Mataio 9 - Setswana 1970

Phodiso ya yo o suleng mhama

¹ Jaanong a palama mokoro a tshela letsha, a boela kwa motseng wa ga gabo.

² Foo ba tsisa go ene mongwe yo o suleng mhama, a letse mo bolaong. Ya re Jesu a bona tumelo ya bone, a raya yo o suleng mhama a re: “Namatshega, ngwanaka; dibe tsa gago o di itshwaretswe.”

³ Ke fa bangwe ba Baitsedikwalo ba ithaya ba re: “Yo, o kgala Modimo.”

⁴ Ya re Jesu a lemoga megopolo ya bone, a ba raya a re: “Lo gopolelang tse di bosula mo dipelong tsa lona?

⁵ Se se botlhofo ke sefe, a ke go re: ‘Dibe tsa gago o di itshwaretswe,’ gongwe go re: ‘Tsoga o tsamae’?

⁶ Mme lo tla lemoga gore Morwa-Motho o na le thata mo lefatsheng go itshwarela dibe!” Ke fa a raya yo o suleng mhama a re: “Tsoga o tsee bolao jwa gago, o be o ye kwa ntlong ya gago!”

⁷ Mme a tsoga, a ya kwa ntlong ya gagwe.

⁸ Ya re batho ba bona, ba boifa, ba be ba galaletsa Modimo o o neileng batho thata e e ntseng jalo.

Go bidiwa ga Matheo

⁹ E rile Jesu a tswa foo, mme a fetela pele, a bona motho yo o bidiwang Matheo, a dutse mo ntlong ya kgethelo; a mo raya a re: “Ntshala morago!” Yoo a nanoga, a mo sala morago.

¹⁰ Ya re Jesu a ntse fa dijong mo ntlong, bakgethisi le baleofi ba le bantsi ba tla, ba nna nae fa dijong le barutwa ba gagwe.

¹¹ Ya re Bafarisai ba bona, ba raya barutwa ba gagwe ba re: “Moruti wa lona o jelang le bakgethisi le baleofi?”

¹² Ya re a utlwa jalo, a ba raya a re: “Ngaka ga e batlwe ke ba ba itekanetseng, e batlwa ke ba ba lwalang.

¹³ Jaanong tsamayang, lo ithute gore ke go reng, fa go twe: ‘Ke batla kutlwelo-botlhoko, e seng setlhabelo;’ gonne ke tsile go biletsa baleofi tlhabologong, e seng basiami.”

Ka ga go itima dijo

¹⁴ Ya baa gona barutwa ba ga Johane ba tlang go ene ba re: “Ke go reng, fa rona le Bafarisai re itima dijo gantsi, mme barutwa ba gago ba sa di itime?”

¹⁵ Jesu a ba araba a re: “A baetsana ba ka lela, monyadi a sa ntse a na nabo? Mme malatsi a tla tla, a monyadi a tla tlosiwang mo go bone ka ona; ke gona ba tla itimang dijo.

¹⁶ “Ga go ope yo o ka bitiang seaparo se se onetseng ka sebata se sešwa; gonne sebata sa sona se tla gagola seaparo, mme legago le oketsege.

¹⁷ E bile ga go ke go tshelwa weine e ntšhwa mo makukeng a a onetseng. Fa go ka dirwa jalo, makuka a ka phanyega, weine ya tshologa, le makuka a senyega. Mme go a tle go tshelwe weine e ntšhwa mo makukeng a mašwa, mme di bolokege mmogo.”

Phodiso ya mosadi wa tshologo ya madi. Tsoso ya ngwana wa ga Jairo

¹⁸ Ya re a sa ntse a bua tseo nabo, mookamedi mongwe wa senagoge a tla, a mo obamela a re: “Morwadiake ke gona o swang; mme a o ko o tle, o mmee letsogo, mme o tla rula.”

¹⁹ Jesu a nanoga, a mo sala morago le barutwa ba gagwe.

²⁰ Jaanong mosadi yo o sa leng a nna le tshologo ya madi dinyaga di le 12, a tla fa morago ga gagwe, a ama kola ya kobo ya gagwe;

²¹ gonne o ne a dumela go re: “Fa nka ama kobo ya gagwe fela, ke tla fola.”

²² Jesu a retologa, a mmona, a mo raya a re: “Namatshega, morwadiaka; tumelo ya gago e go thusitse.” Mme mosadi a fola e sa le ka nako eo.

²³ Ya re Jesu a tsena mo ntlong ya mookamedi, mme a bona baletsi ba ditlhaka, le bontsi bo tsositse modumo,

²⁴ a ba raya a re: “Thibogang! Gonne morweetsana ga a swa, o thulametse.” Mme ba mo tshega.

²⁵ Ya re batho ba sena go ntshiwa, a tsena, a mo tshwara letsogo, mme morweetsana a tsoga.

²⁶ Tumo ya moo ya utlwala mo lefatsheng leo lotlhe.

Phodiso ya difofu

²⁷ E rile Jesu a tloga foo, difofu tse pedi tsa mo sala morago, tsa goa tsa re: “Re utlwele botlhoko, Morwa Dafita!”

²⁸ Ya re a sena go tsena mo ntlong, difofu tsa tla fa go ene. Jesu a ba raya a re: “A lo dumela gore ke nonofile go dira jalo?” Tsa mo raya tsa re: “Ee, Morena.”

²⁹ Ke fa a ama matlho a bone a re: “A go lo dirafalele ka fa tumelong ya lona!”

³⁰ Foo matlho a bone a foufologa. Mme Jesu a ba laela thata a re: “Lo itise gore lo se itsise ope.”

³¹ Mme ba tswa, ba mo tumisa mo lefatsheng leo lotlhe.

³² Ya re ba tswa, ga tsisiwa go ene semumu se se tsenyweng ke modemone.

³³ Ya re modemone o sena go kgaramelediwa ntle, semumu sa bua; mme batho ba gakgamala ba re: “Ga go ise go ke go bonwe se se ntseng jalo mo Iseraele.”

³⁴ Mme Bafarisai ba re: “O kgarameletsa medemone ntle ka molaodi wa medemone.”

Ka ga thobo e kgolo le barobi

³⁵ Jaanong Jesu a tlhatlologanya metse le metsana yotlhe, a ntse a ruta mo disenagogeng tsa bone, a rera Efangele ya puso, a fodisa malwetse otlhe le makoa otlhe.

³⁶ Ya re a bona bontsi jwa batho, a ba tlhomogela pelo; gonne ba ne ba bogisegile, ba lapile jaaka dinku tse di se nang modisa.

³⁷ Ke fa a raya barutwa ba gagwe a re: “Thobo e kgolo, mme badiri ba a tlhaela.

³⁸ Ka moo he, rapelang Morena wa thobo gore a romele badiri mo thobong ya gagwe.”