Yeremie 49 - Setswana 1970

Taelo ya Modimo ka ga Baamone

¹ Ka ga Baamone. Morena o botsa jaana a re: “A Iseraele o tlhoka bana? Gongwe a ga a na moja-boswa? Ke go reng, fa modimo Milekome o ja boswa jwa Bagate; fa morafe wa ona o nna mo metseng ya bone?

² Ka moo itseng gore malatsi a tla tla,” go bua Morena, “a ke tla utlwisang Raba, mošate wa Baamone, mokgosi wa ntwa ka ona, mme o tla fetoga dithotobolo tsa marope. Metsana ya ona e tla šwa ka molelo. Iseraele o tla rua ba ba neng ba ja boswa jwa gagwe.” Morena o buile jalo.

³ “Goa, wena Hešebone, gonne Ai o sentswe! Bokolelang, lona metsana ya Raba, lo apare masela a bohutsana, lo lelele baswi, lo kgarakgatshege mo dipoteng, gonne Milekome o tla ya mo botshwarong mmogo le baperesiti ba gagwe le dikgosana tsa gagwe.

⁴ Ke eng, fa o ikgantsha ka megorogoro, ka mogorogoro wa gago o o humisang, wena morwadi yo o tenegileng, yo o ikanyang matlotlo a gagwe a re: ‘Ke mang yo o tla tlang kwa go nna?’

⁵ Itse gore ke tla dira gore o boife botlhe ba ba mo tikologong ya gago,” go bua Morena, Modimo wa masomosomo. “Mme lo tla lelekelwa, mongwe kwa, yo mongwe kwa gongwe, go se na ope yo o phuthang batshabi.

⁶ “Mme morago ga moo ke tla busa batshwarwi ba Baamone.” Morena o buile jalo.

Ka ga Etomo

⁷ Ka ga Etomo. Morena wa masomosomo o botsa jaana a re: “A ga go tlhole go na le botlhale kwa Themane? Nnyaya! Batlhalefi ba latlhegetswe ke tlhaloganyo. Botlhale jwa bone bo senyegile.

⁸ Lona baagi ba Detane, tshabang lo boele kwa morago, lo nne mo dikgageng; gonne ke tla tlisetsa Esau tatlhego ya gagwe ka sebaka se ke mo otlang ka sona.

⁹ Fa bakgetli ba maungo a moweine ba tla kwa go wena, ga ba kitla ba go tlogelela maronopo; fa magodu a tla bosigo, a tla senya ka fa a ratang ka teng.

¹⁰ Gonne ke nna ka nosi ke tlositseng diphemelo tsa Esau, ka bipolola mahumo a gagwe a a fitlhilweng; ga a kgone go iphitlha. Go sentswe ba losika lwa gagwe le bomorwa-rraagwe le ba ba bapileng nae. Ga a tlhole a le teng.

¹¹ Tlogela masiela a gago, ke tla a phedisa; a batlholagadi ba gago ba inkanye!”

¹² Ee, Morena o bua jaana a re: “Bona, ba bangwe ba na le go nwa senwelo, le fa se sa ba tshwanela. A wena o ka lesiwa, o sa otlwe? Ga o ka ke wa lesiwa fela o sa otlwe. O tshwanetse go nwa.”

¹³ Gonne Morena o buile a re: “Ke ikanne ka nna ka re: ‘Bosera o tla fetoga poitshego le kgobo le sekaka le thogako; metsana yotlhe ya teng e tla nna marope go ya go ile.’ ”

¹⁴ Ke utlwile kitsiso e e tswang mo Moreneng; morongwi o romilwe kwa ditšhabeng a re: “Phuthegang lo tlhasele Etomo, lo bolole go ya tlhabanong.”

¹⁵ “Gonne bona, ke go dirile yo mmotlana mo ditšhabeng le monyatsegi mo bathong.

¹⁶ Poitshego ya gago le boikgantsho jwa pelo ya gago di go tsieditse, wena yo o agileng mo dikgageng tsa mafika, yo o ruileng ditlhoa tsa dithaba. Le fa o aga sentlhaga sa gago kwa godimodimo jaaka ntsu, ke tla go folosa teng,” go bua Morena.

¹⁷ “Etomo o tla nna theregiso; botlhe ba ba fetang teng ba tla rerega, ba sotla ka ga dikotlo tsotlhe tse a otlilweng ka tsona.

¹⁸ O tla tshwana le Sotoma le Gomora le metse ya teng, fa e sena go ribegediwa. Ga go kitla go nna ope teng, ga go kitla go jaka motho gona.” Morena o buile jalo.

¹⁹ “Bonang, tau e tla tlhatlogela kwa lesakeng le le tiileng, e tswa mo sekhung sa Joretane; ke tla ba leleka jalo teng ka tshoganyetso, ke ba laodisa yo ke mo itlhaoletseng. Gonne ke mang yo o tshwanang le nna, ke mang yo o ka ntshekisang! Modisa ke mang yo o ka emelanang le nna?

