Yeremie 12 - Setswana 1970

Ke ka ntlhaang, fa baikepi ba bona letlhogonolo?

¹ Morena, o tshiamo fa ke seka nao. Fela ke batla go go botsa kgang ya tsheko ke re: Ke ka ntlhaang, fa tsela ya baikepi e le letlhogonolo? Fa botlhe ba ba dirang ka bolotsana ba phela ba iketlile?

² O ba tlhomile, ba bile ba namile medi; ba a gola, le gona ba ungwa maungo. O gaufi mo melomong ya bone, mme o kgakala le dipelo tsa bone.

³ Mme wena Morena, o a nkitse, o a mpona; o tlhatlhoba pelo ya me gore e go lebile jang. – Ba swatolele kwa tlhabong jaaka dinku! Ba tlhaolele letsatsi la polao!

⁴ Lefatshe le tla hutsafala le morogo wa naga yotlhe o tla omelela go fitlha leng? Diphedi le dinonyane di nyelela ka ntlha ya bokgopo jwa ba ba agileng mo go lone. Gonne ba re: “Ga a kitla a bona bokhutlo jwa rona.”

⁵ Morena a mo araba a re: “Fa o siana le ba ba tsamayang ka maoto, ba a go lapisa. Jaanong o ka phadisanya jang le dipitse? Fa o sa iketle mo lefatsheng la kagiso, o tla dira eng mo sekgweng se segolo sa Joretane?

⁶ Ee, bomorwa-rraago le ba ntlo ya ga rraago le bone ba go diretse ka bolotsana. Le bone ba a go kgoba, o sena go ba hularela. O se ka wa ba ikanya, le fa ba bua tse di molemo nao!”

Selelo sa Modimo

⁷ “Ke tlogetse Ntlo ya me, ka tlhoboga boswa jwa me; moratiwa wa mowa wa me ka mo neela mo diatleng tsa baba ba gagwe.

⁸ Boswa jwa me bo mphetogetse tau e e mo sekgweng e e mpôpelang; ka moo ka bo tlhoa.

⁹ A boswa jwa me ke morubisi o o mebalabala o bomankgodi ba o tlhaselang go tswa ntlheng tsotlhe? Tlayang lo kgobokanye dibata tsotlhe tsa naga! A di tle dijong!

¹⁰ Badisa ba bantsi ba sentse tshimo ya me ya moweine; ba gatakile boswa jwa me, ba tubaka tshimo e ke e itumelelang;

¹¹ ba e fetola sekaka. E a nkhutsafalela e le senya. Lefatshe lotlhe le ntshitswe sekaka, gonne ga go na ope yo o tsibogang pelo.

¹² Basenyi ba fitlhile mo dithabaneng tsotlhe se di iphotlhereng tsa naga. Gonne tšhaka ya Morena e ntse e ja lefatshe lotlhe, go tswa mo ntlheng e nngwe go ya mo ntlheng e nngwe, go se na motho ope yo o leng mo kagisong.

¹³ Ba jwetse mabele, ba roba mitlwa. Ba itapisitse, mme go sa ba thuse sepe. Tlhajwang ke ditlhong ka kotulo ya lona ka ntlha ya bogale jo bo tukang jwa Morena.”

Mafoko a Modimo ka ga merafe e e bapileng le Baiseraele

¹⁴ Morena o buile jaana a re: “Merafe yotlhe e e bapileng le nna e e bosula e e amang boswa jo ke bo abetseng Iseraele, morafe wa me, bonang, ke tla e kumola mo dinageng tsa yona, le Bajuta ke tla ba kumola mo gare ga yona.

¹⁵ Mme e tla re ke sena go e kumola, ke e tlhomogele pelo gape, ke e busetse, mongwe le mongwe kwa bosweng jwa ona le mongwe le mongwe kwa lefatsheng la ona.

¹⁶ Mme e tla re fa ba ithuta ditsela tsa morafe wa me tota gore ba ikane ka leina la me ba re: ‘Ka bophelo jwa Morena!’ jaaka ba rutile morafe wa me go ikana ka Baale, foo ba tla agisiwa mo gare ga morafe wa me.

¹⁷ Mme fa ba gana go utlwa, morafe o o ntseng jalo ke tla o kumolela ruri, ke o nyeletsa.” Morena o buile jalo.