Yeremie 51 - Setswana 1970

Bamedia ba senya Babele, ba busetsa Bajuta kwa gae

¹ Morena o bua jaana a re: “Bonang, ke tla tsosetsa Babele le baagi ba ‘pelo ya baganetsi ba me’ mowa wa mosenyi.

² Ke tla romela bafeferi kwa motseng wa Babele, ba tla o fefera, ba leafatsa lefatshe la ona, fa ba le dikanyetsa ka ntwa ka letsatsi la tatlhego ya lone.

³ Yo o hulang ka bora a a konope yo o gagamatsang bora le yo o ikgantshang a apere ditshipi tsa phemelo! Lo se ka lwa rekegela makau a ona. Nyeletsang mephato yotlhe ya batlhabani ba ona.

⁴ Go tla namalala ba ba bolailweng mo lefatsheng la Kalatea le ba ba phololeditsweng mo ditseleng tsa lone.

⁵ Gonne Iseraele le Juta ga se batlholagadi ba ba tlogetsweng ke Modimo wa bone, Morena wa masomosomo. Kana lefatshe la bone Bakalatea le tletse molato wa go leofela Moitshepi wa Iseraele.

⁶ Tshabang lo tswe mo motseng wa Babele! A mongwe le mongwe a ipolokele bophelo jwa gagwe! E se re gongwe lwa nyelediwa ka ntlha ya molato wa ona. Gonne ke sona sebaka sa pusoloso ya Morena. O tla o bolaisa tse o di jeleng.

⁷ Babele e ne e le senwelo sa gouta mo seatleng sa Morena se se tagisitseng lefatshe lotlhe; ditšhaba di nole weine ya sona. Ke ka moo ditšhaba di tlhakanyeng tlhogo.

⁸ Babele o ole ka tshoganyetso, a thubakanngwa. Mo goeleng! Batlelang botlhoko jwa gagwe setlhare. Mo gongwe o ka fodisiwa.

⁹ Re ne re re, re alafa Babele, mme o paletswe ke go fola. Mo tlogeleng, mme a re yeng, mongwe le mongwe kwa lefatsheng la ga gabo. Gonne kotlo e e mo lebanyeng e fitlha kwa legodimong, e ama maru.

¹⁰ “Morena o senotse ditshiamelo tsa rona. Tlayang a re boleleng tiro ya Morena, Modimo wa rona, kwa Sione.

¹¹ “Lootsang metsu, lo tsee dithebe! Morena o tlhotlheleditse bogale jwa dikgosi tsa Bamedia; gonne o logetse Babele maano a go mo senya. Gonne ke yona pusoloso ya Morena, ke gona go busolosetsa Tempele ya gagwe.

¹² Tlhomang sefoka se se lebaganyeng le dipota tsa Babele. Tiisang balebedi. Emisang batlhodi. Laelang balaledi. “Gonne tse Morena o di ikaeletseng o bile o a di dirafatsa, e leng tse o bopetseng baagi ba Babele ka tsona.

¹³ Wena yo o agileng fa dinokeng tse dikgolo, yo o humileng dikhumo, go tlile bokhutlo jwa gago le khutliso ya kgwebo ya tshiamololo ya gago.

¹⁴ Morena wa masomosomo o ikanne ka bophelo jwa gagwe a re: ‘Ruri, ke tla go tlatsa batho jaaka tsie; ba tla go tlhabela mokgosi jaaka fa go gatwa maungo a moweine.’ ”

Sefela sa pako ya Modimo

¹⁵ Go bua yo o dirileng lefatshe ka thata ya gagwe, yo o tlhomamisitseng lefatshe ka botlhale jwa gagwe, le gona o tsharolotse legodimo ka tlhaloganyo ya gagwe.

¹⁶ Fa a utlwatsa kodu ya gagwe, metsi a suma kwa legodimong; o tlhatlosa meuwane kwa dikhutlong tsa lefatshe, a direla pula dikgadima, a fokisa phefo e tswa mo dipolokelong tsa gagwe.

¹⁷ Golo fa motho mongwe le mongwe o silofetse, a se na kitso. Mothudi wa gouta mongwe le mongwe o tlhabisiwa ditlhong ke modimo wa seseto. Gonne ditshwantsho tse o di bopileng, ke maaka fela; ga go na mowa mo go tsona.

¹⁸ Ke medimo ya boithamako fela, ke tiro e e sotlegang. E a re ka sebaka se e sekisiwang ka sona, e nyelele.

¹⁹ Mme yo e leng kabelo ya ga Jakobe, ga a tshwane le yona. Gonne ke ene yo o bopileng dilo tsotlhe, mme Iseraele ke lotso lo e leng boswa jwa gagwe. Morena wa masomosomo ke lone leina la gagwe.

Babele ke noto ya Morena

²⁰ “Wena Babele o ne o le noto ya me le sebolai sa ntwa. Ke thubagantse ditšhaba ka wena, ka senya magosi ka wena.

²¹ Ke thubagantse dipitse le bapalami ba tsona ka wena, ka thubaganya dikoloi tsa ntwa le ba ba di tanneng ka wena.

