Yesaye 1 - Setswana 1970

¹ Pono ya ga Jesaya, morwa Amotse, e o e bonyeng ka ga Juta le Jerusalema mo malatsing a ga Usia le Jothame le Ahase le Hesekia, dikgosi tsa Juta.

Modimo o kgalemela batho ba ona

² Lona magodimo, utlwang; wena lefatshe, sekega tsebe! Gonne Morena o bua a re: “Ke otlile bana, ka ba godisa, mme bone ba ikepile mo go nna.

³ Kgomo e itse morui wa yona, esele e itse segopo sa mong wa yona! Iseraele ga a itse, morafe wa me ga o lemoge.”

⁴ A tatlhego wee ya setšhaba se se leofang, ya morafe wa molato o o makete, ya losika lwa badiradibe, ya bana ba ba senyang! Ba tlogetse Morena, ba nyatsa Moitshepi wa Iseraele, ba boela kwa morago.

⁵ Lo sa ntse lo ka bediwa fa kae, ka lo ntse lo tlhanogela pele? Kana tlhogo yotlhe e botlhoko, pelo yotlhe e a lwala.

⁶ Go tloga ka pato ya lonao go ya kwa tlhogong ga go na boitekanelo bope fa e se dintho le dingalo le dititeo tse dintšhwa. Ga di a tamolwa le e seng go fatšwa le e seng go rumafadiwa ka lookwane.

⁷ Lefatshe le lona ke sekaka fela, metse ya lona e fisitswe ka molelo. Baeng ba ja tsa masimo a lona lo ntse lo ba lebile. Go sekaka fela, go tshwana le fa baeng ba ribegeditseng teng.

⁸ Go setse morwadia Sione fela, o tshwana le mokgotshwana mo tshimong ya moweine le motlaagana mo tshimong ya diphare le motse o o dikanyeditsweng ke ntwa.

⁹ Fa Morena wa masomosomo a ka bo a sa re tlogelela masalela a se kae, re ka bo re ntse jaaka Sotoma, re tshwana le Gomora.

¹⁰ Lona balaodi ba Sotoma, utlwang Lefoko la Morena! Wena morafe wa Gomora, sekegela molao wa Modimo wa rona tsebe!

¹¹ “Ke tla reng ka bontsi jwa ditlhabelo tsa lona?” go bua Morena. “Ditlhabelo tse di fisiwang tsa diphelehu le mafura a dinamane tse di nontshitsweng di ntenne. Ga ke natefelwe ke madi a dipoo le a dikwana le a diphoko.

¹² E a re fa lo tla go bonala fa pele ga me, e be e le mang yo o batlileng tseo mo diatleng tsa lona? Ke go gataka malapa a me fela!

¹³ Lo se ka lwa tlhola lo tlisa ditshupelo tsa boithamako – ke musi wa maila mo go nna! A ke ngwedi o o rogilweng, a ke Sabata, a ke go biletsa pitsong – ga ke kgone go itshokela boikepo le kgobokano ya moletlo.

¹⁴ Mowa wa me o tlhoile mediro ya ngwedi o o rogilweng le meletlo ya lona; ke morwalo mo go nna, ke lapile go o rwala.

¹⁵ “Le fa lo tsholetsa mabogo, ke tla lo bipela matlho; le fa lo ka ntsifatsa dithapelo, ga nkitla ke lo utlwa; gonne diatla tsa lona di tletse madi.

¹⁶ Tlhapang lo itsheke; tlosang bosula jwa ditiro tsa lona fa pele ga matlho a me, lo bake go dira bosula.

¹⁷ Ithuteng go dira tse di molemo, batlang tshiamo, thusang yo o gateletsweng, siamisetsang lesiela, emelang motlholagadi mo tshekong.

¹⁸ “Tlayang he, a re sekisanyeng,” go bua Morena: “Le fa dibe tsa lona di hubitse jaaka madi, di tla sweufala jaaka semathana; le fa e le tse dikhibidu jaaka letsoku, di tla nna jaaka boboa jwa nku.

¹⁹ Fa lo rata go nkutlwa, lo tla ja molemo wa lefatshe.

²⁰ Mme fa lo gana, lo ganetsa, lo tla jewa ke tšhaka; gonne molomo wa Morena o buile jalo.”

Motse wa boleo

²¹ Kana motse o o neng o ikanyega o fetogile seaka jang ne! O ne o tletse tshiamo, molao o agile mo go ona, mme jaanong – ke babolai fela!

²² Selefera ya gago e fetogile manyela, weine ya gago e tlhakantswe le metsi.

²³ Dikgosana tsa gago ke baferetlhi, ke balekane ba magodu; ba rata thelesetso botlhe, ba tsoma tuelo; ga ba siamisetse lesiela, kgang ya motlholagadi ga ba e amogele.

²⁴ Ke ka moo go buang Morena, Morena wa masomosomo, Senatla sa Iseraele, a re: “Ahee! Ke tla gomotsega ka go betsa ba ba nkganetsang, ke rata go ipusolosetsa mo babeng ba me!

²⁵ Ke rata go busetsa letsogo la me kwa go wena, ke go itshekisa, ke tlosa manyela a gago jaaka ka molora, ke tlosa llota yotlhe ya gago.

²⁶ Ke rata go go naya baatlhodi gape jaaka gale le banna ba lekgotla jaaka mo tshimologong. Morago ga moo o tla bidiwa Motse wa tshiamo le Motse o o ikanyegang.”

²⁷ Sione o tla gololwa ka tshekiso, le ba ba tlhabologileng ba teng ka tshiamo.

²⁸ Mme baikepi le baleofi ba tla robaganngwa; ba ba tlogelang Morena ba tla nyelela.

²⁹ Gonne lo tla tlhajwa ke ditlhong ka ntlha ya ditlhare tsa metherebinthe tse di lo kgatlhang; lo tlhajwa ke kgala ka ntlha ya masimo a a lo natefelang.

³⁰ Gonne lo tla nna jaaka setlhare sa motherebinthe se matlhare a sona a swabileng; lo tshwana le tshimo e e se nang metsi.

³¹ Seganka se tla nna kgobati, tiro ya sona e nne tlhase; di tla šwa ka bobedi jwa tsona mmogo, go se yo o timang.