Yesaye 46 - Setswana 1970

¹ “Bele o kokobetse, Nebo o sokame! Ditshwantsho tsa medimo ya bone di belesitswe diesele le dikgomo, tse lo neng lo di rwala. Jaanong ke morwalo wa diphedi tse di lapileng.

² Di feletswe ke thata, di wela mmogo fa fatshe, ga di kgone go pholosa morwalo wa medimo. Yona ka yosi e ya mo botshwarong.

³ “Nkutlweng, lona ba lapa la ga Jakobe le lona masalela otlhe a Baiseraele: Ke lona lo belegweng ke nna go tswa sebopelong; ke lona lo beputsweng ke nna.

⁴ Mme ke ntse ke le ene go fitlha tsofalong. Ke nna yo ke tla belegang lona go tsamaya lo nna tlhogo di pududu. Ke nna yo ke dirileng jalo; ke nna yo ke tla rwalang, ke nna yo ke belegang, ke nna yo ke pholosang.

⁵ “Lo tla ntshwantshanya le mang, lo ntekanya le mang, lo mpapisa le mang, gore re tshwane?

⁶ Ba ba ntshang gouta mo letloleng le go lekanya selefera ka selekanyetso, ba rapa mothudi wa gouta gore a dire modimo ka tsona; ba feta ba khubama, ee, ba o obamela.

⁷ Ba o sikara mo magetleng, ba o rwala, ba o emisa mo mannong a ona. Jaanong o eme, ga o sute mo felong ga ona. Le fa mongwe a goela kwa go ona, ga o arabe; ga o mo pholose mo tlalelong ya gagwe.

⁸ “Gakologelwang tseo, lo eme senna, lona baikepi, lo di tlhokomele!

⁹ Gakologelwang dilo tsa pele, tsa bogologolo. Kana ke nna Modimo, ga go na ope o sele; ke nna Modimo, ga go na ope yo o tshwanang le nna.

¹⁰ Ke nna yo ke itsisitseng bokhutlo e sa le mo tshimologong, le tse di iseng di dirafale mo metlheng ya kgale. Ke nna yo ke rileng: ‘Maikaelelo a me a tla dirafala; tsotlhe tse di nkgatlhang ke tla di dira.

¹¹ Ke nna yo ke biditseng ntsu kwa botlhabatsatsi, e bong monna yo o tla dirafatsang maikaelelo a me, a tswa kwa lefatsheng le le kgakala. Ke di begile, le gona ke tla di tlisa; ke di etleeditse, le gona ke tla di fetsa.

¹² “ ‘Nkutlweleleng, lona ba lo pelo di thatafaditsweng, ba lo leng kgakala le tshiamo!

¹³ Ke atameditse tshiamiso ya me, ga e kgakala. Pholoso ya me ga e diege. Ke aba pholoso mo Sione, ke naya Iseraele kgalalelo ya me.’ ”