Yesaye 11 - Setswana 1970

Puso ya ga Keresete ya kagiso

¹ Letlhogela le tla tlhoga mo kutung ya ga Isai; letlhogela le le tswang mo meding ya gagwe le tla ungwa.

² Mowa wa Morena o tla nna mo go ene, e bong Mowa wa botlhale le tlhaloganyo, Mowa wa kgakololo le thata, Mowa wa go itse le go boifa Morena.

³ O tla natefelwa ke go boifa Morena. Ga a nke a atlhola ka fa matlho a gagwe a bonang ka teng, le e seng go siamisa ka fa ditsebe tsa gagwe di utlwang ka gona.

⁴ Mme o tla atlholela ba ba kwa tlase ka tshiamo, a sekela ba ba pelonolo mo lefatsheng ka nnete; o tla itaya Morena yo o setlhogo ka thupa ya molomo wa gagwe, a bolaya moikepi ka mowa wa molomo wa gagwe.

⁵ Tshiamo e tla nna moitlamo wa letheka la gagwe; boammaaruri e tla nna moitlamo wa dirope tsa gagwe.

⁶ Phiri e tla etela kwanyana, nkwe e botha le potsane; namane le tawana le pholwana e e nonneng, mosimanyana o tla di disa mmogo.

⁷ Kgomo le Bere di tla tsalana, bana ba tsona ba botha mmogo; tau e tla fula bojang jaaka kgomo.

⁸ Lesea le tla tshameka fa mosimeng wa lebolobolo; yo o kgwisitsweng o tla tsenya seatla sa gagwe mo mosimeng wa mokwepa.

⁹ Ga di nke di utlwisa botlhoko, le e seng go senya mo thabeng yotlhe ya me e e boitshepo. Gonne lefatshe le tla bo le tletse go itse Morena, jaaka metsi a khurumetsa lewatle.

Baiseraele ba tla boa botshwarong

¹⁰ Mo metlheng eo baheitane ba tla batla letlhogela la modi wa ga Isai le e leng sefoka sa merafe. Boago jwa gagwe bo tla galalela.

¹¹ Mo metlheng eo Morena o tla otlolola letsogo gape go rekolola masalela a morafe wa gagwe a a setseng kwa Asiria le kwa Egepeto le kwa Phatherose le kwa Ethiopia le kwa Elame le kwa Sineare le kwa Hamathe le kwa ditlhakatlhakeng tsa lewatle.

¹² O tla emisetsa ditšhaba sefoka, a phutha bomorwa Iseraele ba ba lelekilweng, a kgobokanya bomorwadia Juta ba ba faladitsweng, ba tswa ntlheng tse nne tsa lefatshe.

¹³ Eferaime ga a tlhole a fufegelwa, ba ba pitlaganyang Juta ba tla nyelediwa. Eferaime ga a nke a fufegela Juta, Juta ga a nke a pitlaganya Eferaime.

¹⁴ Ba tla fefogela kwa ntlheng ya bophirimatsatsi mo magetleng a Bafelesita; ba tla thukhutha bana ba botlhabatsatsi mmogo. Etomo le Moabe e tla nna thopo ya diatla tsa bone. Baamone ba tla laolwa ke bone.

¹⁵ Morena o tla hutsa loleme lwa lewatle la Egepeto ka phefo e e bolelo ya gagwe; a kgadikanya letsogo godimo ga noka ya Ferathe, a e itaya gore e tswe dinokana tse supa, tse motho a ka di tshelang a rwele ditlhako.

¹⁶ Masalela a morafe wa gagwe a a setseng kwa Asiria a tla bo a na le tsela e kgolo, jaaka Baiseraele ba ne ba na nayo mo metlheng e ba hudugileng kwa lefatsheng la Egepeto ka yona.