Yesaye 12 - Setswana 1970

Sefela sa tebogo sa phuthego e ntšhwa

¹ Ka letsatsi leo o tla bua o re: “Morena, ke a go leboga! Gonne o ne o le bogale mo go nna, mme bogale jwa gago bo boile, o bile wa nkgomotsa.

² Bonang, Modimo ke pholoso ya me. Ke tla o ikanya, ke sa boife sepe. Gonne Modimo Morena ke thata ya me le sefela sa me, o bile o diregile pholoso ya me.”

³ Lo tla gelela metsi ka boitumelo mo metsweding ya pholoso.

⁴ Ka letsatsi leo lo tla bua lo re: “Lebogang Morena, bitsang leina la gagwe, itsiseng ditiro tsa gagwe mo merafeng, utlwatsang gore leina la gagwe ke le legolo.

⁵ Opelelang Morena, gonne o dirile dilo tsa bonatla; a go itsiwe jalo mo lefatsheng lotlhe!

⁶ Ipeleng lo duduetse, lona baagi ba Sione! Gonne Moitshepi wa Iseraele o mogolo mo gare ga lona.”