Sehela 7 - Setswana 1970

Monna

¹ A bontle jwa dinao tsa gago, di rwele ditlhako, wena morwadia motlotlegi! Sebopego sa letheka la gago se tshwana le mhiri wa molala o o dirilweng ke diatla tsa setswerere.

² Mpa ya gago ke mogotšwana o o potokwane; a go se tlhokafale weine e e tlhakantsweng! Mmele wa gago ke mokoa wa mabele o o dikanyeditsweng ke dithunya.

³ Mabele a mabedi a gago a tshwana le ditshetshwana tse pedi tsa mafatlha.

⁴ Molala wa gago o tshwana le turio ya dinaka tsa tlou; matlho a gago a tshwana le madiba a a kwa Hešebone fa kgorong ya Bathe-Rabime. Nko ya gago e tshwana le turio ya Lebanone e e lebileng kwa Damaseko.

⁵ Tlhogo ya gago mo go wena e tshwana le dithaba tsa Karemele. Moriri wa tlhogo ya gago o o itshophileng o tshwana le lesela le lehibidu. Kgosi e golegilwe ka moriri o o tshophilweng.

⁶ O montle jang ne, o ratega jang ne, wena moratiwa yo o tletseng monate!

⁷ Seemo sa mmele wa gago se tshwana le sa mokolane; mabele a gago a tshwana le masitlha a moweine.

⁸ Ka re, ke tla palama mokolane, ke tshwara maungo a ona. A mabele a gago a nne jaaka masitlha a moweine le monko wa nko ya gago jaaka diapole!

⁹ A molomo wa gago o nne jaaka weine e e monate e e balolang mo leganong la me sentle, e e nkolobisang molomo le meno.

Mosadi

¹⁰ Ke wa morati wa me; ke nna yo a ntlhologeletsweng.

¹¹ Tlaya, morati wa me, re tswele kwa nageng, re lale mo gare ga dithunya!

¹² A re phakele, re ye kwa masimong a moweine, re bone gore a moweine o tlhogile, a dithunya tsa ona di phanyegile, a digaranata di a thunya. Ke tla go naya lorato lwa me gona.

¹³ Maungo a meratiso a ntsha monko. Fa mojakong wa rona go na le maungo a a monate a monongwaga le a ngogola. Morati wa me, ke a go boloketse.