Sekarie 1 - Setswana 1970

Sagaria o biletsa Bajuta tlhabologong

¹ Ka ngwaga wa bobedi wa ga Dario, ka kgwedi ya borobedi, Lefoko la Morena la tla kwa go moporofeti Sagaria, morwa Beregia, morwa Ito, la re:

² “Morena o ne a galefetse borraeno thata.

³ Jaanong o ba ree o re: ‘Morena wa masomosomo o bua jaana a re: Boelang kwa go nna,’ go bua Morena wa masomosomo, ‘foo ke tla boela kwa go lona,’ go bua Morena wa masomosomo.

⁴ ‘Se tshwaneng le borraeno ba baporofeti ba pele ba neng ba ba rerela ba re: Morena wa masomosomo o bua jaana a re: Boang tlhe mo ditseleng tsa lona tse di bosula le mo ditirong tsa lona tse di bosula, mme ga ba a ka ba utlwa, ga ba a ka ba ntheetsa,’ go bua Morena.

⁵ ‘Borraeno ba kae? Le baporofeti a ba ka phela ka go sa feleng?

⁶ Mme mafoko a me le melao ya me e ke e laetseng baporofeti, batlhanka ba me, a ga e a fitlhela borraeno? mo ba bileng ba sokologa ba re: Tse Morena o neng a ikaeletse go di re direla o di re diretse ka fa go siametseng ditsela tsa rona le ditiro tsa rona ka teng.’ ”

Pono ya ntlha: Dipitse

⁷ E rile ka ngwaga wa bobedi wa ga Dario, ka kgwedi ya 11 – e bong kgwedi ya Sebate – ka letsatsi la 24, Lefoko la Morena la tla kwa go moporofeti Sagaria, morwa Beregia, morwa Ito, jaana:

⁸ Ke ne ka bona pono bosigo, ka bona monna a palame pitse e khunou, a eme mo gare ga metlhakolane kwa tlase; fa morago ga gagwe go le dipitse tse dikhunou le tse dithokwa le tse ditshweu.

⁹ Ka botsa ka re: “Ke bomang ba, Morena wa me?” Moengele yo o buang le nna a nthaya a re: “Ke tla go supetsa gore ke bomang.”

¹⁰ Ke fa monna yole yo o emeng mo gare ga metlhakolane a araba a re: “Ke ba Morena o ba romileng go ralala lefatshe.”

¹¹ Mme bone ba raya moengele wa Morena yo o neng a eme mo gare ga metlhakolane ba re: “Re tswa go ralala lefatshe, ra fitlhela lefatshe lotlhe le ntse le iketlile, le le mo kagisong.”

¹² Ke fa moengele wa Morena a bua a re: “Morena wa masomosomo, e tla nna go fitlha leng o ntse o sa utlwele Jerusalema le metse ya Juta botlhoko e o ntseng o e galefetse dinyaga tse di 70 tse?”

¹³ Mme Morena a araba moengele yo o buang le nna ka mafoko a a molemo, ka mafoko a a gomotsang.

¹⁴ Ke fa moengele yo o buang le nna a nthaya a re: “Rera o re: ‘Morena wa masomosomo o bua jaana a re: Ke fufegetse Jerusalema le Sione ka lefufa le legolo.

¹⁵ Ditšhaba tse di ikgantshang ke di galefetse ka bogale jo bogolo; gonne ke ne ke galefile go le gonnye fela, mme bone ba ne ba oketsa bosula.’

¹⁶ Ke ka moo Morena o buang jaana a re: ‘Ke boetse kwa Jerusalema ka kutlwelo-botlhoko; Ntlo ya me e tla agiwa teng, go bua Morena wa masomosomo, le mogala wa baagi o tla gagamadiwa godimo ga Jerusalema.’

¹⁷ “Le gona o rere o re: ‘Morena wa masomosomo o bua jaana a re: Metse ya me e tla tlala tse di molemo gape. Morena o tla boa a gomotsa Sione, a itlhaolela Jerusalema gape.’ ”

Pono ya bobedi: Dinaka le bathudi

¹⁸ Ka ba ka tsholetsa matlho, ka leba, ka bona dinaka di le nne.

¹⁹ Ka raya moengele yo o buang le nna ka re: “Tseo ke eng?” A nthaya a re: “Ke dinaka tse di faladitseng Juta le Iseraele le Jerusalema.”

²⁰ Ke fa Morena a mpontsha bathudi ba le bane.

²¹ Ka ba ka re: “Bao ba tlile go dirang?” Ene a re: “Ke tsona dinaka tse di faladitseng Juta, mo go seng ope yo o ka tsholetsang tlhogo, mme bao ba tsile go di tshosa le go digela dinaka tse e leng ditšhaba fa fatshe tse di neng di tsholeleditse lefatshe la Juta lonaka go le falatsa.”