²² Ke thubagantse banna le basadi ka wena, ka thubaganya banna bagolo le basimane ka wena, ka thubaganya makau le makgarebe ka wena.

²³ Ke thubagantse modisa le letsomane la gagwe ka wena, ka thubaganya molemi le dipholo tsa gagwe ka wena, ka thubaganya balaodi le babusi ka wena.

Morena o tla betsa Babele

²⁴ “Mme jaanong ke tla busetsa Babele le baagi botlhe ba Kalatea bosula jotlhe jwa bone jo ba bo diretseng Sione, lona lo ntse lo lebile.” Morena o buile jalo.

²⁵ “Bona, ke lwa nao, wena thaba e e senyang,” go bua Morena. “Wena yo o sentseng lefatshe lotlhe, ke tla go otlololela letsogo, ke go kgokolosa mo mafikeng, ke go dira thaba e e šeleng.

²⁶ Ga ba kitla ba tsaya lefika la sekhutlo, le fa e le lefika la motheo mo go wena. Gonne o tla nna sekaka ka bosakhutleng.” Morena a re jalo.

²⁷ “Tlhomang sefoka mo lefatsheng, lo letse lonaka mo ditšhabeng! Baakanyang ditšhaba gore di tlhasele ene Babele. Biletsang magosi a Ararate le a Mini le a Asekenase kwa go ene. Laelang molaodi wa batlhabani go lwa nae. Bolotsang dipitse tse di tshwanang le tsie ya molome.

²⁸ Baakanyang ditšhaba di lwe nae, e bong dikgosi tsa Media le balaodi ba teng le babusi botlhe ba teng le lefatshe lotlhe la puso ya bone.

²⁹ Foo lefatshe le tla roroma, le le mo botlhokong, gonne Babele o dirafalelwa ke maikaelelo a Morena a gore naga ya Babele e fetoge sekaka se se se nang moagi.

³⁰ Bagale ba Babele ba khutlile go tlhabana, ba itunna fela mo dikagong tsa phemelo. Ba feletswe ke thata, ba fetogile basadi. Matlo a gagwe a tshubilwe, diphemelo tsa gagwe di thubakantswe.

³¹ Mosiani o tla taboga, a kgatlhantsha mosiani; morongwi a kgatlhantsha morongwi gore ba itsise kgosi ya Babele fa motse wa yona o thopilwe gotlhe;

³² fa matsibogo a thibilwe, fa motlhaka o tshubilwe, fa batlhabani ba nyemile moko.”

³³ Gonne Morena wa masomosomo, Modimo wa Iseraele, o bua jaana a re: “Morwadia Babele o tshwana le seboana, fa se katwa. Fa nakonyana e sena go feta, sebaka sa kotulo se tla mo tlela.”

³⁴ “Nebukatenesare, kgosi ya Babele, o re jele, a re fedisa, a re baya fa fatshe jaaka dijana tse di se nang sepe; a re metsa jaaka leruarua, a tlatsa mala a gagwe; a re ntsha mo legaeng le lentlentle la rona, a re leleka.

³⁵ A kgatelelo ya rona le tatlhego ya rona di wele Babele!” a go bue jalo baagi ba Sione. “A madi a rona a sekisediwe baagi ba Kalatea!” a go bue jalo ba Jerusalema.

Morena o tla thusa Baiseraele

³⁶ Ke ka moo Morena a buang jaana a re: “Bonang, ke tla seka kgang ya lona, ke lo lefisetsa. Ke tla tšhesa lewatle la Babele, ke kgadisa metswedi ya gagwe.

³⁷ Babele o tla fetoga mekoa ya marope le dikutla tsa diphokojwe le theregiso le tshotlego, fa go sa nneng ope.

³⁸ Botlhe ba sa ntse ba bôpa jaaka ditawana, ba duma jaaka madumedi.

³⁹ Mme e tla re ba gotetse ka keletso, ke ba baakanyetse moletlo, ke ba tagise gore ba tlhapelwe, ba robale thobalo e e sa khutleng, mme ba se ka ba thanya gape.” Morena o buile jalo.

⁴⁰ “Ke tla ba isa tlhabong jaaka dikwanyana le diphelehu le diphoko.

Tatlhego ya Babele

⁴¹ “Kana Sesage o fentswe jang! Yo o neng a tumile mo lefatsheng lotlhe o thopilwe jang! Kana Babele o fetogile jang theregiso mo gare ga ditšhaba!

⁴² Lewatle le tlhatlogile, la bipa Babele; o khurumeditswe ke dintelo tsa lone tse di sumang.

⁴³ Metse ya gagwe e fetogile marope le naga e e omeletseng le sekaka. Ke e go sa nneng ope mo go yona, e go sa feteng motho ope kwa go yona.

⁴⁴ Ke tla otla modimo Bele wa Babele, ke ntsha tse o di meditseng mo leganong la ona. Ditšhaba ga di nke di tlhola di phuthegela kwa go ona. “Dipota tsa Babele le tsona di tla wa.

