Yesaye 3 - Setswana 1970

Tlhakatlhakano ya Jerusalema

¹ Gonne bonang, Morena, Morena wa masomosomo, o tla tlosa seitsetsepelo le seitshegetso mo Jerusalema le Juta, seiphediso sotlhe sa bogobe le seiphediso sotlhe sa metsi;

² a tlosa mogale le motlhabani le moatlhodi le moporofeti le moitseanape le monna mogolo

³ le molaodi wa ba le somatlhano le motlotlegi le monna wa lekgotla le setswerere le yo o tlhalefetseng mereo ya boloi.

⁴ Ke tla dira basimane dikgosana tsa bone; basimane ba tla ba busa ka bogosi jwa moraka.

⁵ Batho botlhe ba tla bogisanya, mongwe le mongwe a bogisa mongwe-ka-ene; yo mošwa a omanya yo mogolo, monyatsegi a tlhaba motlotlegi ka mafoko.

⁶ Jaanong fa motho a tshwara morwa-rraagwe mo ntlong ya ga rraagwe a re: “O na le kobo, nna molaodi wa rona; a thotobolo e, e busiwe ke wena,”

⁷ ene o tla fetola ka letsatsi leo a re: “Ke palelwa ke go nna moalafi, go se bogobe, go se kobo mo ntlong ya me. Lo se ka lwa ntira molaodi wa morafe!”

⁸ Ee, Jerusalema o wele, Juta o namaletse fa fatshe; gonne ba kgatlhanong le Morena ka diteme tsa bone le ka ditiro tsa bone gore ba ganetse matlho a kgalalelo ya gagwe.

⁹ Matepe a difatlhego tsa bona a a ba supa. Ba bolela maleo a bone jaaka ba Sotoma, ba sa a lobe. A tatlhego wee ya mewa ya bone! Gonne ba itirela bosula.

¹⁰ Buang lo re: “Basiami ba tla phela sentle, gonne ba tla ja maungo a ditiro tsa bone.”

¹¹ A tatlhego ya moikepi wee! O tla nna mo botlhokong, gonne o tla welwa ke tse a di dirileng ka diatla tsa gagwe.

¹² Balaodi ba morafe wa me ke basimane ba ba matepe, basadi ba a o busa. Morafe wa me! Baeteledipele ba gago ba a go timetsa, ba dubakanya tsela e o ka bong o sepela ka yona.

Morena o atlhola morafe wa gagwe

¹³ Morena o tsogetse go seka; o eme gore a atlhole merafe.

¹⁴ Morena o tsena mo tshekong le bagolo ba morafe wa gagwe le dikgosana tsa ona a re: “Lona lo fudile tshimo ya moweine. Tse di thukhuthilweng mohumanegi di mo matlong a lona.

¹⁵ Lo dirwa ke eng fa lo gataka morafe wa me jaana, lo tšhwetlakanya difatlhego tsa batlhaki?” go bua Morena, Modimo wa masomosomo.

¹⁶ Morena o bile a re: “E re ka bomorwadia Sione ba ikgantsha, ba tsamaya ba gagamaditse melala, ba gadimagadima kwa le kwa, ba tsamaya ba ntse ba thetha, ba tsirinya mefiri ya maoto,

¹⁷ ke gona ka moo Morena o tla betsang diphogo tsa bomorwadia Sione ka motshwa; Morena o tla bipolola ditlhong tsa bone.”

¹⁸ Ka letsatsi leo Morena o tla tlosa mekgabo ya mefiri ya maoto le ya ditilwane le ya dingwedinyana

¹⁹ le manyena a ditsebe le mefitshane ya mabogo le masire

²⁰ le dipuane le dikeetane tsa maoto le meitlamo le digwana tsa makga le dipheko

²¹ le dipalamonwana le manyena a dinko

²² le diaparo tsa mekgabo le mesese e e phuphuthang le merepo le dikgwatlha

²³ le diiponi le dihempe le dituku tse di thathelwang mo tlhogong le masire a magolo.

²⁴ Mme go tla nna sebodu boemong jwa setlolo se se nkgang monate, le kgole boemong jwa moitlamo, le lefatla boemong jwa moriri o o logilweng, le lesela la kgetse boemong jwa kobo e ntle, le lobadi lwa molelo boemong jwa bontle.

²⁵ Banna ba gago ba tla wa ka tšhaka, le bagale ba gago mo ntweng.

²⁶ Dikgoro tsa Sione di tla lela, di hutsafala; o tla nna fela e le matlotla.