Mataio 8 - Setswana 1970

Molepero o a fodisiwa

¹ E rile a fologa mo thabeng, masomo a magolo a mo sala morago.

² Jaanong molepero a tla go ene, a mo obamela a re: “Morena, fa o rata, o ka mphepafatsa.”

³ Jesu a ntsha letsogo, a mo ama a re: “Ke a rata, phepafala!” Mme a akofa a fola lepero la gagwe.

⁴ Jesu a ba a mo raya a re: “O itise gore o se ka wa bolelela ope; mme yaa o ipontshe moperesiti, o be o ise neo e Moše o e laetseng, go nna tshupo mo go bone.”

Molaodi-wa-lekgolo wa Kaperenaume

⁵ E rile a tsena mo Kaperenaume, ga tla molaodi-wa-lekgolo go ene, a mo rapela a re:

⁶ “Morena, motlhanka wa me o letse fa fatshe mo ntlong, o sule mhama, o bile o tlhabegile mo go botlhoko.”

⁷ Jesu a mo raya a re: “Ke tla tla, ke mo fodisa.”

⁸ Molaodi a araba a re: “Morena, ga go a ntshwanela gore o tsene fa tlase ga ditlhomeso tsa me; bua lefoko fela, mme motlhanka wa me o tla fola;

⁹ gonne le nna ke motho yo o mo taolong, mme ke na le batlhabani fa tlase ga me; e a re fa ke raya yo ke re: ‘Tsamaya!’ a tsamae; le yo mongwe ke re: ‘Tlaa!’ a tle; le motlhanka wa me ke re: ‘Dira se!’ a se dire.”

¹⁰ Ya re Jesu a utlwa, a gakgamala, a raya ba ba mo setseng morago a re. “Ammaaruri ke lo raya ke re: Ga ke ise nke ke bone tumelo e e kana le fa e le mo Iseraele.

¹¹ Ke bile ke lo raya ke re: Ba bantsi ba tla tswa kwa botlhabatsatsi le kwa bophirimatsatsi, ba nna fa tafoleng le Aborahame le Isaka le Jakobe mo pusong ya magodimo;

¹² mme bana ba puso ba tla kgaramelediwa kwa lefifing le le kwa ntle; teng go tla nna selelo le phuranyo ya meno.”

¹³ Jesu a ba a raya molaodi a re: “Tsamaya; a go go dirafalele ka fa o dumetseng ka teng.” Mme motlhanka wa gagwe a fola ka yona nako eo.

Mogwagwadia Petoro o a fodisiwa

¹⁴ E rile Jesu a tsena mo ntlong ya ga Petoro, a bona mogwagwadie a letse fa fatshe, a tuka bolelo;

¹⁵ ke fa a tshwara seatla sa gagwe; mme mogote wa mo tlogela, a ba a tsoga, a mo direla.

¹⁶ Ya re go le maitsiboa, ba tsisa go ene ba le bantsi ba ba tsenyweng ke medemone; a kgarameletsa mewa kwa ntle ka lefoko, a fodisa botlhe ba ba lwalang,

¹⁷ gore go dirafale se se builweng ke Jesaya moporofeti a re: “Ene o ithwesitse makoa a rona, a rwala malwetse a rona.”

Ka ga go sala Jesu morago

¹⁸ E rile Jesu a bona lesomo la batho le mo dikanyeditse, a laola gore go tshelelwe kwa moseja.

¹⁹ Foo ga tla moitsedikwalo, a mo raya a re: “Moruti, ke tla go sala morago gongwe le gongwe kwa o ka yang teng.”

²⁰ Jesu a mo fetola a re: “Diphokojwe di na le mesima le dinonyane tsa leapi di na le dintlhaga, mme Morwa-Motho ene ga a na fa a ka latsang tlhogo teng.”

²¹ Yo mongwe wa barutwa a mo raya a re: “Morena, ntetlelele, ke ye go fitlha rre pele.”

²² Jesu a mo fetola a re: “Ntshale morago; a baswi ba fitlhe baswi ba bone!”

Jesu o didimatsa ledimo

²³ E rile a palama mokoro, barutwa ba gagwe ba mo sala morago.

²⁴ Jaanong ga tsoga ledimo le legolo mo letsheng, mo mokoro o bileng wa khurumediwa ke makhubu, mme ene a bo a robetse.

²⁵ Ba ya go ene, ba mo tsosa ba re: “Morena, re pholose, re a nwela!”

²⁶ A ba raya a re: “Lo boifelang, ba tumelonyana ke lona?” Ke fa a tsoga, a kgalemela diphefo le letsha, ga ba ga nna tidimalo e kgolo.

²⁷ Foo batho ba gakgamala ba re: “Yo ke yo o ntseng jang, ka le tsona diphefo le letsha di mo utlwa?”

Phodiso ya ditsenwa tsa Gatara

²⁸ E rile a fitlha kwa moseja mo lefatsheng la Bagatara, batho ba le babedi ba kgatlhana nae, ba ba tsenyweng ke mewa e e bosula, ba tswa kwa diphupung, ba le bogale thata, mo go neng go se ope yo o ka fetang ka tsela eo.

²⁹ Ba goa ba re: “Re na le kopano efe le wena, Morwa Modimo? A o tsile kwano go re tlhokofatsa e ise e nne nako?”

³⁰ Jaanong ga bo go fula motlhape o mogolo wa dikolobe kgakalanyana le bone.

³¹ Mewa e e bosula ya mo rapela ya re: “Fa o re kgarameletsa ntle, re romele kwa motlhapeng wa dikolobe.”

³² A e raya a re: “Yaang teng!” Foo ya tswa, ya tsena mo dikolobeng; motlhape otlhe wa ba wa itigela ka maokoriba mo letsheng, wa swela mo metsing.

³³ Jaanong badisa ba tshaba, ba ya kwa motseng, ba bolela tsotlhe, le tsona tsa ba ba neng ba tsenywe ke mewa e e bosula.

³⁴ Foo batho botlhe ba motse ba tswa ba ya go kopana le Jesu. Ya re ba mmona, ba mo rapela gore a tloge mo nageng ya bone.