Morena o bua jaana a re: “Ke go utlwile mo sebakeng sa bopelotlhomogi ka go thusa ka letsatsi la pholoso; ka go boloka, ka go dira kgolagano ya morafe le Modimo, go tsosa lefatshe le go aba boswa jo bo senyegileng,

⁹ le go raya bagolegwi: ‘Tswayang!’ le go raya ba ba mo lefifing: ‘Tswelang mo leseding!’ Ba tla fudisa fa thoko ga ditsela tsotlhe. Mafulo a bone a mo mebotong yotlhe e e iphotlhereng.

¹⁰ Ga ba kitla ba tshwarwa ke tlala le e seng go bolawa ke lenyora. Ga ba nke ba tlhajwa ke letsatsi, le fa e le bolelo jwa sekaka. Gonne yo o ba utlwelang botlhoko o tla ba etelela pele, a ba isa kwa metsweding ya metsi.

¹¹ Dithaba tsotlhe tsa me ke tla di dira tsela. Ditsela tse dikgolo tsa me di tla bo di katilwe ka mmu.

¹² Bonang, bao ba tswa kwa kgakala; bonang, bale ba tswa kwa bokone le kwa bophirimatsatsi, mme bano mo lefatsheng la Basini.”

¹³ Ipeleng, lona magodimo! Itumele, wena lefatshe! Tlhabang mokgosi wa tuduetso, lona dithaba, gonne Morena o gomoditse morafe wa gagwe, a tlhomogela babogisegi ba gagwe pelo.

¹⁴ Mme Sione a re: “Morena o ntlogetse. Morena o ntebetse.”

¹⁵ “A mosadi a ka lebala lesea la gagwe, a sa utlwele morwa mmele wa gagwe botlhoko? Le fa ene a ka mo lebala, nna ga nkitla ke go lebala.

¹⁶ Bona, ke tshwaile leina la gago mo diatleng tsa me; dipota tsa gago di fa pele ga me ka gale.

¹⁷ “Ba ba go agang ba a itlhaganela; ba ba go rutlileng ba go senya, ba a go tlogela.

¹⁸ Tsholetsa matlho o lebe mo ntlheng tsotlhe: Ba phuthegile botlhe, ba tla kwa go wena.” Morena a re: “Ka bophelo jwa me! Ò tla ba apara botlhe jaaka mokgabo; ò itlama ka bone jaaka monyalwa.

¹⁹ “Gonne marope a gago le metse ya gago e e senya le lefatshe la gago le le sentsweng – ee, jaanong le tla bo le sa lekane baagi. Mme ba ba go senyeditseng ba ile kwa kgakala.

²⁰ Ee, bana ba gago ba o neng o ba thukhuthilwe ba tla bua gape mo ditsebeng tsa gago ba re: ‘Manno a me a pitlaganye. A nkokeletse gore ke bone bonno.’

²¹ O tla akanya mo pelong o re: ‘Ke mang yo o ntsaletseng bana ba? Kana ke ne ke se na bana, ke le moopa; ke le mo botshwarong, ka lelekiwa. Ke mang yo o ba godisitseng? Bonang, ke ne ke setse ke le nosi fela. Ba ne ba le kae bone ba?’ ”

²² Morena Modimo o bua jaana a re: “Bonang, ke tla gwetlha ditšhaba ka letsogo, ke tlhomela merafe sefoka sa me kwa godimo. Foo ba tla tlisa bomorwao ba ba tshotse ka mabogo; bomorwadio ba tla sikarwa ka magetla.

²³ Mme dikgosi e tla nna batlamedi ba gago; bahumagadi ba tsona e tla nna baamusi ba gago. Ba tla go obamela ba inametse ka difatlhego fa fatshe, ba latswa lerole la dinao tsa gago. Foo o tla itse gore ke nna Morena! Le gore ba ba ntebelelang ga ba tlhajwe ke ditlhong.”

²⁴ A senatla se ka amogiwa thopo? Gongwe a batshwarwi ba morena yo o peloethata ba ka falola?

²⁵ Ee, Morena o bua jaana a re: “Senatla le sona se tla amogiwa batshwarwi; thopo ya morena yo o peloethata le yona e tla falola. Ke nna yo ke tla lwang le yo o lwang nao; ke nna yo ke pholosang bana ba gago.

²⁶ Ba ba go gatelelang ke tla ba jesa nama ya mebele ya bone; ba tla tagwa ke madi a bone jaaka ke weine a ntšhwa. Mme batho botlhe ba tla itse gore ke nna Morena, Mopholosi wa gago; le gore Mogolodi wa gago ke Senatla sa ga Jakobe.”