Obadie 1 - Setswana 1970

Petso e e lebanyeng Baetomo

¹ Pono ya ga Obatya. Morena Modimo o bua jaana ka ga Etomo a re: Re begetswe ke Morena ga twe: Morongwi o romilwe kwa ditšhabeng a re: “Nanogang, a re bololeng go tlhabana nae!”

² “Bona, ke go dirile yo monnye mo ditšhabeng, o a nyatsega thata.

³ Boikgogomoso jwa pelo ya gago bo go tsieditse, wena yo o agileng mo dikgageng tsa mafika, yo o nnang mo mafelong a a kwa godimo, yo o buang mo pelong ya gago o re: ‘Ke mang yo o ka ntigelang fa fatshe?’

⁴ Le fa o dira sentlhaga sa gago kwa godimodimo jaaka ntsu; le fa e le se se tlhomilweng mo gare ga dinaledi, ke tla go folosa teng,” go bua Morena.

⁵ “Fa magodu a tla kwa go wena, le fa e le dinokwane bosigo – kana o nyalediwa jang! – ga ke re, ba tla utswa ka fa go ba lekanyeng ka teng? Fa bafudi ba maungo a moweine ba tla kwa go wena, ga ke re, ba tla tlogela maronopo?

⁶ Kana ba fukutsa Esau jang, ba batla mahumo a gagwe a a fitlhilweng!

⁷ Banna botlhe ba ba ikopantseng nao ba go buseditse kwa molelwaneng; banna ba o tsalanyeng nabo ba go tsieditse, ba go gatelela, ba go beela seru fa tlase ga gago boemong jwa go go naya dijo tsa gago. Mme Esau ga a lemoge sepe.

⁸ “A ga nkitla ke fedisa matlhale mo go Etomo le tlhaloganyo mo dithabeng tsa ga Esau ka letsatsi leo?” go botsa Morena.

⁹ “Wena motse wa Themane, bagale ba gago ba tla bo ba nyemile moko gore mongwe le mongwe a bolawe mo dithabeng tsa ga Esau ka polao e e setlhogo.

Mabaka a petso ya Baetomo

¹⁰ “Ditlhong di tla go khurumetsa, o nyelediwa ka go sa feleng ka ntlha ya go gatelela Jakobe monnao.

¹¹ E rile ka letsatsi lele, fa o ne o eme kwa thoko; ka letsatsi lele, fa baeng ba ne ba tlosa batlhabani ba gagwe e le batshwarwi; fa ba ditšhaba di sele ba ne ba tsena mo dikgorong tsa gagwe, ba tlhamela Jerusalema tengwa, le wena wa bo o le jaaka mongwe wa bone.

¹² Kana o ne o sa tshwanela go leba letsatsi la tatlhego ya ga monnao ka boitumelo; o ne o sa tshwanela go itumela ka letsatsi la nyelelo ya bana ba Juta; o ne o sa tshwanela go ikgantsha ka letsatsi la pitlagano.

¹³ O ne o sa tshwanela go tsena mo kgorong ya morafe wa me ka letsatsi le ba neng ba le mo bothateng ka lone; wena o ne o sa tshwanela go leba botlhoko jo bo ba dirafalelang ka kgatlhego ka letsatsi la tlalelo ya bone; o ne o sa tshwanela go thopa lehumo la bone ka letsatsi la tlalelo ya bona.

¹⁴ O ne o sa tshwanela go ema, fa ditsela di kgabaganyang teng go bolaya ba ba falotseng ba bone; o ne o sa tshwanela go neela baba bafalodi ba bone ka letsatsi la pitlagano.

Modimo o tla atlhola ditšhaba

¹⁵ “Gonne letsatsi la Morena la go atlhola ditšhaba tsotlhe le gaufi: O tla direlwa jaaka o dirile, tiro ya gago e tla boela mo tlhogong ya gago.

¹⁶ Gonne ditšhaba tsotlhe di tla nwa ka gale, jaaka lo nwele mo thabeng e e boitshepo ya me; di tla nwa, di minolosa gore di be di nne jaaka ekete ga di ise di ke di nne teng.

Phenyo ya Baiseraele

¹⁷ “Mme mo thabeng ya Sione go tla nna pholoso, Sione e tla nna felo fa go boitshepo, mme ba ntlo ya Jakobe ba tla rua boswa jwa bone.

¹⁸ Foo ba ntlo ya Jakobe ba tla nna molelo, ba ntlo ya Josefa ba nne kgabo, mme ba ntlo ya Esau ba tla nna dirite: Ba tla tshujwa, ba jewa ka bone, go se ke go nne masalela a ba ntlo ya Esau,” gonne Morena o buile jalo.

¹⁹ “Ba ntlheng ya borwa ba tla rua dithaba tsa Esau, ba naga e e kwa tlase ba rua naga ya Bafelesita; ba ba mo dithabeng ba tla rua naga ya Eferaime le ya Samaria, Babenyamene ba rua Gileate.

²⁰ Mme batshwarwi ba mophato o wa Baiseraele ba tla thopa naga ya Bakanana go fitlha kwa Sarefathe; batshwarwi ba Jerusalema ba ba kwa Sefarada, ba tla rua metse e e kwa borwa.

²¹ Mme bapholosi ba tla tlhatlogela mo thabeng ya Sione, gore ba buse dithaba tsa Esau, mme bogosi e tla nna jwa Morena.”