Yesaye 43 - Setswana 1970

Modimo o tla golola batho ba ona, o ba itshwarela

¹ Mme jaanong Morena yo o go tlhodileng, Jakobe, yo o go bopileng, Iseraele, o bua jaana a re: “Se boife, gonne ke go golotse, ke go biditse ka leina la gago! O wa me.

² Fa o tshela metsi, ke na nao; le dinoka, ga di na go go tsaya. Fa o ralala molelo, ga o nke o šwa; kgabo ga e nke e go fisa.

³ Gonne nna Morena ke Modimo wa gago; nna Moitshepi wa Iseraele ke mopholosi wa gago. Ke dirile Egepeto serekololo sa gago, ka ntsha Ethiopia le Seba boemong jwa gago.

⁴ E re ka o kaega segolo mo matlhong a me, o le yo o tlotlegang, yo ke go ratang, ka moo ke tla ntsha batho boemong jwa gago le merafe boemong jwa bophelo jwa gago.

⁵ Se boife, gonne ke na nao. “Ke tla tlisa losika lwa gago go tswa kwa botlhabatsatsi; ke go phutha go tswa kwa bophirimatsatsi.

⁶ Ke tla raya bokone ke re: ‘Rebola!’ le borwa ke re: ‘Se thibele!’ Tlisa bomorwaake go tswa kgakala le bomorwadiake go tswa bokhutlong jwa lefatshe,

⁷ e bong mongwe le mongwe yo o bidiwang ka leina la me, yo ke mo tlholetseng go nkgalaletsa; ka mmopa, ee, ka mo dira.

⁸ “Ntshang morafe o o foufetseng, le fa matlho a le teng; le ba ba disusu, le fa ba na le ditsebe.

⁹ A ditšhaba tsotlhe di phuthege mmogo, a merafe e kgobokane! Ke mang mo go bone yo o ka re begelang tseo? A ba re utlwise dilo tsa kgale! A ba ntshe basupi ba bone gore ba fitlhelwe ba le mo nneteng. A bone ba utlwe, ba bue ba re: ‘Ke nnete.’ ”

Baiseraele ke basupi ba Morena

¹⁰ Morena o bua a re: “Lona lo basupi ba me, le motlhanka wa me, yo ke mo itlhaoletseng, gore lo itse, lo ntumele, lo lemoge, fa e le nna. Ga go a bopiwa modimo ope pele ga me; le gona ga go nke go nna ope morago ga me.

¹¹ “Ke nna, ke nna Morena! Ga go na mopholosi ope kwa ntle ga me.

¹² Ke nna yo ke begileng, ka pholosa, ka utlwatsa, go se na modimo o sele mo go lona.” Morena o buile a re: “Lona lo basupi ba me, mme nna ke Modimo go tswa bosenatshimologo.

¹³ Le go tswa fano e tla bo e le nna, go se na ope yo o ka pholosang mo seatleng sa me. Ke tla dira tiro – e ka thibelwa ke mang?”

Phologo ya Baiseraele kwa Babele

¹⁴ Morena, Mogolodi wa lona, Moitshepi wa Iseraele, o bua jaana a re: “Ke rometse kwa Babele ka ntlha ya lona, mme ke tla folosetsa batshabi botlhe, e leng Bakalatea, kwa mekorong e ba neng ba duduetsa mo go yona.

¹⁵ Ke nna Morena, Moitshepi wa lona, yo o tlhodileng Iseraele, ke Kgosi ya lona.”

¹⁶ Go bua jaana Morena yo o neng a ntsha tsela mo lewatleng le mmila mo metsing a magolo;

¹⁷ yo o neng a bolotsa dikoloi tsa ntwa le dipitse le lesomo la batlhabani le diganka – ba namaletse fa fatshe botlhe, ga ba nke ba tlhola ba tsoga; ba fedile, ba timile jaaka mogala wa lobone – a re:

¹⁸ “Se gakologelweng ditirafalo tsa bogologolo! Se tlhokomeleng tse di neng di dirafala kgale!

¹⁹ Bonang, ke tla dira tse dintšhwa. Di setse di simologile. A ga lo di lemoge? Ee, ke tla dira tsela mo sekakeng le dinoka mo nageng e e omeletseng.

²⁰ Diphedi tsa naga di tla ntlotla le diphokojwe le bontšhwe; gonne ke tla ntsha metsi mo sekakeng le dinoka mo nageng e e omeletseng go nosa morafe wa me o ke o itlhaoletseng;

²¹ e leng morafe o ke o ipopetseng gore ba bolele pako ya me.

Boitshwarelo ke eng?

²² “Kana wena, Jakobe, ga o a ka wa mpitsa! Kana wena, Iseraele, ga o a ka wa itapisa ka ntlha ya me!

²³ Ga o a ntlisetsa dinku tsa ditlhabelo tsa gago tse di fisiwang; ga o a ntlotla ka ditlhabelo tse di jewang tsa gago. Ga ke a go imetsa ka go batla ditshupelo tsa dijo; ga ke a go lapisa ka go batla tshupelo ya musi.

²⁴ Ga o a nthekela letlhaka le le nkgang monate ka madi; ga o a nkgorisa ka mafura a ditlhabelo tsa gago! Nnyaya! O ntshwarisitse makete fela ka maleo a gago, wa ntapisa ka melato ya gago.

²⁵ Ke nna, ke nna yo ke phimolang dibe tsa gago; ke ka ntlha ya me, fa ke sa tsotelele maleo a gago.

²⁶ Nkgakolola, a re sekisanye; bolela o itshupe, fa o le mosiami.

²⁷ Rraago wa ntlha o leofile; baemedi ba gago ba ikepile mo go nna.

²⁸ Ke ka moo ke itshepolotseng dikgosana tse di boitshepo, ka neela Jakobe mo khutsong ya go latlhega, le Iseraele mo dikgobong.