Yeremie 13 - Setswana 1970

Moitlamo o tshwantsha botshwaro jwa Bajuta

¹ Morena o ntheile jaana a re: “Yaa o ithekele moitlamo wa lesela, o itlame letheka ka ona, mme o se ka wa o tsenya mo metsing!”

² Ka ya ka reka moitlamo ka fa Lefokong la Morena, ka itlama letheka.

³ Lefoko la Morena la ba la tla kwa go nna la bobedi la re:

⁴ “Tsaya moitlamo o ò o rekileng o o mo lethekeng la gago, ò nanoge ò ye kwa nokeng ya Ferathe, ò o fitlhe teng mo lofarong lwa mafika.”

⁵ Ka ya ka o fitlha kwa Ferathe, jaaka Morena a ntaetse.

⁶ Jaanong ya re malatsi a mantsi a sena go feta, Morena a nthaya a re: “Nanoga o ye kwa nokeng ya Ferathe, o tsee moitlamo teng o ke neng ke go laetse go o fitlha gona.”

⁷ Ka ya kwa nokeng ya Ferathe, ka epolola moitlamo, ka o tsaya felong fa ke neng ke o fitlhile teng, ka fitlhela moitlamo o senyegile, o se na mosola ope.

⁸ Ke fa Lefoko la Morena le tla kwa go nna le re:

⁹ “Morena o bua jaana a re: ‘Ke tla senya boikgodiso jwa Juta le boikgantsho jo bogolo jwa Jerusalema fela jalo.

¹⁰ Batho ba ba bosula ba, ba ba ganang go utlwa lefoko la me, ba ba sepelang ka bopeloethata jwa bone, ba latela medimo e sele, ba e direla, ba e obamela – ba tla nna jaaka moitlamo o, o o se nang mosola ope.

¹¹ Gonne ke ne ke ngapareditse Baiseraele botlhe le Bajuta botlhe mo go nna, jaaka moitlamo o ngaparela mo lethekeng la monna,’ go bua Morena, ‘gore e nne morafe wa me, e nne tumiso le pako le kgalalelo mo go nna, mme ba ganne go utlwa.’

Ka ga meduto ya weine

¹² “Le gona bua lefoko le nabo o re: ‘Morena, Modimo wa Iseraele, o bua jaana a re: Meduto yotlhe e tladiwa weine.’ – Jaanong ba tla go raya ba re: ‘Kana re a itse, fa meduto yotlhe e tladiwa weine!’

¹³ Mme o ba fetole o re: ‘Morena o bua jaana a re: Bonang, ke tla tlatsa baagi botlhe ba lefatshe le, le dikgosi tse di ntseng mo sedulong sa bogosi sa ga Dafita le baperesiti le baporofeti le baagi botlhe ba Jerusalema botagwa.

¹⁴ Mme ke tla ba phatlakanya, mongwe ka yo mongwe, borra-bana le bomorwaa-bone mmogo. Ke tla ba senya, ke sa ba utlwele botlhoko, ke sa ba rekegele, ke sa ba tlhomogele pelo.’ ”

¹⁵ Utlwang, lo sekege ditsebe, mme lo se ka lwa ikgantsha, gonne Morena o buile jalo.

¹⁶ Neelang Morena, Modimo wa lona, tlotlo, a ise a tlise lefifi; dinao tsa lona di ise di kgotšwe mo dithabeng ka lotlatlana. Foo lo tla lebelela lesedi, mme o le fetola moriti wa loso, o le dira lefifi le legolo.

¹⁷ Mme fa lo sa utlwe mafoko a, mowa wa me o tla lelela mo sephiring ka ntlha ya boikgodiso jwa lona; leitlho la me le tla lela mo go botlhoko, le ela dikeledi, ka letsomane la Morena le isiwa mo botshwarong.

¹⁸ Raya kgosi le mma-kgosi o re: “Fologang, lo nneng fa fatshe, gonne serwalo se sentlentle sa lona sa bogosi se wele mo ditlhogong tsa lona.

¹⁹ Metse ya borwa e tswetswe, ga go na yo o e bulang. Juta yotlhe o isitswe mo botshwarong, ba botlhe ba thopilwe.”

²⁰ Jerusalema, tsholetsa matlho, o bone ba ba tswang kwa ntlheng ya bokone! Motlhape o ò o filweng o kae? Letsomane le lentle la gago le kae?

²¹ O tla reng, fa a ba dira barena ba gago ba ò ba tlwaeditseng go nna ditsala tsa gago? A ga ke re, metlotsedi e tla go tshwara jaaka mosadi yo o belegang?

²² Mme fa o ka ipotsa mo pelong o a re: “Ke ka ntlhaang, fa ke dirafaletswe ke tseo?” Ke ka ntlha ya molato o mogolo wa gago, fa o apotswe mosese, fa o gateletswe direthe.

²³ A Moethiopia o ka iphetola mmala, gongwe a nkwe e ka fetola mebalabala ya yona? Fa go re ee, foo le lona ba lo tlwaetseng go senya, lo tla itse go dira tse di molemo.

²⁴ Ka moo ke tla ba falatsa jaaka moko o o gogolwang ke phefo ya sekaka.

²⁵ Ke jona boswa jwa gago; ke yona kabelo e ò e lekanyeditsweng ke nna. Go bua Morena. Gonne o ne o ntebetse, o ikantse maaka.

²⁶ Le nna ke go apola mosese, ke go bipa sefatlhego ka ona gore go bonale ditlhong tsa gago,

²⁷ ke raya tshenyo ya nyalo ya gago le go kua ga gago jaaka pitse e e ikatakang, le boaka jwa gago jo bo tlhabisang ditlhong. Ke bonye maila a gago mo dithabaneng le mo nageng. A tatlhego ya gago wee, Jerusalema! Go tla tsaya sebaka se se kana kang go tsamaya ò itsheke?