Sehela 3 - Setswana 1970

¹ Fa ke le bolaong bosigo, ke tlhologeletswe yo pelo ya me e mo ratang; ke mo tlhologeletswe, mme ga ke mmone.

² Ka re: “A ke tsoge, ke senke mo motseng kwa le kwa mo mebileng le mo dipatlelong; ke batle ene yo pelo ya me e mo ratang;” ka mmatla, ka se ka ka mmona.

³ Ka bonwa ke badisa ba motse ba ba tsamayang mo motseng. Ka re: “A lo mmonye yo pelo ya me e mo ratang?”

⁴ Ya re ke sena go ba feta go le gonnye, ka mo fitlhela ene yo pelo ya me e mo ratang; ka mo tshwara, ka se ka ka mo lesa ka ba ka mo isa kwa ntlong ya ga mme, mo ntlwaneng ya yo o mpelegeng.

⁵ Lona bomorwadia Jerusalema, ke lo ikanisa ka ditshephe gongwe ka ditholo ka re: Lo se ka lwa tsosa lorato le e seng go lo tsibosa go fitlhelela lone lo itsose ka losi.

Sefela sa boraro Mosadi

⁶ Ke mang yo o tlhagang kwa sekakeng jaaka dipinagare tsa musi, a nkgisitswe monate ka mera le maswalo le ka ditlolo tsa mefutafuta tsa morekisi?

⁷ Bonang, ke sedulo se se tsholediwang sa ga Salomo se dikanyeditswe ke banna ba le soma marataro ba bagale ba Iseraele.

⁸ Botlhe ba tshwere ditšhaka, ba tlwaetse tlhabano. Mongwe le mongwe a ipofeletse tšhaka mo lethekeng ka ntlha ya ditherego tsa bosigo.

⁹ Kgosi Salomo o ne a itirela sedulo se se sikarwang ka dikgong tsa Lebanone.

¹⁰ A dira maoto a sona ka selefera le moikaego wa sona ka gouta le manno a sona ka masela a mantle a mahibidu; bogare jwa sona bo kgabisitswe sentle, e le tiro ya lorato lwa bomorwadia Jerusalema.

¹¹ Lona bomorwadia Sione, tswayang lo bone kgosi Salomo a rwele serwalo sa bogosi se a se rwesitsweng ke mmaagwe ka letsatsi la lenyalo la gagwe, ka letsatsi la boitumelo jwa pelo ya gagwe.