Yesaye 24 - Setswana 1970

Lefatshe le atlholelwa petso

¹ Bonang, Morena o tlhokisa lefatshe banni, o a le senya, o ribegetsa sefatlhego sa lone, o falatsa baagi ba lone.

² Go tla dirafalela moperesiti jaaka morafe, morena jaaka motlhanka, mohumagadi jaaka lelata, morekisi jaaka moreki, moadimi jaaka moadingwi, yo o molato jaaka yo o busediwang molato.

³ Lefatshe le tla tlhokisiwa baagi, le se na ope; le tla thukhuthwa, le amogwa dilo, gonne Morena o buile lefoko le.

⁴ Lefatshe le hutsafetse, le swabile; naga e omeletse, e swabile. Batlotlegi ba bagolo ba lefatshe ba nyemile moko.

⁵ Lefatshe le itshepolotswe ke baagi ba lone, gonne ba tlodile ditaolo, ba fetola molao, ba roba kgolagano e e sa khutleng.

⁶ Ke gona ka moo khutso e jang lefatshe, ba ba agileng mo go lone ba utlwa petso; ka moo baagi ba lefatshe ba a šwa, go sadisiwa batho ba se kae fela.

⁷ Matute a moweine a a hutsafala, moweine o a swaba, botlhe ba ba pelo-di-thabileng ba a fegelwa.

⁸ Boitumelo jwa meropana bo didimetse; modumo wa ba ba duduetsang o khutlile; lethabo la dikwadi le fedile.

⁹ Ga ba nwe weine ka sefela; bojalwa bo galakegela ba ba bo nwang.

¹⁰ Motse o o se nang ope o thubagantswe; go tswetswe matlo otlhe; ga go tsene ope mo go ona.

¹¹ Go lelelwa weine mo mebileng, boitumelo jotlhe bo nyeletse, moduduetso wa lefatshe o tlogile.

¹² Mo motseng go setse tshenyego fela; kgoro e thubakantswe.

¹³ Gonne mo ditšhabeng tsa lefatshe go tla nna jaaka fa setlhare sa olefa se tshikinngwa; jaaka fa ba ronopa moweine, phulo e sena go fela.

¹⁴ Bale ba tlhatlosa dikodu, ba a duduetsa; ba dudueletsa borena jwa Morena go tswa kwa lewatleng.

¹⁵ Ba re: “Ka ntlha ya moo galaletsang Morena kwa botlhabatsatsi, le leina la Morena, Modimo wa Iseraele, mo ditlhakatlhakeng tsa lewatle!”

¹⁶ Re utlwile dikopelo di tswa kwa mafelelong a lefatshe di re: “A kgalalelo e nne ya Mosiami!” Mme ka re: “Ke a latlhega, ke a latlhega, joo nna wee! Dinokwane di a thukhutha, dinokwane di thukhutha ka bonokwane!”

¹⁷ Moagi wa lefatshe, therego le gopo le seru di a go tshwara.

¹⁸ Jaanong yo o falolang mo modumong wa therego o tla wela mo gopong; yo o tlhatlogang mo teng ga gopo o tla tshwarwa ke seru. Gonne dithoba tsa legodimo di bulegile le metheo ya lefatshe e a roroma.

¹⁹ Lefatshe le a thubega, le a thubakanngwa; lefatshe le a phatloga, le a phatlakanngwa; lefatshe le a thekesela, le a theekela.

²⁰ Lefatshe le thekesela jaaka yo o tagilweng; le akgega jaaka bolao jo bo lepeleditsweng. Gonne boikepo jwa lone bo a le imela; le tla wa, mme ga le nke le tlhola le tsoga.

²¹ Ka letsatsi leo Morena o tla betsa lesomo la bogodimo kwa godimo le dikgosi tsa lefatshe mo lefatsheng.

²² Di tla phuthelwa kwa moleteng jaaka go golegwa bagolegwi, di tswalelwa mo kgolegelong, mme di tla watlhaiwa malatsi a mantsi a sena go feta.

²³ Foo ngwedi o tla tlhajwa ke kgala, letsatsi le tlhajwa ke ditlhong; gonne Morena wa masomosomo o tla nna kgosi mo thabeng ya Sione le mo Jerusalema, mme go na la kgalalelo fa pele ga bagolo ba gagwe.