Yesaye 19 - Setswana 1970

Petso ya Egepeto e a bolelelwa pele

¹ Taelo ya Modimo ka ga Egepeto. Bonang, Morena o palame leru le le lebelo, a ya kwa Egepeto. Jaanong medimo ya diseto ya Egepeto e roroma fa pele ga gagwe, pelo tsa Baegepeto di nyema mo teng ga bone.

² “Ke tla lwantshanya Moegepeto le Moegepeto gore ba tlhabane, mongwe le mongwe a lwe le mongwe-ka-ene, motse le motse, bogosi le bogosi.

³ Mme Baegepeto ba tla swa dipelo mo teng ga bone. Ke tla senya maano a bone. Foo ba tla botsa medimo ya diseto le dingaka tse di laolang le badimo le baitseanape.

⁴ Ke tla tsenya Baegepeto mo diatleng tsa Morena yo o setlhogo; kgosi e e peloethata e tla ba busa.” Ke lefoko la Morena, Morena wa masomosomo.

⁵ Metsi a letsha a tla kgala; noka e tla tšha, e omelela.

⁶ Dinoka di tla nkga, dinokana tsa Egepeto di tla ngotlega, di tšha. Lotlhaka le motlhatlha di tla swaba.

⁷ Mafulo a a fa dintshing tsa Nile le fa molomong wa yona le dijwalo tsotlhe tse di fa nokeng ya Nile di tla swaba, di gogolwa, di sa tlhole di le teng.

⁸ Batshwari ba ditlhapi ba tla hutsafala, botlhe ba ba digelang kobe mo nokeng, ba nyema moko, ba ba gogang letloa mo metsing, ba tlhoboga.

⁹ Ba ba otlhang ditlhale le ba ba logang masela a masweu ba tla tlhajwa ke ditlhong.

¹⁰ Tse di phedisang lefatshe di senyegile; botlhe ba ba direlang tuelo ba pelo-e-botlhoko.

¹¹ Dikgosana tsa Soane ke masilo fela. Bagakolodi ba ga Farao ba ba tlhalefileng ke lekgotla la dieleele fela. Lo ka bua jang le Farao lo a re: “Ke nna morwa matlhale? Ke nna morwa dikgosi tsa bogologolo?”

¹² A kae, matlhale a gago? A a go bolelele, a go itsise se Morena wa masomosomo a se ikaeletseng ka ga Egepeto!

¹³ Dikgosana tsa Soane di fetogile ditlaela; dikgosana tsa Nofe di tsietsegile. Egepeto o fapositswe ke ditlhogo tsa ditso tsa gagwe.

¹⁴ Morena o tshetse mowa wa tlhokamo mo go bone gore Baegepeto ba timediwe mo ditirong tsotlhe tsa bone, jaaka yo o tagilweng a thekesela mo matlhatseng a gagwe.

¹⁵ Egepeto ga a na tiro epe e a e direlwang ke tlhogo gongwe mogatla, ke mokolane gongwe motlhatlha.

Baegepeto ba tla obamela Morena

¹⁶ Ka letsatsi leo Baegepeto ba tla tshwana le basadi, ba roroma, ba boifa kgadikanyo ya letsogo la Morena wa masomosomo le a le ba kgadikanyetsang.

¹⁷ Lefatshe la Juta e tla nna setshosa mo go Baegepeto. Mongwe le mongwe yo le umakwang mo go ene o tla boifa ka ntlha ya maikaelelo a Morena wa masomosomo a o a ikaeletseng ka ga bone.

¹⁸ Ka letsatsi leo go tla nna metse e le metlhano mo lefatsheng la Egepeto e e buang puo ya Sekanana, e e ineelang Morena wa masomosomo ka maikano. Leina la mongwe ke Ire-Herese.

¹⁹ Ka letsatsi leo go tla nna aletare ya Morena mo gare ga lefatshe la Egepeto, le lentswe le le motloutlo la kgopotso la Morena fa molelwaneng wa lone.

²⁰ Tseo e tla nna sesupo sa Morena wa masomosomo le mosupi wa gagwe mo lefatsheng la Egepeto. Fa ba goela kwa Moreneng ka ntlha ya bapatiki, o tla ba romela mothusi yo o tla ba lwelang le go ba pholosa.

²¹ Gonne Morena o tla ikitsise Baegepeto, mme Baegepeto ba tla itse Morena ka letsatsi leo, ba mo direla ditlhabelo le ditshupelo, ba ikanela Morena maikano, ba a tshegetsa.

²² Mme Morena o tla betsa Baegepeto, a ba betsa, a ba a ba fodisa. Ba tla sokologela kwa Moreneng, mme ene o tla utlwa dithapelo tsa bone, a ba fodise.

²³ Ka letsatsi leo go tla nna tsela e kgolo e e tswang kwa Egepeto e ya kwa Asiria. Jaanong Baasiria ba tla etela Egepeto, mme Baegepeto ba etela Asiria. Baegepeto ba tla direla Morena mmogo le Baasiria.

²⁴ Ka letsatsi leo Iseraele o tla nna wa boraro, a kopanye le Egepeto le Asiria, e le tshegofatso mo lefatsheng,

²⁵ le Morena wa masomosomo a le tshegofatsang a re: “Go tshegofaditswe Egepeto, morafe wa me, le Asiria, tiro ya diatla tsa me, le Iseraele, boswa jwa me.”