Yesaye 2 - Setswana 1970

Kagiso e e sa feleng

¹ Lefoko le Jesaya, morwa Amotse, o le bonyeng ka ga Juta le Jerusalema ke le:

² E tla re mo malatsing a bofelo thaba ya Ntlo ya Morena e bo e tlhomame, e okame dithaba, e godisitswe kwa godimo ga dithabana; ditšhaba tsotlhe di tla phuthegela kwa go yona.

³ Merafe e mentsi e tla nanoga e re: “Tlayang a re tlhatlogeleng kwa thabeng ya Morena, kwa Ntlong ya Modimo wa Jakobe, gore o re rute ditsela tsa ona, re tle re tsamae mo ditselaneng tsa ona; gonne molao o tla tswa kwa Sione, Lefoko la Morena le tswa kwa Jerusalema.”

⁴ O tla seka mo gare ga ditšhaba, a siamisa merafe e mentsi. Foo ba tla thula ditšhaka tsa bona megoma, ba fetola marumo a bona disekele. Setšhaba ga se nke se somole tšhaka go tlhabana le se sengwe. Ga ba kitla ba tlhola ba ithuta tlhabano.

⁵ Ba ntlo ya ga Jakobe, tlayang a re tsamaeng mo leseding la Morena!

Boikgogomoso bo tla tlosiwa

⁶ Fela o latlhile morafe wa gago, e leng ba ntlo ya ga Jakobe; gonne ba tletse mereo ya boloi e e tswang kwa botlhabatsatsi, le baroka jaaka Bafelesita; ba utlwana le bana ba baeng.

⁷ Lefatshe la bona le tletse selefera le gouta, mme mahumo a bona ga a fele; lefatshe la bona le tletse dipitse, mme dikoloi tsa bone tsa ntwa ga di fele.

⁸ Lefatshe la bona le tletse medimo ya diseto. Ba obamela tiro ya diatla tsa bone tse di dirilweng ke menwana ya bone.

⁹ Foo go inama motho, go ikokobetsa monna. O se ka wa ba itshwarela!

¹⁰ Tsena mo mafikeng, o iphitlhe mo mmung ka ntlha ya poitshego ya Morena le ka ntlha ya kgalalelo ya borena jwa gagwe.

¹¹ Matlho a a ikgodisang a motho a tla kokobediwa; bogolo jwa banna bo tla obiwa. Morena o tla bo a le mogolo a le esi fela ka letsatsi leo.

¹² Gonne Morena wa masomosomo o beile letsatsi la go busolosa boikgantsho le boikgogomoso jotlhe le boikgodiso jotlhe gore di kokobediwe;

¹³ letsatsi la go rema mesetere yotlhe ya Lebanone e meleele e e tumileng, le ditlhare tsotlhe tsa eike tsa Basane;

¹⁴ letsatsi la go kokobetsa dithaba tsotlhe tse di godileng le dithabana tsotlhe tse dikgolwane;

¹⁵ la go rutla dikago tsotlhe tse di godimo le dipota tsotlhe tsa phemelo;

¹⁶ la go senya mekoro yotlhe ya Tharesise le dilo tsotlhe tse di eletsegang mo matlhong.

¹⁷ Boikgodiso jwa motho bo tla obiwa, boikgogomoso jwa banna bo tla kokobediwa. Morena o tla bo a le mogolo a le esi fela ka letsatsi leo.

¹⁸ Mme medimo ya diseto e tla nyelelela ruri.

¹⁹ Mme ba tla tshabela mo meoleng ya majwe le mo mesimeng ya lefatshe ka ntlha ya poitshego ya Morena le ka ntlha ya kgalalelo ya borena jwa gagwe, mogang a tsogang go tshosa lefatshe.

²⁰ Ka letsatsi leo batho ba tla latlha medimo ya selefera ya bone le medimo ya gouta ya bone e ba e itiretseng gore ba e obamele; ba e latlhela dirunya le bomamathwane

²¹ gore ba tshabele mo dipharong tsa mafika le mo dikgageng tsa ona ka ntlha ya poitshego ya Morena le ka ntlha ya kgalalelo ya borena jwa gagwe, mogang a tsogang go tshosa lefatshe.

²² Jaanong se ikanyeng motho yo go leng mowa mo nkong ya gagwe; kana o ka kaiwa eng?