⁴⁵ Lona batho ba me, tswang mo go ene! A mongwe le mongwe a pholose bophelo jwa gagwe, a falole mo bogaleng jo bo tukang jwa Morena!

⁴⁶ “E se re gongwe pelo tsa lona tsa nyema moko, lwa boifa, fa lo utlwa magatwe a a bolelwang mo lefatsheng, e le magatwe mangwe monongwaga, le a mangwe gape isago; fa go le kgatelelo mo lefatsheng, fa babusi ba tsogelana.

⁴⁷ Ka moo itseng gore malatsi a tla tla, a ka ona ke tla otlang medimo ya diseto ya motse wa Babele. Lefatshe lotlhe la ona le tla nyatsega. Ba ba bolailweng botlhe ba ona ba tla namalala mo gare ga ona.

⁴⁸ Legodimo le lefatshe le tsotlhe tse di mo go tsona di tla dudueletsa Babele, fa ba ba o fetolang sekaka ba tla kwa go ona ba tswa kwa bokone.” Morena o buile jalo.

⁴⁹ “Babele le ene o tshwanetse go wa ka ntlha ya Baiseraele ba o ba bolaileng; kana ba ba bolailweng ba lefatshe lotlhe le bona ba ole ka ntlha ya ga Babele.

Mafoko a Modimo ka ga Baiseraele

⁵⁰ “Lona ba lo falotseng mo tšhakeng, tlogang, se diegeng! Gopolang Morena lo le kwa kgakala, lo gakologelwe Jerusalema ka dipelo tsa lona.

⁵¹ ‘Re tlhabilwe ke ditlhong, fa re utlwa dikgobo. Nyatsego e ne e sosobanya difatlhego tsa rona. Gonne baeng ba tsenye mo go tse di boitshepo tsa Ntlo ya Morena.’

⁵² Ka moo itseng gore malatsi a tla tla,” go bua Morena, “a ke tla otlang medimo ya diseto ya Babele ka ona; mme ba ba khutlegileng lwa go swa ba tla gwetla mo lefatsheng lotlhe la gagwe.

⁵³ Le fa Babele a ka tlhatlogela kwa legodimong, le fa a ka godisa diphemelo tsa gagwe thata: Ba ba mo fetolang sekaka ba tla tla kwa go ene, ba romilwe ke nna,” go bua Morena.

Ditshenyego tse dingwe tsa Babele

⁵⁴ “Go utlwala go goa mo go tswang kwa Babele le tshenyego e kgolo mo lefatsheng la Bakalatea.

⁵⁵ Gonne Morena o fetola Babele sekaka, o didimatsa loratla lo logolo lwa gagwe. Dintelo tsa baba di suma jaaka metsi a magolo. Mokgosi wa ntwa wa bone o a utlwala.

⁵⁶ Gonne yo o senyang Babele o tlile kwa go ene. Bagale ba gagwe ba tshwerwe, mara a bone a robilwe. Gonne Morena ke Modimo wa pusoloso; ruri, o tla busolosa.

⁵⁷ Ke tla tagisa dikgosana tsa gagwe le matlhale a gagwe le balaodi ba gagwe le babusi ba gagwe le bagale ba gagwe gore ba robale thobalo e e sa khutleng, mme ba se ka ba thanya gape.” Go buile jalo yona kgosi e leina la yona e leng Morena wa masomosomo.

⁵⁸ Morena wa masomosomo o bua jaana a re: “Lobota lo lo atlhameng lwa Babele lo tla ribegelediwa ruri; ditswalo tsa lone tse di godimo di tla fisiwa ka molelo. Merafe e itirela tsa lefelafela; ditšhaba di itapisetsa dilo tse di jewang ke molelo.”

Jeremia o romela molaetsa kwa Babele

⁵⁹ Lefoko le moporofeti Jeremia o le laetseng Seraya, morwa Neria, morwa Mahaseya, jale fa Seraya a ya kwa Babele le Setekia, kgosi ya Juta, ka ngwaga wa bone wa puso ya gagwe. Seraya e ne e le mookamedi wa mathibelelo.

⁶⁰ Jeremia o ne a kwala tatlhego yotlhe e e tla welang Babele mo lokwalong, e bong mafoko otlhe ao a a kwadilweng ka ga Babele.

⁶¹ Jaanong Jeremia a raya Seraya a re: “E re o fitlha kwa Babele, o bone ka fa o ka buisang mafoko aotlhe ao ka teng

⁶² o re: ‘Morena, wena o bopetse felo fa go go nyeletsa gore go se ka ga nna monni teng, le fa e le motho gongwe kgomo. Mme e tla nna marope fela ka bosakhutleng.’

⁶³ E re o sena go fetsa go buisa lokwalo loo, o lo bofelele mo letlapeng, o be o lo latlhele mo nokeng ya Ferathe,

⁶⁴ o re: ‘Babele o tla nwela jalo, mme a se ke a tsoge gape ka ntlha ya tatlhego e ke e mo tlisetsang. – Mme ba tla lapa.’ ” Mafoko a ga Jeremia a felela fa.