Sehela 4 - Setswana 1970

Monna

¹ Ruri, o montle, moratiwa wa me, ruri, o montle. Matlho a gago a tshwana le maeba mo teng ga lesire la gago. Moriri wa gago o tshwana le letsomane la dipodi tse di fologang mo dithabeng tsa Gileate.

² Meno a gago a tshwana le letsomane la dinku tse di beotsweng tse di tswang kwa tlhapisong tse nngwe le nngwe ya tsona e nang le dikwana tsa mafatlha, go se na moreba ope.

³ Molomo wa gago o tshwana le seitlamo se se phatsimang ka bohibidu, puo ya gago e a ratega. Marama a gago mo teng ga lesire la gago a tshwana le maungo a garanata a a fatotsweng.

⁴ Molala wa gago o tshwana le lonaka lwa ntlo ya ga Dafita e e agetsweng go boloka dibolai, kwa dithebe di le sekete di pegilweng teng le dibolai tsotlhe tsa bagale.

⁵ Mabele a mabedi a gago a tshwana le ditshetshwana tse pedi tsa mafatlha tse di fulang mo gare ga dithunya.

⁶ E tla re letsatsi le ise le nne marutshwana le meriti e ise e tshabe, ke ye kwa thabeng ya mera le kwa thoteng ya maswalo.

⁷ Moratiwa wa me, o montle gotlhe. Ga go na sebala mo go wena.

⁸ Tlaya re tloge mo Lebanone, monyalwa. Tlaya re tloge mo Lebanone. Fologa mo setlhoeng sa Amana le mo setlhoeng sa Senire le sa Heremone, o tlogele marobalo a ditau le dithaba tsa dinkwe.

⁹ O nkgapile pelo, kgaitsadiaka, monyalwa; o nkgapile pelo ka tebo e le nngwe ya matlho a gago le ka sebaga se le sengwe sa mokgabo wa molala wa gago.

¹⁰ Kgaitsadiaka, monyalwa, lorato lwa gago lo lontle jang ne! Lo phala weine. Monko wa ditlolo tsa gago o gaisa makga aotlhe.

¹¹ Molomo wa gago, monyalwa, o rotha mafura a dinotshe; dinotshe le mašwi di ka fa tlase ga loleme lwa gago. Monko wa diaparo tsa gago o tshwana le monko wa Lebanone.

¹² Kgaitsadiaka, monyalwa, o tshimo e e ageletsweng, o sediba se se tswaletsweng, o motswedi o o kannweng.

¹³ Tse di tlhogileng mo go wena ke tshimo ya digaranata ya maungo a a monatenate le dithunya le ditlhatshana tsa monkgo o o monate.

¹⁴ E tletse ditlhatshana tsa mefutafuta tsa ditlolo le ditswaiso le maswalo le makga.

Mosadi

¹⁵ O motswedi wa masimo le sediba sa metsi a a phelang a a tswang kwa Lebanone.

¹⁶ Tsoga, phefo ya bokone; tlaya phefo ya borwa, o fokele tshimo ya me gore makga a monate a yona a aname. A morati wa me a tle mo tshimong ya gagwe, a je maungo a a monatenate a yona.