Sehela 2 - Setswana 1970

¹ Ke nna sešeše sa Sarone, ke sethunya sa mekgatsha.

Monna

² Fa moratiwa wa me a le mo gare ga basetsana, o tshwana le sethunya se se mo gare ga mitlwa.

Mosadi

³ Fa morati wa me a le mo gare ga makau, o tshwana le setlhare sa apole se se mo ditlhareng tsa sekgwa. Ke eletsa go nna mo moriting wa sona; leungo la sona le monate mo leganong la me.

⁴ O nkisitse mo ntlong ya weine; sefoka sa gagwe godimo ga me ke lorato.

⁵ Ntiiseng ka dinkgwe tsa maungo a moweine; ntapoloseng ka diapole, gonne ke lwadiwa ke lorato.

⁶ Letsogo la gagwe la molema le ntshameditse; le le jang la gagwe le a ntlamparela.

⁷ Lona bomorwadia Jerusalema, ke lo ikanisa ka ditshephe gongwe ka ditholo tsa naga ka re: Lo se ka lwa tsosa lorato le e seng go lo tsibosa, go fitlhelela lone lo itsose ka losi.

Sefela sa bobedi Mosadi

⁸ Utlwelela! Morati wa me ke yole, o e tla, a tlola mo dithabeng, a kalapa mo mebotong.

⁹ Morati wa me o tshwana le tshephe gongwe le namane ya ditholo. Bonang, ke yole. O eme ka fa morago ga lorako lwa rona. O okomela ka fenstere, o tlhola ka diphatlhana.

¹⁰ Morati wa me o simolola go bua, o nthaya a re: “Nanoga, moratiwa wa me, wena yo montle wa me, tlaya he!

Monna

¹¹ Gonne bona, mariga a fetile, pula e khutlile e ile.

¹² Dithunya di bonala mo lefatsheng, sebaka sa difela se fitlhile; go lela ga leeba go utlwala mo lefatsheng la rona.

¹³ Setlhare sa feie se budusa maungo a sona; ditlhare tsa moweine di a thunya, di ntsha monko. Nanoga tlhe, moratiwa wa me, wena yo montle wa me, tlaya he!

¹⁴ Wena leebana la me, o mo dipharong tsa mafika le mo maiphitlhong a mapalamo a dithaba. Nte ke bone bontle jwa gago, nte ke utlwe lentswe la gago. Gonne lentswe la gago le monate, le bontle jwa gago bo a ratega.

¹⁵ Re tshwareleng diphokojwe, diphokojwane tse di senyang masimo a moweine, jaanong ka masimo a moweine a rona a thunya.”

Mosadi

¹⁶ Morati wa me ke wa me, mme nna ke wa gagwe yo o fudisang mo gare ga dithunya.

¹⁷ E re letsatsi le ise le nne marutshwana le meriti e ise e tshabe, o boe, morati wa me, o tshwane le tshephe gongwe le namane ya tholo mo dithabeng tse di ditlhoatlhoa.