Yesaye 20 - Setswana 1970

Sesupo sa tatlhego ya Egepeto le Ethiopia

¹ E rile ka ngwaga o molaodi yo mogolo wa batlhabani o tlileng kwa Ašetote ka ona, a romilwe ke Saregone, kgosi ya Asiria, a tlhasela Ašetote, a mo thopa;

² ka sona sebaka seo Morena o ne a bua ka molomo wa ga Jesaya, morwa Amotse, a re: “Tsamaya o apole diaparo tsa khutsafalo mo lethekeng la gago, o role ditlhako mo dinaong tsa gago!” A dira jalo. A tsamaya, a sa ikatega, a sa rwala sepe mo dinaong.

³ Morago ga moo Morena a bua jaana a re: “Jesaya, motlhanka wa me, o tsamaile a sa ikatega, a sa rwala sepe mo dinaong dinyaga tse tharo go nna sesupo le tshupetso-pele ka ga Egepeto le ka ga Ethiopia.

⁴ Kgosi ya Asiria e tla gapa Baegepeto ba ba thopilweng le bathotšwa ba Ethiopia jalo, ba bašwa le ba bagolo, ba sa ikatega, ba sa rwala sepe mo dinaong, marago a sa apesiwa, e le go tlhabisa Baegepeto ditlhong.

⁵ Ba Ašetote ba tla kgobega marapo, ba tlhajwa ke ditlhong ka ntlha ya Ethiopia yo ba neng ba mo ikanya le ka ntlha ya Egepeto yo ba neng ba ikgantsha ka ene.

⁶ Baagi ba lefatshe leo le le fa lewatleng ba tla bua ka letsatsi leo ba re: ‘Ba re neng re solofela mo go bone, ra tshabela teng go kopa thuso ya go pholosiwa mo kgosing ya Asiria, bonang tse di ba dirafaletseng! Jaanong rona – re ka phologa jang?’ ”