²⁰ Ka moo utlwang maikaelelo a Morena a o ikaeletseng ka ga Etomo, le dikakanyo tsa gagwe tse o di akantseng ka ga baagi ba Themane: Ruri, ba bannye ba letsomane ba tla gogwa; naga ya bone e tla rerega ka ntlha ya bone.

²¹ Modumo wa go wa ga bone o roromisa lefatshe; dikodu tsa go goa ga bone di utlwala kwa Lewatleng la Motlhaka.

²² Bonang, mmaba o tla bolola, a fofa, a atamela, a tsharolola diphuka tsa gagwe jaaka ntsu godimo ga Bosera. Ka letsatsi leo dipelo tsa bagale ba Etomo di tla tshwana le pelo ya mosadi yo o segwang ke maralalo.”

Ka ga Damaseko

²³ Ka ga Damaseko. “Hamathe le Arephate ba swabile, gonne ba utlwile kitsiso e e bosula; ba nyemile moko, ba tshwenyega jaaka lewatle le le sa itseng go kokobela.

²⁴ Damaseko o feletswe ke thata, a retologa go tshaba. Letshogo la mo wela. Tlalelo le matlhoko tsa mo tshwara jaaka mosadi yo o belegang.

²⁵ Kana motse o o tumileng o tlogetswe jang, ona motse o ke neng ke o itumeletse!

²⁶ Ka moo makau a ona a tla wa mo dipatlelong tsa ona; batlhabani botlhe ba tla nyelediwa ka letsatsi leo.” Morena wa masomosomo o buile jalo.

²⁷ “Mme ke tla tshuba molelo mo loboteng lwa Damaseko gore o nyeletse matlo a borena a ga Benehatate.”

Ka ga Arabia

²⁸ Ka ga Ketare le magosi a Hasore a a neng a fenngwa ke Nebukatenesare, kgosi ya Babele. Morena o bua jaana a re: “Bololang, lo tlhasele Ketare, lo gatelele ba ba kwa botlhabatsatsi.

²⁹ Go tla thopiwa ditente tsa bone le matsomane a bone. Ba tla ba amoga masela le dithoto tsotlhe tsa bone le dikammele tsa bone, ba ba tlhabela mokgosi o o reng: ‘Therego e mo tikologong!’

³⁰ “Lona baagi ba Hasore, tshabang lo ipoloke ka pele, lo iphitlhe kwa tengteng ga dikgaga!” go bua Morena. “Gonne Nebukatenesare, kgosi ya Babele, o ikaeletse go lo tlhasela; o lo logetse maano.”

³¹ Morena o buile a re: “Nanogang lo bololele setšhaba se se ituletseng, se iketlile, se se nnang mo tshireletsong, se se se nang dikgoro le e seng diphemelo, se se agileng se le sosi.

³² “Dikammele ba tla di thukhuthiwa, dikgomo tse dintsi tsa bone di tla thopiwa. Ba ba sekotsweng ditlhogo ke tla ba falaletsa kwa ntlheng tsotlhe, ke ba tlisetsa tatlhego e e tswang mo ditikologong tsotlhe tsa bone.” Morena o buile jalo.

³³ “Hasore o tla fetoga dikutla tsa diphokojwe le sekaka ka bosakhutleng. Ga go kitla go aga ope gona. Ga go kitla go nna motho teng.”

Ka ga Elame

³⁴ Lefoko la Morena ka ga Elame le le tsileng kwa go moporofeti Jeremia mo tshimologong ya puso ya ga Setekia, kgosi ya Juta, la re:

³⁵ Morena wa masomosomo o bua jaana a re: “Itseng gore ke tla roba mara a Baelame a thata ya bone e itshupang gagolo ka ona.

³⁶ Diphefo tse nne tse di tswang mo ntlheng tse nne tsa legodimo ke tla di fokisetsa kwa Elame; le gona ke tla ba falaletsa kwa diphefong tsona tseo gore go se nne setšhaba sepe se se tlhokang bafaladi ba Elame.

³⁷ Baelame ke tla ba nyemisa moko, fa go fitlha baba ba bone, fa go fitlha ba ba ratang go ba bolaya. Ke tla ba tlisetsa tatlhego, e leng bogale jwa me jo bo tukang,” go bua Morena. “Ke tla ba latedisa tšhaka go tsamaya ke ba fedise.

³⁸ Ke tla baya sedulo sa me sa bogosi kwa Elame, ke nyeletsa kgosi le dikgosana tsa teng.” Morena o buile jalo.

³⁹ “Mme e tla re mo malatsing a a tlang ke busetse Elame letlhogonolo la pele.” Morena o buile jalo.