Moreri 7 - Setswana 1970

Dikakanyo ka ga botshelo

¹ Leina le lentle le phala lookwane lo lo molemo; letsatsi la go swa le gaisa la go tsalwa.

² Go ya kwa lapeng la moletlo go phalwa ke go ya kwa lapeng la khutsafalo; ka gonne sona seo ke bokhutlo jwa batho botlhe, mme yo o phelang a a se tshole ka pelo!

³ Tshwenyego e gaisa setshego; gonne fa sefatlhego se lela, pelo e rutega sentle.

⁴ Dipelo tsa batlhalefi di mo ntlong ya khutsafalo, mme dipelo tsa masilo di mo ntlong ya boitumelo.

⁵ Go utlwa kgalemelo ya motlhalefi go gaisa go utlwa sefela sa dieleele.

⁶ Gonne setshego sa lesilo se tshwana le go thanthanyega ga mitlwa ka fa tlase ga pitsa. Le seo ke boithamako fela.

⁷ Go huma ka go patika go silofatsa motlhalefi, thelesetso ya phaposo le yona e senya pelo.

⁸ Bokhutlo jwa selo bo gaisa tshimologo ya sona; yo o pelotelele o phala yo o ikgodisang.

⁹ Se potlake mo moweng wa gago go ngala; gonne ngalo e nna mo pelong tsa masilo.

¹⁰ Se re: “Ke eng, fa malatsi a gompieno a phalwa ke a bogologolo?” Gonne potso eo ga se ya botlhale.

¹¹ Botlhale bo molemo fela jaaka boswa; bo thusa ba ba bonang letsatsi.

¹² Gonne botlhale bo a femela le selefera e a femela, mme thuso ya kitso ke ya go re: Botlhale bo phedisa mong wa jona.

¹³ Leba tiro ya Modimo! Gonne ke mang yo o ka tlhamalatsang se Modimo o se sokamisitseng?

¹⁴ Itumele ka letsatsi la letlhogonolo, mme ka letsatsi la botlhoko o akanye gore le lone Modimo o le dirile fela jaaka lele; ke ka moo motho a sa itseng sepe se se tla tlang sehularong sa gagwe.

¹⁵ Ke bonye tsotlhe mo malatsing a me a boithamako ke tse: Go na le mosiami yo o latlhegang, le fa a ntse a siame; gape go na le moikepi yo o phelang malatsi a mantsi, le fa a ntse a le bosula.

¹⁶ O se ka wa siama thata thata! O se ka wa itshupa o le botlhale go feta botlhe! O tla bo o itshenyetsang?

¹⁷ O se ka wa ikepa thata thata! O se ka wa nna seeleele! O tla bo o swelang ka nako e e seng ya gago!

¹⁸ Go molemo, fa o tshwara se, mme le sele o se ka wa tlosa seatla mo go sona. Gonne yo o boifang Modimo o falola mo go tsotlhe tseo.

¹⁹ Botlhale bo tiisa motlhalefi bogolo go balaodi ba le some ba ba mo motseng.

²⁰ Gonne ga go na motho ope mo lefatsheng yo o siameng, yo o dirang molemo, a sa leofe.

²¹ Le gona o se ka wa tlhokomela mafoko otlhe a a buiwang, e se re gongwe wa utlwa motlhanka wa gago a go rogaka.

²² Gonne le pelo ya gago e a itse gore le wena o rogakile ba bangwe gantsi.

²³ Tsotlhe tseo ke di lekile ka botlhale ka re, ke rata go tlhalefa. Mme go ne ga nna kgakala le nna.

²⁴ Tse di leng teng di kgakala, di botengteng. Ke mang yo o ka di tlhotlhomisang?

²⁵ Jaanong ka retolola pelo ya me go batla kitso le go fukutsa le go batla botlhale le temogo gore ke tle ke itse boikepo, fa e le bosilo, le bosilo, fa e le botsenwa.

²⁶ Ka bona se se galakang bogolo go loso, e bong mosadi yo e leng letloa, yo pelo ya gagwe e leng thaelo, yo mabogo a gagwe e leng dikgole. Yo o molemo fa pele ga Modimo o tla falola mo go ene, mme moleofi o tla tshwarwa ke ene.

²⁷ Moreri a re: “Bonang, ke se ke se bonyeng ka go bapisa sengwe le se sengwe gore ke tle ke lemoge ka fa dilo tsotlhe di ntseng ka teng.”

²⁸ Se ke sa ntseng ke se batla, se ke iseng ke se bone, ke se: Mo bathong ba le sekete ke bonye monna wa nnete a le mongwe, mme mosadi wa nnete ga ke a mmona mo go botlhe bao.

²⁹ Fela bonang, se ke se lemogileng ke go re: Modimo o dirile batho e le ba nnete, mme bone ba logile maano a mantsi.