Yesaye 21 - Setswana 1970

Ka ga tatlhego ya Babele

¹ Taelo ya Modimo ka ga sekaka se se fa lewatleng. Go tswa sengwe kwa sekakeng, kwa lefatsheng le le boitshegang, se se tshwanang le ledimo le le fokang kwa borwa.

² Ke bontshitswe pono e e thata: Senokwane se a thukhutha, mosenyi o a senya! Elame, bolola! Media, dikaganyetsa ka ntwa! Ke tla fedisa phegelo yotlhe.

³ Ke gona ka moo letheka la me le tletseng botlhoko jaaka e kete ke segwa ke metlotsedi ya mosadi yo o belegang. Ke obegile mo ke bileng ke sa utlwe, ke tshogile mo ke bileng ke sa bone.

⁴ Pelo ya me e tshwerwe ke sedidi le therego, mo e bileng maabanyane a a monate mo go nna a mphetogela letshogo.

⁵ Go baakanngwa bojelo, go alwa diphate; go a jewa, go a nowa. Emang, lona dikgosana, tshasang dithebe!

⁶ Gonne Morena o buile le nna jaana a re: “Yaa o bee setlhodi. Se se tla se bonang a se se bege.

⁷ Fa se bona setlhopha sa bapalami ba dipitse, ba tla ba bapile ka bobedi le bobedi, le bontsi jwa diesele le bontsi jwa dikammele, a se tlhokomele ka tlhokomelo e kgolo!”

⁸ Ke fa se kua jaaka tau se re: “Morena, ke tlhola ke eme mo seraleng motshegare, ke lala ke ntse ke tlhola masigo otlhe!

⁹ “Bonang, go tla lesomo la banna, bapalami ba dipitse ba bapile ka bobedi le bobedi.” Sa ba sa kua sa re: “Babele o ole, o ole! Ditshwantsho tsotlhe tsa medimo ya teng ba di phatlakantse fa fatshe.”

¹⁰ Wena morafe wa me o o phothilweng o o gatakilweng jaaka mabele: Tse ke di utlwileng mo Moreneng wa masomosomo, Modimo wa Iseraele, ke di lo itsisitse.

Ka ga Etomo

¹¹ Taelo ya Modimo ka ga Duma. Ba ntlhaeletsa ba le kwa Seire ba re: “Molebeledi, bosigo bo tla sa leng? Molebeledi, bosigo bo tla sa leng?”

¹² Molebeledi a re: “Moso o tlile, bosigo le jona. Fa lo rata go botsa, boang lo botse gape!”

Ka ga Arabia

¹³ Taelo ya Modimo ka ga Arabia. Lalang mo sekgweng sa Arabia, lona ditlhopha tsa batsamai ba Detane.

¹⁴ Kgatlhantshang ba ba nyorilweng ka metsi, lona baagi ba lefatshe la Thema. Fang batshabi dijo.

¹⁵ Gonne ba tshaba ditšhaka, e bong ditšhaka tse di somotsweng le mara a a laetsweng le poitshego ya tlhabano.

¹⁶ Gonne Morena o ntheile jaana a re: “E tla re sebaka se se lekanyeng le dinyaga tsa motlhabani se ise se fele, kgalalelo yotlhe ya Ketare e bo e fedile.

¹⁷ Mme palo ya bagale ba Ketare ba ba setseng ba ba hulang ka bora e tla nna potlana, gonne Morena, Modimo wa Iseraele, o buile jalo.”