Nehemie 6 - Setswana 1970

Maano a baba a go direla Nehemia bosula

¹ E rile Sanebalate le Tobia le Geseme wa Moarabia le baba ba bangwe ba rona ba utlwela, fa ke agile lobota, e bile go sa tlhole go le phatlha mo go lone, le fa go fitlha sebakeng seo ke ne ke ise ke tsenye ditswalo mo dikgorong,

² Sanebalate le Geseme ba roma motho go nna ba re: “Tlaa re kopaneng mo go mongwe wa metsana mo lobaleng lwa Ono.” Mme ba ne ba logile maano go ntirela bosula.

³ Mme ka roma barongwi kwa go bone ka re: “Ke tshwere tiro e kgolo; ke ka moo ke palelwang ke go tla. Kana tiro e tla ema, fa nka e tlogela, ka tla koo go lona!”

⁴ Ba boelela gane, ba roma motho kwa go nna ka mokgwa oo, ka nna ka ba fetola fela jalo.

⁵ Sanebalate a ba a roma motlhanka wa gagwe la botlhano go nna ka mokgwa oo, a tla a tshotse lokwalo lo lo sa tswalwang.

⁶ Go ne go kwadilwe mo go lone ga twe: “Go utlwetse mo ditšhabeng, mme Geseme o bua jalo gore wena le Bajuta lo ikaeletse go rukhutlha. Ke ka moo o agang lobota, mme wena o tla nna kgosi ya bone. Dipolelo tsa re jalo.”

⁷ Go bile go twe: “O tlhomile baporofeti gore ba tlhabe mokgosi ka ga gago kwa Jerusalema o o reng: ‘Kgosi ya Juta ke yo!’ Jaanong he, dipolelo tse di ntseng jalo di tla utlwala kwa kgosing. Ka moo tlaya, re gakololane mmogo.”

⁸ Ka ba ka roma motho kwa go ene ka re: “Ga go a dirafala sepe sa dilo tse di ntseng jalo tse o di bolelang, mme o di ikgopoletse fela di tswa mo pelong ya gago.”

⁹ Kana bone botlhe ba ne ba rata go re boifisa ba re, mabogo a rona a tla repa, re tlogela tiro gore e se ka ya fediwa. “Mme jaanong Modimo, tiisa mabogo a me!”

¹⁰ Letsatsi le lengwe ya re ke tsena mo ntlong ya ga Semaya, morwa Delaya morwa Mehetabele, ene a sa ntse a thibetswe, a nthaya a re: “A re utlwane re ye kwa Ntlong ya Modimo, re tsene mo Tempeleng, re tswale ditswalo tsa Tempele; gonne ba tla tla go go bolaya, ba tla go go bolaya bosigo.”

¹¹ Mme ka re: “A monna jaaka nna o ka tshaba? Ke mang yo o tshwanang le nna yo o ka tsenang mo Tempeleng, a phela? Ga ke tsene.”

¹² Ka re jalo, ka ke ne ke lemoga sentle gore ga se Modimo o o mo romileng, mme o ne a bua jaaka moporofeti ka ga me, ka Tobia le Sanebalate ba ne ba mo rapile ka tuelo.

¹³ Se a se rapetsweng e le gore ke boife, ke dire jalo ke leofe; mme foo e tle e nne tumedi e e bosula mo go bone gore ba tle ba nkgobe.

¹⁴ “Modimo wa me, gopola Tobia le Sanebalate ka fa ditirong tseo tsa bone; le gona o gopole Noatya moporofeti wa sesadi le baporofeti ba bangwe ba ba neng ba rata go mpoifisa.”

Baagi ba feditse go aga lobota

¹⁵ Mme lobota lwa fediwa ka kgwedi ya Elole a le 25, re agile malatsi a le 52.

¹⁶ E rile baba botlhe ba rona ba utlwa jalo, ba boifa le ditšhaba tsotlhe tse di mo tikologong ya rona tsa nyema moko thata, tsa lemoga gore tiro eo e dirilwe ka thuso ya Modimo wa rona.

¹⁷ Le gona ka metlha eo batlotlegi ba Juta ba kwalelana dikwalo tse dintsi le Tobia.

¹⁸ Gonne ba bantsi mo Juta ba ne ba mo ineetse ka maikano, ka ene e le mongwe wa ga Seganya, morwa Ara, le ka Johanane morwawe a nyetse morwadia Mesulame, morwa Beregia.

¹⁹ Le gona ba bolela tse di molemo ka ga gagwe fa pele ga me, ba mo sebela mafoko a me. Tobia ene a nthomela dikwalo go mpoifisa.