Yesaye 48 - Setswana 1970

Go gololwa ka Korese go batla tlhabologo ya nnete

¹ Utlwang mafoko a, lona ba ntlo ya ga Jakobe, ba lo bidiwang ka leina la Iseraele; ba lo ikanang ka leina la Morena, lo tumisa Modimo wa Iseraele, mme e seng ka boammaaruri, le e seng ka tshiamo.

² Kana ba ipitsa ka motse o o boitshepo, ba ikaega ka Modimo wa Iseraele. Leina la ona ke Morena wa masomosomo.

³ “Tse di dirafetseng pele ke ne ke sa bolo go di itsise. Di dule mo molomong wa me, ka di utlwatsa; ka ba ka di dira ka tshoganyetso, tsa dirafala.

⁴ E re ka ke ne ke itse, fa o le peloethata, le thamo ya gago e le mosifa wa tshipi, le phatla ya gago e le kgotlho,

⁵ ke ka moo ke sa bolong go di go itsise, ka di go utlwisa di ise di tle, e se re gongwe o a re: ‘Modimo wa seseto wa me o di dirile; modimo wa me wa logong gongwe wa tshipi o di laotse.’

⁶ “O di utlwile – di bone tsotlhe ke tseo! Mme lona a ga lo rate go di utlwatsa? Go tloga jaanong ke tla go bolelela tse dintšhwa, tse di fitlhegileng, tse o sa di itseng.

⁷ Ke gona di tlholwang, e seng mo metlheng ya pele. Pele ga letsatsi leno o ne o ise o di utlwe, e se re gongwe o a re: ‘Bonang, ke ne ke itse.’

⁸ Kana o ne o sa utlwa, le gona o sa itse. Le gona ditsebe tsa gago di ne di ise di bulege. Gonne ke ne ke itse, fa o sa ikanyege ka gope; fa o bidiwa ‘Moikepi go tswa popelong.’

⁹ “Ke dia bogale jwa me ka ntlha ya leina la me, ke go ithibela bogale ka ntlha ya pako ya me gore ke se ka ka go nyeletsa.

¹⁰ Bona, ke go itshekisitse, mme e seng jaaka selefera; ka go leka mo leisong la tlalelo.

¹¹ Ke dira jalo ka ntlha ya me, ee, ka ntlha ya me. Gonne leina la me le itshepololwa jang! Ga nkitla ke naya ope o sele kgalalelo ya me.

Korese ke sediri sa Morena

¹² “Nkutlwe, Jakobe, le Iseraele, yo ke go biditseng. Ke nna. Ke nna wa ntlha. E bile ke nna wa bofelo.

¹³ Kana seatla sa me se theile lefatshe, letsogo le le jang la me la phutholola legodimo. Ya re ke di bitsa, tsa tlholega tsotlhe.

¹⁴ “Phuthegang lotlhe, lo utlwe! Ke mang mo go bone yo o tlhabileng mokgosi o o ntseng jalo? Ene yo Morena a mo ratang o tla direla Babele tse di mo kgatlhang; letsogo la gagwe le tla direla Bakalatea jalo.

¹⁵ Ke nna, ke nna yo ke buileng jalo. Le gona ke mmiditse, ka mo tlisa, mme o tla fetsa tiro ya gagwe ka tlhogonolo.

¹⁶ “Nkatameleng, lo utlwe mafoko a! Go tswa mo tshimologong ga ke a ka ka bua mo sephiring. Go tloga sebakeng se di dirafalang ka sona, ke teng.” – Mme jaanong Morena Modimo o nthomile ka Mowa wa gagwe.

Maikaelelo a Morena ka ga Baiseraele

¹⁷ Morena, Mogolodi wa gago, Moitshepi wa Iseraele, o bua jaana a re: “Ke nna Morena, Modimo wa gago, yo o go rutang tse di thusang, a go tsamaisa mo tseleng e o tla tsamayang ka yona.

¹⁸ “Ao! Fa o ka bo o ne wa reetsa ditaolo tsa me, foo kagiso ya gago e ka bo e tshwana le noka, le tshiamelo ya gago le makhubu a lewatle.

¹⁹ Foo losika lwa gago lo ka bo lo le jaaka motlhaba, le ditlogolo tse di tswang mo mmeleng wa gago jaaka matlapana a ona; foo leina la lone le ka bo le sa nyelediwe le e seng go phimolwa fa pele ga me.”

²⁰ Tswayang mo Babele, tshabang mo Kalatea! Tlhabang mokgosi wa tuduetso, lo utlwatse, lo ise kitsiso kwa bokhutlong jwa lefatshe lo re: “Morena o golotse Jakobe, motlhanka wa gagwe.”

²¹ Ba ne ba sa nyorwe mo sekakeng se o ba tsamaisitseng mo go sona. O ne a ba ntshetsa metsi mo lefikeng; a phatlola lentswe, la ba la ela metsi.

²² “Baikepi ga ba na kagiso!” Morena o buile jalo.