Sehela 1 - Setswana 1970

Sefela sa ntlha Mafoko a mosadi

¹ Sefela sa Difela sa ga Salomo.

² A a nkatle ka dikatlo tsa molomo wa gagwe! Ee, lorato lwa gago lo monate bogolo go weine.

³ Monko wa ditlolo tsa gago o monate. Leina la gago le tshwana le setlolo se itshetsweng. Ke ka moo makgarebe a go ratang.

⁴ Nkgoge, ke go sale morago, a re siane! A kgosi e nkise mo matlwaneng a yona. Re tla duduetsa, re go itumelela, re boka lorato lwa gago bogolo go weine. Makgarebe a go rata ka tshwanelo.

⁵ Lona bomorwadia Jerusalema, ke morokwa, mme ke montle jaaka ditente tsa Ketare, jaaka masire a ga Salomo.

⁶ Se ntebeng ka ke le morokwa! Kana letsatsi le mphisitse. Bokgaitsadiake ba ne ba nkgakaletse, ba nthoma go leta masimo a moweine. Mme tshimo ya me ya moweine ga ke a e disa.

⁷ Wena yo pelo ya me e go ratang, mpolelele gore o fudisa kae, o bothisa kae motshegare? Gonne ke ka ntlha ya eng fa nka nna moiphitlhi mo matlhapeng a balekane ba gago?

Mafoko a monna

⁸ Fa o sa itse, wena yo montlentle mo basading, tswaya o latele metlhala ya dinku o fudise dipotsane tsa gago kwa mekgorong ya badisa.

⁹ Moratiwa wa me, ke go tshwantshanya le pitse nngwe ya tse di gogang dikoloi tsa ga Farao.

¹⁰ Marama a gago a mantle ka mokgabo wa dikeetane le molala wa gago ka dibaga.

¹¹ Re tla go direla dikeetane tsa gouta tse di nang le dikgotlhwana tsa selefera.

Mosadi

¹² Ya re kgosi e ntse e le fa dijong, setlolo sa me sa utlwatsa monko wa sona.

¹³ Morati wa me ke kgetsana ya mera mo go nna e e lalang fa gare ga mabele a me!

¹⁴ Morati wa me ke dithunya tse di nkgang monate mo go nna tse di mo masimong a moweine a Engedi.

Monna

¹⁵ Ruri, o montle, moratiwa wa me! Ruri, o montle. Matlho a gago a tshwana le a maeba.

Mosadi

¹⁶ Ruri, o montle, morati wa me! Ee, o a ratega; bolao jwa rona bo mo botaleng.

¹⁷ Ditlhomeso tsa ntlo ya rona ke mesetere; kapeso ya dipota tsa rona ke mesiperese.