Nehemie 10 - Setswana 1970

¹ Mo dikwalong tsa mafoko a a kannweng go ne ga ikwala: Nehemia, mookamedi, morwa Hagalea, le Setekia

² le Seraya le Asaria le Jeremia

³ le Phašure le Amaria le Malekhia

⁴ le Hatuse le Sebanya le Maloge

⁵ le Harime le Meremothe le Obatya

⁶ le Daniele le Kinethone le Baruge

⁷ le Mesulame le Abia le Miyamine

⁸ le Maasia le Bilekai le Semaya; ke bone baperesiti.

⁹ Balefi ke ba: Jesua, morwa Asaniya, le Binui wa bomorwa Henatate le Katemiele

¹⁰ le ba ga bone, e bong Sebanya le Hodiya le Keleta le Phelaya le Hanane

¹¹ le Miga le Rehobe le Hasabja

¹² le Sakhure le Serebja le Sebanya

¹³ le Hodiya le Bani le Beninu.

¹⁴ Ditlhogo tsa morafe ke tse: Pharoše le Phahathe-Moabe le Elame le Sathu le Bani

¹⁵ le Buni le Asekate le Bebai

¹⁶ le Atonia le Bigwai le Adine

¹⁷ le Atere le Hesekia le Asure

¹⁸ le Hodiya le Hasume le Besai

¹⁹ le Harife le Anathothe le Nobai

²⁰ le Magephiase le Mesulame le Hesire

²¹ le Mešesabele le Satoke le Jadua

²² le Phelatya le Hanane le Anaya

²³ le Hosea le Hananya le Hašube

²⁴ le Halohese le Phileha le Sobeke

²⁵ le Rehume le Hasabena le Maaseya

²⁶ le Ahia le Hanane le Anane

²⁷ le Maloge le Harime le Baana.

Kutlwano

²⁸ Le ba bangwe ba morafe le ba baperesiti le Balefi le badisa ba kgoro le baopedi le batlhanka ba Tempele le botlhe ba ba neng ba itomologantse le merafe ya mafatshe go ineela molaong wa Modimo le basadi ba bone le bomorwaa-bone le bomorwadia-bone, botlhe ba ba nang le kitso le tlhaloganyo

²⁹ ba ikopanya le batlotlegi ba ga bone, ba ipofa ka khutso le ka maikano go sepela ka fa molaong wa Modimo, o o beilweng ka Moše, motlhanka wa Modimo, go tshegetsa le go dirafatsa ditaolo tsotlhe tsa Morena, Morena wa rona, mmogo le ditshiamelo tsa gagwe le melao ya gagwe.

³⁰ Ra ba ra re: “Ga re kitla re naya ba merafe ya lefatshe bomorwadia-rona le e seng go tseisa bomorwaa-rona bomorwadia-bone.

³¹ “Le gona fa ba merafe ya lefatshe ba tlisa tsa go bapatsa le mabele a mefutafuta ka letsatsi la Sabata go di rekisa, ga re kitla re reka mo go bone ka Sabata gongwe ka letsatsi le lengwe le le boitshepo. Gape ka ngwaga wa bosupa re tla ikhutsisa masimo, re sa lefise molato ope.”

³² Le gona ra ipeela molao wa go re: “Re tla ntshetsa tirelo ya Ntlo ya Modimo wa rona karolo ya boraro ya šekele ka ngwaga:

³³ “Re e ntshetsa dinkgwe tsa tshupo le tshupelo ya ka metlha le setlhabelo sa phiso sa ka metlha le ditlhabelo tsa boSabata le tsa dingwedi tse di rogilweng le tsa meletlo ya ngwaga le dilo tse di boitshepo le ditlhabelo tsa boleo tsa go batlela Baiseraele boitshwarelo le tiro yotlhe ya Ntlo ya Modimo wa rona.

³⁴ “Rona baperesiti le Balefi le morafe ra tlhama ditengwa ka ga go tlisa dikgong gore dikgoro tsa rona di fapaanele go di tlisa kwa Ntlong ya Modimo wa rona ka dipaka tse di beilweng ka ngwaga le ngwaga, e le go tukisa molelo mo aletareng ya Morena, Modimo wa rona, jaaka go kwadilwe mo molaong.”

³⁵ Gape ra re: “Re tla tlisa mabutswapele a masimo a rona le mabutswapele a ditlhare tsotlhe tse di ungwang, re a isa kwa Ntlong ya Morena ka ngwaga le ngwaga;

³⁶ le bomorwaa-rona ba ba tsetsweng pele le maitibolo a diruiwa tsa rona jaaka go kwadilwe mo molaong; mme maitibolo a dikgomo tsa rona le a difutshane tsa rona re tla a isa kwa Ntlong ya Modimo wa rona go nna a baperesiti ba ba direlang mo Ntlong ya Modimo wa rona.

³⁷ “Le gona re tla tlisetsa baperesiti makgetho a rona le bupe jwa mabutswapele a garase le mabutswapele a maungo a ditlhare tsa mefutafuta le a matute a moweine le a lookwane, re a isa kwa matlwaneng a Ntlo ya Modimo wa rona; re tla neela Balefi karolo ya lesome ya thobo ya masimo a rona, bone Balefi ba ba phuthang karolo ya lesome mo metseng yotlhe ya rona ya balemi.

³⁸ Mme a moperesiti oora Arone a tsamae le Balefi, fa ba phutha karolo ya lesome. Mme a Balefi ba ise karolo ya lesome ya dikarolo tsa lesome kwa Ntlong ya Modimo wa rona kwa matlwaneng a ntlo ya polokelo.

³⁹ Gonne Baiseraele le Balefi ba tshwanetse go isa lekgetho la mabele le la matute a moweine le la lookwane kwa matlwaneng ao; teng go na le didiri tse di boitshepo le baperesiti ba ba direlang le badisa ba dikgoro le baopedi. Ga re kitla re tlhokomologa Ntlo ya Modimo wa rona.”