Yeremie 39 - Setswana 1970

Jerusalema a a thopiwa

¹ Nebukatenesare, kgosi ya Babele, o ne a tla kwa Jerusalema le mephato yotlhe ya batlhabani ba gagwe, a dikanyetsa motse ka ntwa, ka ngwaga wa robongwe wa ga Setekia, kgosi ya Juta, mo kgweding ya lesome.

² Mme ba sutlhelela mo teng ga motse ka ngwaga wa 11 wa ga Setekia mo kgweding ya bone, ka letsatsi la robongwe la kgwedi.

³ Dintona tsotlhe tsa kgosi ya Babele tsa tsena, tsa nna mo Kgorong e e mo Gare, e bong Neregale-Saresere le Samgare-Nebo le Saresegime, yo e leng tlhogo ya badiredi ba lapa la kgosi, le Neregale-Saresere, tlhogo ya balepi ba dinaledi, le dikgosana tsotlhe tse dingwe tsa kgosi ya Babele.

⁴ Mme ya re Setekia, kgosi ya Juta, le batlhabani botlhe ba di bona, ba tshaba ba tswa mo motseng bosigo ka tsela e e yang kwa tshimong ya kgosi ka kgoro e e mo gare ga dipota tse pedi, ba tswelela pele ka tsela e e yang kwa lebaleng la Joretane.

⁵ Mme mephato ya Bakalatea ya ba latelela, ya tshwarela Setekia mo dinageng tsa Jerigo; ba mo tshwara, ba mo isa kwa go Nebukatenesare, kgosi ya Babele, kwa Ribela mo lefatsheng la Hamathe, mme ene a mo atlhola.

⁶ Kgosi ya Babele ya bolaya bomorwa Setekia kwa Ribela fa pele ga matlho a gagwe; le gona kgosi ya Babele ya bolaya batlotlegi botlhe ba Bajuta.

⁷ Setekia ene ya mo foufatsa matlho, ya mmofa ka dikeetane tsa kgotlho go mo isa kwa Babele.

⁸ Mme Bakalatea ba fisa ntlo ya kgosi le matlo a morafe ka molelo, ba phoma dipota tsa Jerusalema.

⁹ Masalela a batho ba ba setseng mo motseng le bathobi ba ba thobetseng kwa go ene le masalela a ditswerere, bao ba isiwa kwa Babele mo botshwarong ke Nebusaratane, tlhogo ya bafemedi ba kgosi.

¹⁰ Fela bangwe ba e leng batho fela ba ba se nang sepe, bao Nebusaratane, tlhogo ya bafemedi ba kgosi, a ba sadisa mo lefatsheng la Juta, a ba abela masimo a moweine le masimo ka letsatsi leo.

Jeremia o a gololwa

¹¹ Mme Nebukatenesare, kgosi ya Babele, o ne a laetse Nebusaratane, tlhogo ya bafemedi ba kgosi, ka ga Jeremia a re:

¹² “Mo tsee, o mo tlhokomele, o se ka wa mo direla bosula bope, mme o mo direle jaaka a go bolelela.”

¹³ Jaanong Nebusaratane, tlhogo ya bafemedi ba kgosi, le Nebusasebane, mookamedi wa badiredi ba lapa la kgosi, le Neregale-Saresere, mookamedi wa balepi ba dinaledi, le ba bagolo botlhe ba kgosi ya Babele, ba roma

¹⁴ ba tsaya Jeremia mo lapeng la batlhabani, ba mo neela Ketalea, morwa Ahikame, morwa Safane, gore a mo ntshe, a mo ise kwa gae. Jeremia a nna jalo mo gare ga batho.

Ebete-Melege o solofediwa tshireletso

¹⁵ Le gona Lefoko la Morena le ne le tlile kwa go Jeremia a sa ntse a tswaletswe mo lapeng la batlhabani la re:

¹⁶ “Yaa o ree Ebete-Melege wa Moethiopia o re: ‘Morena wa masomosomo, Modimo wa Iseraele, o bua jaana a re: Bona, ke tla dirafaletsa motse o mafoko a me a a bolelang tatlhego, e seng a a bolelang pholoso, mme go tla dirafala jalo fa pele ga matlho a gago ka letsatsi leo.

¹⁷ Mme wena ke tla go pholosa ka letsatsi leo,’ go bua Morena. ‘Ga o kitla o neelwa mo diatleng tsa banna ba o ba boifang.

¹⁸ Ruri, ke tla go falodisa gore o se ka wa wa ka tšhaka, mme bophelo jwa gago e tla nna thopo e o e bonang, gonne o ikantse nna.’ ” Morena o buile jalo.